Учис дарсар кии мегIелимариласс кIил гьадикIу мегIелим. 2020 исан 15-пе марти Алена Абдулгалимовнайи хабарар гъуршанди, Заира Рамазановнайи джувабар ицIанди, ликIиная репортаж кей уйи хье «Агъуларин хабарар» агъа райондин газитик. Главный редакторди (агьал гл. редактор э А. Абдулгалимовна.) алихьу суаларигI мишттин суал гIай уйи: «Вас дарсар кии мегIелимарикес, фуш э вас чишна хьуна, ве Iуьмурдин рекъ гIаттивагуна кумак хьеф?» «Зас четин э гьинан ичира сайин ттур фацуна, гIаттивуна, пас. Гьер са мегIелимди учифас вередегьен алучIуна, учин кар аркьайи. Амма ке Iайи зас кьабул хьеф че классный руководитель, физкультурайин дарсар килан Исмаилов Юрий Гусейнович и. ЙиркIвуралас вейдава сасрабура: Омар Кубаевич — час математикайин дарсар кийиф, Iуьрус дарсар килан -Тамам Исрафиловна. Гебурин методикабур зе дарсариъ зунра ишламиш аркьа.
Чухсагъул пас кканде зас джалла час дарсар киидегьен мегIелимарис,»- пунa, джуваб йини Заира Рамазановнайи. Гьал ягIа зас мис учис чухсагъул пас кканди ая, учик кея умуд атIас адатуна, Москвайиъ ттур ая — Заира -мегIелимдис. ЙиркIвурал акьасе михъас: Вагидова (Рамазанова) Заира хефе Дагъусттандин, Агъул райондин Т
ипигъарин хIуриъ Рамазананра Хадиджин хулаъ 1978-пе исан мартин вазала. Мебурихъ ме кидай, хъара 4 руш хъая. Джаллабури высший образовани гъушуна, гьертти уч ая кардил иджи лиханди ая.
Чухсагъул хьурай бабар-дадарис чиппин валадарис идже тербия йина, хIа акьуттарис. 1995-пе иса, Типпигъарин махьтаб ккиркIугъилди, Заира Дагъусттандин педагогический университетдин филологический факультедиъ учIуна, 2001- пе иса ире диплом фай ккиркIуне мевус. 
Гьеме иса Заира Агъуларин районойи Гъваарин хIуриди Iуьрус дарсар килан мегIелимвелди гьикуни. Ми иджи кар аркьай агуф, ме завучвелди кар акьас хъучикуне, учив фая Iуьрус дарсара киланди. 15 истти са багьанара кидикIагъилди кар акьуне ми мисаъ. Мич шувасра ушуне. 2015- пе иса, айчIуна, учин хIа чи кар аркьая Москвайин 2120-пе махьтабихъ хъая садикдиъ воспитательвелди кар акьас ушуне. Садикдиъ кар аркьай, бицIи мегIелимарин курсар ккиркIуне. Агьал гьеме,2120-пе, махьтабин бицIи классариъ кар аркьая.
«Гьеме махьтаб Москвайиъ ке иджеф хIисаб аркьа зун. Че махьтабиъ ке иджи, чаб чиппихъй дуьхьуьна, кар аркьа мегIелимар ая, ке иджи, фиттин хьичира гъавурдиъ ая зурба шиникквара. Зун кьабул акьу классиъди 28 миллатин 36 шиниккв адине. Ме кар ппара кьабулде зас. Чин гьер са миллатин хIаягъар аркьай ве.
Кьанди чин «Гуни-фиттин хьичира кIил э» агъа хIаягъ акьуне. Ме хIаягъахъди джалла шиникквар, гьерф учин миллатин, кунар аликIуна адина, чиппин бицIи ватандиъ(маккайиъ) гуни аркьагъилди ахъакьуне. Москва — лап хIа, гьер миллатар хъай яшамиш вея шагьур э. ДехIела джаллабур чаб чиппихъай дуьхуьна, яшамиш вей хьичин иджи э. Зе классиъ ая шиниккварис 
чаб гьер джуьре миллатаринттар идеф ягIайдава. Зун шад э ме кардил. Гьеме бицIиттар суман, хIаттара сад суман ай кканде чаб чиппихъай,» — пуне Заира «Вечерняя Москва» агъа газитин корреспондентис.
Ме газитин корреспонденти мифас ме интервью гъушуф, мин гъиликк ккея 4-пе классин 3 шиниккв конкусдиъ финалдиди аттархьуна, Москвайиъ 7-пегелай акьуная Iу чIалан «Билингва» агъаттигI, хьибудари садпе мукьар фацухIела э. Фикьас эгьан пуна, мишттин идже агалкьунар хьунаяф ми дарс килан шиниккварихъ, хабар гъуршандеяф и. Джуваб сад э: мис шиниккварихъай гъургъас, гебур иджи хурас хъучикас ягIа. Мис учин кар ппара иджи ягIа. Мус хьучира Заира Рамазановнайи учи аркьа кар багьана кидикIагъилди аркьаяфе. Мин агалкьунарихъас ягIай, ппаратттари мис чиппин валадар табширмиш аркьа, гебурис
ОГЭ, ЕГЭ ес кумак акьурай пуна. (Репетиторвел аркьа.) Мис кардигьас, фера даркьай, экьвас са дакьикьайира вахтт авейдава. Заира Рамазановнайихъ учихъ 4 валад хъая. Мин хIа кIиркIа Сеченовский мединститут кккиркIуна, ординатурайиъ учIуна, хурая (1-пе курс); Iудпетти, руша, Евдокимован ттур але медучилище ккиркIуна, медицинский РУДН агъа университетдиъ хурая, Iудпе руш 11-пе медицинский классиъ, 4-петти, кIиркIа, 4- пе математический классиъ хурая. Джаллабур иджи хураттар э. Михъ кардилас йинаяттара, общественный курахъас йиная ппара джевизар хъая: 2020-пе иса мис «За новаторскую работу в образовании» агъа медаль йиная, Европейский научныйра индустриальный «Сократ» агъа консорциумдиъ йинаяф.
Гьеме иса хъара Российин Естествознанин Академи «Благодарственное письмо» йине, авала йиная гьер дараджабурин «Почётный грамота»бурна дипломар. Гьер иса, учин гъиликкк ккея шиникквари суман, учира «Билинва» конкурсдиъ, ацIуна сасра конкурсариъ садпе мукьар фарцанде.
КьацIра экьвас вахтт адавайчира, ме хIуридира вей ве учин бабал, хьиджардадал аларуцас шиниккварна шуйра хъай. Чиппин макка хум гьартайдава.
КIилди дуьйин мегIелимарин ХIаягъ нубарак хьурай учис, хъара ппара агалкьунар хьас джандин сагъвелна йиркIвуран сакинвел кам дахьурай учинра, учин хизандин, валадарин амеде багу-кIилинттарин. Дуья сакинхьурай. Джалла инсанари сакинди чиппин валадар хIа акьуна, мурадар бегьем акьас.
Тамам Рамазанова
