«Россия» агъа выставка-форумдиъ хье хIуькуматин вице-премьерди Татьяна Алексеевна Голиковайи йине завди джавизар, ахиран исари Дагъусттандин агъалкьунарихъас саддалара ягъайин ягъас гъадиваттарна батIар аркьа гIилмин идарабур акьуб бадала. Дагъусттан Iу номинациъ йиркIурал акьуне. Хьин гIая ке ппара садикаринра махьтабарин капитальный ремонтар акьуттарин сандигI 2019-2023 исари. Хъара хье республика гIачархьуне «Прорыв 2023 года» агъа номинацигI, ушу иса ке ппара цIае махьтабар акьу сандигI. Миштти хьин саймиш акьуб ппара хIа кьимат э хьес, хъара гьер усариъ ме кар арайил аркьаттарисра. Чугъсагъул чвас джаллайисра, гьинан кумакилди хье республикайин ттур вартт хьунчин гьеме акьу курар бадала — гьер джурейин идарабурис, гIилмин пешакурарис, ме кардин усттабурис, меценатарис, дагъустанагълибурис, гьертти ул ачатубан хье махьтабарин четинвеларис. 2019 исахъас хаб хье республикайиъ акьу ная 84 махьтаб, гьемидегьен садикара. Гьеме кар бадала 45 агъзур шиникквдис мисариъ мукьар хьуная. Iари ахиран Iу исан арайи капитальный ремонтар акьуная 342 махьтабинра 61 садикдин. Iудпу номинациъра дузди э хье республикайин хIагаф акьуф. Ушу иса хьин дахъуне 37 махьтабра 11 садик. Хъара гьетегуна хIекьдан лицензибура йине 19 махьтабисна 26 садикдис, дахъас йиркIураъ уйиттарилас ппара хьуне. Чугъсагъул учис, Татьяна Алексеевнайис, хIуькуматин Минпросвещенисна Минстройдисра хье Дагъусттандис акьу кумак бадала. Миштти хьугуна хъара Iайи гIешкъ ве хъара иджи кар акьас ке хIа джавиз бадалди — агъзурарилди ме кардил шад хьу шиникквар хьубан», — ахъакьуне Сергей Меликова.
Батитай Габибулаева
Сергей Меликов: «Дагъусттандис лап хIа кьимат йине хIуькуматин арайиъ»
![](https://vestiagula.ru/wp-content/uploads/sites/15/sites/15/2024/02/photo_2024-02-26_15-09-13-1024x731.jpg)