Исакес ке джикъе ягъ алттархьуна ягъар ирхе хьас хъучучIугуна рагъ бабахъди алдаркуне агъайи хье инсанари. Исан арайиъ ке ирхе ягъ ккиркIуна ягъар джикъе верегуна рагъ бабахъас хъаттаркуне агъайи. Рагъ нае дагьарин, нае кканччифас фагъучIайчин, афучIайчин — ме кардилди ягIар акьайи.
Iурдин вегIдайи авала ппара лиханди инсанар. МекIер Iаттар вейи, нецIвар фарцайи цIуппе меркквари. Хьеттар гварариъ ай гъайи нецIун кIулкIумариас. Гисаас хьед агъацIас хьас, хабди маларифас хьед ухас хьас, идемари лумаррилди, туьлуьнгарилди акьрафи ме кIулкIумар.
Ме январь вазалан, ахирар кеттархьагуна Iурд Iу сур акьуне агъайи. Гьалдисттегьен малари фидегьен IуькI IуьтIуна айчин гьегидегьeн гьалдихъас хабра IутIанасе: чIиремалар дахи адикучира, гIане малар адикас вайдава мекIер ами, урчарис ккерхъайи джуре акьуна музе IуькIер, хIуппар хулахъ хъавейи.
Экьуна чиппин хулариъ мацухъ хъаягуна, чирагъара кикIуна хулан, гъилин курар акьайи инсанари. Идемари шумар-шаламар аркьафи. Хумбари Iелеф аркьайи, хъучадивуна чиппин шибер-хуттулара гъилин иш-пешабур аркъайи: хьей тIубу акьай, рагIала рукIай тIакаъ икIaй, тубучIил ттун акьай, гиргенар акьай, чухрайи тIусул ирцIанди ттунарис, рачалар аркьайи. Рангук кирхIу ттунарикес дамашникар, гвегIенар, кьвадилкьванар аркьайи. Кьвадилкьванар самуз ирхе ягъар хьугуна ришайи, фас пучин ягъуйи Iекв аягуна и ппара рухаф.
МехIелайиъ аяттар, багукIилинттар са усал хьуна хъай аркьайи курар, элра ккеттвес чиппис ахттилатара аркьай. Мегуна хIаттари бицIиттарис ягIар аркьафи иш-пешабур, экьвас-гъузас. Аркьайи авала ахттилатар, ахъакьайи дагь заманаурихъас.

Нажабат Курбанова