8-пе сентябрьди джалла милатарин чIаларин хIаягъан ягъа зун аттушуне куьчайиди, гьучархье инсанарис са суал алихьай: «Чвас чвае валадар фи чIала гъургъай кканде?» Садпе гьучархьеф Шабанова Загьра и. «Фие вун агъаттар? Кибашттан, че чIала гъургъай. Учин чIал дагIа инсандис учин багунттар, ватан кканвев?» — пуна, джуваб йине ми зас.

Рамазанова Фатимат Курбановнайира жуван чала гъургъай кканде пуне. Хъара сасра инсанарира са джуваб э еф. Хаб ушуне Закир Ибадуллаевичалди — Типпигъарин хIурин хIаттилди. Мисра ме суал йине зун. — Четин суал алихьа вун. Гьер инсан учин бабар-дадарин чIала гъургъай кканде. Амма агьал зас куьчайиъ шиникквар гъургъай унихьаф Iуьрус чIала э, гебьурис хье чIал ягIай дава,- пуне ми зас. — Ве хияларикес, фуше тахсир идеф ме кардин? -Ке удигьай хулан хизанар, хабди садикдиъ кар аркьа воспитателарна, нянкабур, махьтабиъра переменабуриъ жуван чIала гъургъай кканде. Амма, бабари ицIандибицIиттаривди тилифанар, ахъихьай телевизордиъас Iуьрус чIала гъургъа мультикар, кьацIра жуван чIала гъургъайдава. Агъул чIалан сесар гъатIилкIанас вейдава. Гьегиштти хIавей, жуван чIал дагIай илгванди ая.

Махьтабиди адегунара шиникквар жуван чIалалди гаф пегуна, гъавурди адархьай, Iуьрус чIалалди пуна, е гьеге зад агвар аркьай э гавурдиъ ихьаф, гафунин мегIна ягIар аркьаф. Хизанар дагъургъай хьичин, фера акьас хьасттава гебурифас. ХIефттайиъ гьер са классиъ аяф 2 сеIэт э. Хурас ягIар акьас китабар адава, адайчира хIилла-чарабур аркьа мегIелимари. Фидегьен гагьди китабар адихьасе агъай, адихьуна, шиниккварин гъилив мус агвасегьан? КIилди райондиъ яшамиш вея халкь сад хьуна, китабар адихьас кумак йина кканди ая. Закир Ибадуллаевича гаф йине учра ме кардихъ хъучавесе пуна. Ппара муш кея: кIилди халкь савусал хьичин, кар арайил хьасе пуна.

Тамам Рамазанова