Гьер са пешайин эессин кар хъучучIаф мегIелимдилас, ги кийи дарсарилас э. МегIелимди е насихIетар йиркIвуралас вейдава сайинра. Пас хьасе: садпе мегIелимдин насихIетар генера.
БицIиттарин мегIелимвел — лап четин кар э, фас пичин гин гъиликкди веяф фера дагIа бицIи шиникквар э.
Ги акьуна кканде гебурикес инсанар: хурасра, ликIенас ягIар акьуна, хIезур акьуна кканде аме Iуьмурдихъди.
Кьадирарин Iэбдулкьадиран руш Халисата учин пеша гIаттивуфе махьтабиъ ами. Муядпе класс ккиркIугъилди ме, хьибуд сасра шибера: БархIачарин ХIададан Барият, Бидарин МехIемадан ХIелимат, Ведухъ Шерифан Зариятра хъай 1968-пе иса Буйнакский 5-пе педучилищайиди ушуфе.
Джаллабур хъай 1972-пе иса Агъул райондиди бицIи мегIелимвел акьас адини.
ЯгIайин ахттилат Халисат Абдукадыровнайихъас э-1972-пе исалас мич ягIайин ягъанисттегьен уч хуру махьтабиъ кар аркьай аметтихъас.
Мин гъиликкес агъзура хъучархьуна (алтухъ хьебра мункин э) шиникквар ушуная.
Халисат Абдулкадыровнайи, 53 иса кар акьуна, 12 гелай гьикуная хIа классариди учи вардиш акьу бицIиттар. Кибашттан, мидегьенттар вардиш акьуб бицIи кар дава. Махьтабиъ кар аркьай, 1980-пе иса МахIачкъалайин ДГПИ-йиъ бицIиттарин мегIелимарин факультетдиъ учIун, 1985-пе исас ккиркIуна, учин кар алтухъди ягIар акьуна, кар аркьаяфе ми ме махьтабиъ.
Уч кар аркьаядегьен гагьди мис иджи кар акьубан ппара «Почетный грамотабур» йиная. Сатталара хIа джевиз э мис -1988-пе иса йиная «Отличник народного просвещения России» агъа ттур, хъара 2004-пе иса, 26-пе ноябрьди йиная «Заслуженный учитель Республики Дагестан» агъафра.
КIилди 54-пе ис э
Халисат Абдулкадыровна кар аркьай. Мин гъиликкес ушуттарикес хIа духттирар, мегIелимар, сасра пешакурарин эессибур хьуная. Мебурикес: Исаков Джамалудин Насратдинович, Омаров Феликс Магомедович, Рамазанов Рамазан Курбанович — хIа духттирар э; Махмудова (Абдулкадирова) Султанат Шамсудиновна, Курбанова (Ибрагимова) Зульмира Кубаевна, Ибрагимов Курбан Эмирович, Тагирбекова (Мацуева) Нигер Загирбековна — мегIелимар, хъара сасра пешакурарин эессибур ая.
Халисат Абдулкадыровнайихъна Али Абакаровичахъ 5 валад хъая. Мебур джаллабур дуьхьуьная, гьер сайихъ чиппин валадара хъая. Джаллабур, хуруна курарикк кея. Мебури ул алдихьай дава бабарилас.
5-пе октябрьди кIилди дуьйин мегlелимарин ягъ («Международный День учителя») э. Хъучадиная хIаягъ нубарак хьурай учис. Джандин сагъвел, йиркIвуран сакинвел кам дахьурай агъая мис гъиликкес ушу шиниккварира, хъай кар аркьая мегIелимарира.
Агъул райондин джалла мегIелимарис нубарак хьурай ме ХIаягъ! Сагъвел, сакинвел, идже шиниккварна гебурин агалкьунар
алтухъ хьурай!
Тамам Рамазанова
