Курбанова Сабина Магомедовна хунафе Типпигъарин хIуриъ Гъудгъул Мехемаданна Типпигъарин ЦIеевазан хулаъ 1981-пе исан 3-пе августи. Ме бицIи ами бабар, мена мин чура фай, айчIуна ушуне хIуриъас. ХIахьуна, махьтаб ккиркIугъилди, шувас ушуне (1998-пе иса) ме Тюбейиъас Шамхалдиди.
Сабина махьтаб иджи хуруна ккиркIуф (мин ишкил гьемишан «Доска почета»-йик кеяфи). Мин ппара гIешкъ аяфи бицIи духттирвел акьас. 2009-пе иса Сабина, хьиджардада: « Ях вас хурас кканди аявусаъди: «хурас мусра кьана дава»,- пуна гьикуне хурас.
28 ис хьехаб, 4 шиникквара хъай (3 рушна са кIиркI), Сабина учIуне Дагъусттандин Аскерханован ттур але ХIуькуматтин медицинский колледждиъ, 2013-пе иса Ире диплом фай ккиркIунара э.
Тисаъ хурай аядегьен гагьди, мин хьиджардадана хьиджарбаба кумак акьуне мис. Дасарин Хадад-Сабинайин хьиджардад-учра хуру инсан и. (Ми, Гадад Гададовича, Типпигъарин махьтабиъ трудин дарсар киланди ай, Шамхалдиди хизанар хъай ушуф и, тисаъ махьтабиъ кар акьуфе, пенсиди айчIвасттегьен. Сабинайин хьиджарбаб- Маликарин ФаIтима- ги пунайде чIалал рази и).
Сабинайис ламустти и хуравусаъас чIирхIе кьимат фай хулади адес.
«Гьер гелай хулади адегуна: «ягIа фи кьиматар файдине вун?» агъайи зас хьиджардада.(Те захъай хураяф суман уйи). Ппара кканди зас тин гъиливди зун хуруб ккиркIуне агъа диплом фачиянас. Амма зе хуруб ккиркIвас са ваз ами те кичмиш хьуни. Те ягъ йиркIвурал хьегуна, ппара дард вей вя зас: ти учин хулан циликес зе ишкил кейхьуна уйи, колледждин «Доска почета»-йик кеяф суманф. Зун че группайиъ яшанинди ке хIаф и, дехIела староставелди гIаттивуна уйи. Хурас четин давуйи зас, гидегьен хизанарин даягъвел аргваягуна».
2013-пе иса, хуравус ккиркIугъилди участковый медсестравелди кьабул акьуни Дагъусттандин Шамхалдиъ ая ГБУ -йин 7-пе поликлиникайиди. Учи аркьа кар йиркIфай аркьахIела, 2016-пе исан хаб ме поликлиникайиъ Старшая медсестравелди кьабул акьуне. Шамхалдиъ яшамиш вея зас ягIа инсанари: «Ппара иджи кар аркьа Сабинайи.- агъа,- Мис фи суал алихьучира, хIа духттирас суман, джуваб йина, кумак аркьа».
Шиникквар хIахьуна, са руш шувас ушуная мин, гьал михъ садикдиди вея хуттул руш хъая, Iудпе рушан цIакIинар акьас хIезурвелар аркьая.
ЙикIвуран идже хияларихъ хъчатурай учра, учин хизанара, хье агъул халкьдин ттур ахтт хьас адартай кар аркьаяттин. Джандин сагъвел, йиркIвуран сакинвел кам дахьурай хье инсанарин, дуьнья сакин хьурай: багайин ягъахъас сайисра гучI девегъилди яшаиш хьас хьин джаллабура.
Тамам Рамазанова
