Агъулар пегуна, гъилгъилари Агъул район йиркIвурал ве. Амма агъулар са Агъул райондиъ дава яшамиш веяф: агъулар ая Къуругь райондиъра. Мисаъ 5 хIуриъ агъул чIал гъургъаттар ая: ХIуьппукь, Хвередж,Уссугь, Квардал, Гелхен. Амма агьал агъуларин халкь адава мукь адава. Нандиъ яшамиш веячира, джаллабур чаб чиппихъай са хIурин инсанар суман яшамиш вея. Советский Союз аягуна джалла хIурариъ колхозар айуйи. Джаллабури малар, хIуппар ухIай, хуппуриъас гъушу мехIсулилди кIил аттивайи. Гьер са хулаъ 5-6, хъара ппара валадар авейи. ХIурирариъас шагьурдиди хурас ушугуна, кибашттан, гисаъ эркьваттар вейи. Амма хIа пай, чиппин хIададар-хIабабар, бабар-дадар суман хIуриъ эркьвайи. Агъул райондиъ суман, сасра районариъра гьегиштти и.
ЯгIа зас Къуругь райондин , Уссу гьарин хIуринттарихъас ахъакьас кканди ая. Зас гебурихъас ликIен пуна миннат акьуне Новоульяновскдиъ яшамиш вея Типигъарин хIуринтти. Уссугьас адеттар Типпигъарин хIуриъра ая. Амма зас гьете Къуругь рaйондинттарихъас э пас кканди аяф.
Уссугьарин хIуринттар яшамиш веяф Хвередж нецIвун багулив э. Мус ккийинаяф ичин ме хIур ягIай адава, чиппи, мисаъ яшамиш веяттари, агъа 2-3 агъзур исан удигьди ккийинаяф э агъа. Мисаъ авалдин тухумарин хуларна, некьвар ая. Хуларин гIанариъ, ттаргъунар хъудава некьвара ая. Инсанари гебур джугьутIаринттар идеф хьасе агъа: чиппин некьвар ккеддихьурай пуна, ттаргъунарик кея ттурар кетунаяф идеф хьасе агъа. ХIурин кавхайи, сасрабури агъа чIаларилди, мисаъ удигьди армянар, Iэрабар, джугьутIар яшамиш вей уйи агъа. Са идеми ахъаркьа учин тухум Iэрабарикес э пуна. Iэрабари, чаб ислам ккиянас адегуна, гьер са хIуриъ 2 инсан артайи агъа ислам ккийиянас. Амма агьал нае тухум гьинарикес ичин ягIайдава: джаллабур дуьхьуна, са хизанар суман яшамиш вея. 2021-пе исан переписьдилди мисаъ 212 инсан яшамиш вея. Мисаъ медпункт, администраци, махьтаб ая. Авала суман хIуппар-малар ухIай, багъар-бусттанариъ емишар узай, гъилин пешебур аркьай, дикванариъ лазим шейар масса ицIанди кIил ухIая. ХIуриъас айчIуна ушуттар гьер вусариъ ая, хье райондинттар суман.
1985-пе иса Уссугьарин Катирарин Рамазанов Магомед Рамазановична гин хизан, чиппин валадар хъай ушуне Къуругь райондиъас Ставропольский крайдиди. Са хизанар суман джалла агъуларихъайна сасра миллтарин инсанарихъай, Георгиевский райондин, Новоульяновский агъа поселок диъ яшамиш хьуни. Мич адестти мебури Дагъусттандиъ высший образованибур гъушуна уйи. Рамазанов Магомед — Уссугь 8-пе класс ккиркIухаб, Гельхен агъа хIуриъ 10-пе классин аттестат гъушанас ушуни. 1959-пе иса, махьтаб ккиркIугъилди армиди ушуна, Байконур агъа космодромдиъ хьуни. Тидас адехаб, 1961-пе иса, Каспийскдин медучилищайиъ фельдшервелди хурас учIуни. КкиркIухаб 1968-пе иса чиппин хIуриъ(Уссугь) медпунктунин хIаф хьуни. Мисаъ ми 1974-пе исасттегьен кар акьуна, МахIачкьалайиъ мединститутдиъ учIуни.
