15пе январьди Агъул райондин хIаф Закир Каидов хъай АО РСУ Агульский филиалдин хIаф Омар Магомедовра ушуне хье райондин варха ФитIарин хIуриди. Мич ушубан матлаб и ахттармиш акьас, хъуттурфуна кьимат йис нае усар фиштти айчин батIар акьуна ккане усар ягIархьас.
Садпеф адегъилди райондин хIаф аларуцуне «Улыбка» детский садикдил. Ме идарайин дахи суман администрацин пешакурари адина завал акьуна уйи актар, батIар акьуна ккане мукьарин. ЯгIайин ягъас сметабура аттивуна заявкабура гьикуная федеральный проектин кьадарилди капитальный ремонт акьуб бадала. Гьеме читинвел ая ме хIуьрин КДЦйин идарайинра, мисанра капитальный ремонт акьуб бадала джалла кIеджар гьикуная.
Ушу 2024 иса Типпигъарин хIуриъ садпе модельный библиотека дархъа усаъ Закир Каидова хабар акьуне Дагъусттандин культурайин министир Зарема Бутаевайис КДЦйин арайил але читинвеларихъас.
Мисаъ Закир Каидов гьучархьуне ме хIурин гимил экьуная джемеIетихъайра, ми мебурис чIал йине администрацивас агърукьа кар акьасе пуна, заявкабуринра фи хьунчин хабди хабар акьасе пуна.
Хабди мебур ушуне хъуттурфанас махьтабихъ, хъара хIурин фельдшерско-акушерский пунктунихъ. Ахиран усаъ алтухъ фера читинвелар адавуй. Медсестрайин чIаларилди ахиран вахттари грипп хьуна иттаттарин сан вартт хьуная, дарманар хъучатубра идже ая пуне ми.
2023 иса мебурин хIурин махьтабиъ джалла акьуна ккане ремонтный курар акьуна афе. Мисан духIуба акьуная гъвад, цалар цIуппе акьуная гипсокартонилди 160 кв.м, хъуьсу багус йирхIуная сайдинг 84кв.м., хъара 10 раккра духIуба акьуне мисан. Джалла курар вахттуни акьуна ккиркIунра э.
Хъара мисаъ Агульский РСУйин хIатти Омар Магомедова хабар акьуне, ме Гоа-Фите 3 киломитрин рекъуьн манзилиъ, самуз гьава ибгIа хьухаб апрельдин вазалахъас башламиш акьасе рекъ батIар акьубан курар, рекъ IирIе акьубар, мертт акьубар, хъара сае курара акьасе пуна.
Ме кардис кIилди герек иде кIеджар завал акьуна гьикунара ая. Ке читинди ая суман рекъун арабур ахттармиш акьуне Закир Каидовара.

Батитай Габибулаева