Сасра миллатари хъуттурфуна, агъул халкьдин инсанар чIукь э аяф. Амма нандиъ хьучира ая мебур. Чаб ая мукьуйиъ, чиппихъас иджеттар э пуна, идже сана гъуршанде. Сад мебурикес Мазанаева Ирина Гайдаровна э.
Ирина хефе Буршагъарин хIуриъ Буршагъ ХIейдар Манафович агъа мегIелимдинна, Типпигъарин Хутарин Валин Айсанат агъа рушан — бицIи духттирдин — хулаъ.
Мин бабар-дадар ацIун гагьди кар акьуне хIуриъ: дада 40 иса- чиппин махьтабиъ химин дарсар килан мегIелимвелдира, 2001-пе исан хаб 2020-пе исасттегьен директорвелра аркьай, баб 38 иса — гьер мукьариъ бицIи духттирвелди, гебурикес хIа пай вахттуни Буршагъарин ФАП-дин заведующийвелди.
Ирина хефе 1990-пе иса. 2008-пе иса, ккиркIуна чиппин махьтаб (са иса Типпигъра хуруфе, хIабабар-хIададарихъ хъуттурфанас адина), Каспийский медучилищайиъ учIуни.
2012-пе иса фельдшерарин курсар ккиркIуне. Гьетегунан хаб, 2012-пе исалас мич -МахIакъалайиъ Дагъусттандин Республиканский ценр восстановительного лечения агъа идарайиъ кар аркьая- гальваногрязь алихьа кабинетдин хIафе.
Ме, учи аркьа кар, ппара йиркIв фай аркьа дишагьли э.
«Духттирди иттал дава сагъ акьакьуна кканеф- иттая инсан э»,- агъа джаллабурис яга мисалайи.
Иринайихъай кар аркьаяттарира, гисаъ аве иттаттарира михъас иджеф э агъай, иджи гъургъа: учин кар ягIа; иттаттарис элхъен хъуьссу аркьа, гебурис идже верегъилди аркьай ве агъай. Ке удигьай нае духттаракес хьучира кканеф – элхъен хъуьссу э, чиппил йиркIв алийина, дарман акьуна э. Хъуссу хъучадиву инсан сайисра агвасра кегьей кканвейдава- начагъ инсанарис хъара Iайи.
Мик гишттин багьана кикIас хьасттава. Мис ке ха джевиз-_ иттаттин иджвел хьуна, ачухъ хъуьсу э.
Иринайис чишна учин баб э– тидегьен исари хIуриъ кар акьуф. ХIуринттарис ккандавуйи мин баб ушуна тидас (агьал пенсиди айчIуная) . Айсаната, ширинди гъургъай, иттаттис рехIет хьас аркьайи. Ми, фи вахттуни шаб пучира: Iуьш э, вахадну ягъ э дапуна, аттархьуна адина, итта касттис руб-дарман аркьа инсан идехIела.
«Гьемишан элхъен хъуссу суманфе, кьацIра учихъ гъузанас адатуна, шаб пегъилди адина, кумак аркьафи», — агъа мин бабахъас Буршагъарин хIуринттари.
Иджи кар акьубан кардилас «Почётный грамота» йиная Айсанатас.
Дадара — Мазанаев ХIейдар Манафовича -1980-пе иса пединститутин химин дарсар килан факультет ккиркIуна, чиппин хIуриъ кар акьуфе. Учи килан дарс иджи, шиниккварин гешкь учIагъилди киланфи. Дарсар иджи килан хIела, инсанарихъай гъургъа чIал гьучавереф идехIелара, ме 2001-пе иса директорвелди гъурзар акьуни. 19 истти акьуни ХIейдар Манафовича ме кар. Ме директор идегуна, са иса мебурин махьтаби конкурсдиъ садпе мукь фацуна, 100 агъзур манат пул гъушуфе. Агьал пенсиди айчIуна, Каспийскдиди, учин валадар аявусаъди ушуная. Мисаъра фера даркьай, хулаъ экьуна адава ме: вневедомственный охранайин предприяттиъ, хьеттин кьаравулвелди кар аркьая ми.
Иринайихъ 2 чина, са чу хъая. Джаллабур агьал кардик кея. Са пай шиникквари дадан пеша гъушуне: са рушана, кIиркIа — мегIелимвелдин курсар ккиркIуне: Дагестанский педагогический университет; сури: 2 руша — чиппин баба суман, медицинский курсар ккиркIуна, лиханди ая. Гьерттихъас иджеттар э пуна, идже сана хъая: бабар-дадари е насихIетар фацуна, чиппин кар, гьетебури суман, чиппира йиркIвфай аркьая.
ХIейдар Манафовичанра, Айсанат Валиевнайин, гебурин валадаринна, хуттуларин джандин сагъвел кам дахьурай. Дуьнья сакин хьурай, джалла инсанар сакинди, гьерф учин хулаъ шадтти, йиркIв Iэкви яшамиш хьас: гьер са инсан чиппин мурадарихъ рукьас.
Иринайис: инсанарис иджвел аркьай, бахттлу Iуьмур йирай; учин рушна кIиркI хIа акьуна, гебур Iуьмурдин дуз рекъуьъ ихьас.
Тамам Рамазанова
