Ягълукь аликIубан бина хьунафе лап дагь заманайихъас хъаб э. Хьес ме гIедат адине авалдин вахттари Египетдиас, Грециас, Индиас, Центральный Азиас хъара Древне-Славянская Русьдиас (Iуьрусатихъас). Алархъа ягълухъ джалла миллатари. Фикир ве, фас аликIа шейъ э ягълукъ пуна. Гьелбетта, сифтта кIили ачархьа хIапай ибгIавелдис аликIа пуна. МекIер ая мукьари ибгIавелдис суман, кучевел ая мукьари аликIа рагъу гудж дахьас пуна. АликIубан мегIна гьер миллатин гьергъилди э. Фикир акьучин, гьер миллатарин ая чиппин аликIубан кьайдабур. Ая милаттар, чиппи диндин кьайдабурихъ къуттурфуна аликIаттара, са пай инсанари фурс, гIедат бадалди. Сифтта ягълукъ аликIубан гIедат бадил хьуне Египетдиъ фараонарин вахттари. Мебури диндин шартIарихъ къуттурфуна алархъайхьуне чиппин дараджа агвар акьас. Египетдиъ хумбари суман идемарира айхьуне кьумашикес акъуна кIилил аликIаф «Немес» агаф. Миштти аликIубалди мебури агвар аркьайхьуне гьертти учин тегьер, дараджа. Египетдиас ме гIедат адине Франция агъа хIуькуматиди. Агъа, Францин император Наполеона сифтта кашмирдин шаль файдине учин хизан Жозефинайис. Гьемишти 12-пу асирди Франциъ бадил хьуне ягълукъ алархъа гъедат. ХIисабарилди, те вахттари Францин хумбар ке фурсар кеттари, гIешкъунилди аликIай хьуне те вахттари ягълукъ. Гьеме вахттари Индия агъа хIуькуматиъ айхьуне чиппин гIедатилди алархъа «сари» агъаф. КIилил ягълукъ суман, мебури сари ишламиш аркьай хьуне аликIа кан суманра. Гьеме 12-пу асирди ягълукъ алархъай гIедат аттархьуне Iуьрусатихъдира. Сифтта мебури аликIай хьуне гьер джурейин кьумашикес акьу «Убрус» агъа кIилил аликIа шейъ. Касиб халкьари алархъай хьуне хьейин кьумашикес акьуна. Кьудрат хъаяттари аликIай хьуне багьай ин кьумашикес акьу фурсунинттар. Хабди, 19- пу асирди бадил хьуне ягълукъарин фабрикабур. ЯгIайин ягъас хIа кьимат ай ишламиш аркьа ягълукъар э Павлопосадский, Колокольцева агъа фабрикабуринттар, хъара Оренбургский пуховый ягълукъар. Центальный Азиъна Ближний Востокдиъ ая ппара гьер джурейин миллатарин инсанар. Мебурихъра хъая гьерттихъ чиппин гIедатин кIилил алархъаттар. Мебур э паранджа, тюрбан, хиджаб, никаб, хъара сасра джурейин кIилил алархъа гIедатин шейэр. Дагъусттандиъра ягълухъ алахъубан гъедат айхьуне авалдихъас мич. ЯгIара гьеме гIедат аме. Са вахттуни алахъуб буш хьуна уйи. ЯгIайин ягъас ме кардис цIуппе хьуная. Дагъусттандиъ миллатар ппара ая. АликIубан гIедатар гьерттин гьергъилди э. Ягълукъ абурасулдис аликIаф суман, диндин шартIарна кьайдабуриасра аликIаф. Ме гIедат хьес атуне хье хIабабари. Гьалдихъас хаб вере несилари ухIурай пуна. Кьанди, 2013-пу иса февральдин вазала, кIилди дуньяйиъ кьабул акьуне «День платка» агъа хIаягъ. Гьер иса ме ягъас багъш акьуна аркьа лап хIа мегIракабур. Ме мегIракабур арайил акьубан кьаст э диндин ая шартIарин кьайдабурин кьимат акьас, хъара хье гIедатар ухIуб бадалди. ГIедатар ухIубалас асуллу э миллатар афухIубра.
Наибет Гасукаева