1981-пе иса ккиркIуна, 4 иса Къуругьарин райондин больнцайиъ терапевтвелди кар акьуни. Мин хизан — Рамазанова (Юупова) Сунаханум Гелхен агъа хIуринф и. Ме чиппин хIуриъ 1962-пе иса махьтаб ккиркIуна, МахIачкъалайин пединститутдин филологический факультетдиъ учIуна, 1967-пе исас ккиркIуна адини.(Къуругь райондин агъуларин дишагьлибурикес 1-пеф э высший образовани гъушуф). 1967-пе исалас 1972- пе исасттегьен чиппин хуриъ Iуьрус чIлан дарсар килан мегIелимвелди кар акьуни. Хабди, 1972-пе исалас 1983- пе исасттегьен, Уссугьарин махьтабиъ, 1983-пе исалас1985-исасттегьен Къуругьарин 2-пе махьтабиъ дарсар кийини. 1985-пе иса Iудар Новоульяновский посёлокдиъ кар акьас хъучучIуни: Сунаханум Магомедовна хуриъ суман 1985-пе исалас -2008-пе исасттегьен махьтабиъ; Катирарин Магомед Рамазанович-духттирвелди: кIилиастти терапевтвелди, 1986-пе исалас-2015-пе исасттегьен мисаъ главврачвелди кар акьуни. Чаб кар аркьа вегIдуни лап иджи кар аркьаттар э агъай ттур ая мебурин. Сунаханум Магомедовнайис иджи кар акьубан ацIун «Почётный грамотабур» ефе, «За трудовую доблесть» агъа медалра; Магомед Рамазановичас «Благодарственный письмобур», «Почётный грамотабур» йина уйи, ме «Ветеран труда» и.
Iудари 3 валад ухIуна, хIа акьуна, образованибур йини. Iудар мебурин кIиркIар Москвайиъ яшамиш вея: Рамазанахъ учин бицIи строительный фирма хъая, Решек аъаф — Москвайин электросетдин участокдин начальник э.
Мебурин руш Гаджимурадова (Рамазанова) Зинаида Магомедовна -Новоульяновский махьтабиъ начальный классарин мегIелим э. Мин, учин бабар-дадарин суман, иджи кар акьафе агъай, идже ттур ая.
Катирарин МехIемадан руш -Зинаида 1969-пе исан 3-пе августи хунаф э. Ми 1984- пе Уссугьарин махьтаб ккиркIуна, Буйнакский педучилищайиди хурас ушуни. 19988-пе исалас 1991-пе исасттегьен Къизлардиъ бицIи классарин мегIелимвелди кар акьуне. 1991-пе иса Новоульяновскдиъ яшамиш вей, мисан совхоздиъ зооинженервелди кар аркьая, Уссугьарин Султанарин ХIеджимурадов ХIеджимирзайис шувас ушуне. Гьете исалас мич ягIара мисан махьтабиъ бицIи шиниккварис дарсар киланди ая. Посёлокдин халкьарис ппара кьабулди ая ми кар аркьагъилди, чиппин ппаттаъас «Благодарственный письмобур» ицIанде мис. Зинаидайихъна ХIеджимирзайихъ 4 валад хъая: 3 рушна кIиркI. Джаллабури Санкт-Петрбургдиъ хуруна, высший образованибур гъушуная: хIа руша, ФатIимайи, 1-пе Петербургский И.П. Павлован ттур але медуниверситет, ккиркIуна 2016-пе исан хаб Пушкин агъа шагьурдиъ хумбарин духттирвел аркьая (шувас ушуна. 2 шиникквара хъая); 2-пе руша (Къизтамама) 2017- пе иса Санкт-Петербургдин фармацевтический университет ккиркIуна, гьетисаъ медпредставительвелдина провизорвелди кар аркьая; кIиркIа, (Руслана) гьетисаъ Военный железнодорожный академи ккиркIуна, агьал военный офицер (капитан) э; бицIи руша (Гюльнарайи) Къизтамама суман фармацевтический университет ккиркIуна, 2021-пе иссалас мич Нижневартовск агъа шагьурдиъ провизорра э, аптекайин заведующийвелди кар аркьая. Джаллабур ппара иджеттар э агъай ттур ая мебурин Новоульяновскдиъ.
Зинаидайис джандин сагъвелна йирквуран сакинвел кам дахьурай агъая уч яшамиш вея хIуринттари. Чин че ппаттаъасра агъая, нандиъ аячира агъуларин халкьдин ттур вартт хьурай.
Тамам Рамазанова
