Ахиран исари гIедат хьуная ватандин иджвел бадалди акьуна ккане иде дава курарихъас гъургъуна республикайин хIатти Халкьдин Собранис гьер иса посланибур гьикуб. Ме посланиъ аркьа гьер багварин ахттилатар. Гьемиштти ттиъра магьа къана ерчIудпе майди Секргей Меликова учин ахттилатар акьуне.
«Гьер иса гъаре Посланин ахттилатаригI республикайн аваданвелдин ке лазим суалар гIаттивай ве. Удигьгелай гIаттиву суаларин са пай михIелдис кардик киме. Хье ке хIа вазифа э СВО-йин ишттаракчибурис хьудегьен иджвелин шартIар арайил акьуб, мебурин хизанарис гьер багухъас майил йиб», — пуне республикайин хIатти, ме послании хъучучIай амий.
Региондин хIатти кIвал акьуне дагъусттанагьлибурин кьимат адавадегьен джафайихъас СВО-йиъ. Джуре исарихъ хъуттурфуна, алттушу иса экономикара 6% вартт хьуная пуне. Дагьусттан гIачархьуная нацпроектар арайил акьубан рекъуьас ке удигь гьая 15 региондин хIисабаригI.
Ме кардихъасра Сергей Меликова пуне РД-йин Халкьдин Собранис гьикая посланиъ. Кар акьас кканеттис кIилди иджвелин шартIар арайил акьуна ая!
Джалла читинвелар санапуна арайил акьас верефттава, амма гьер са дагъусттанагьлис агуна кканде аркьа кар, гебур арайил аркьагъилдира. Сергей Меликова пуне акьу кардис ирцIан кьимат хабра ахттармиш акьуна кканде, джемеIетин фикира час багьа э.
Сергей Меликова «Зеленая улица» агъа проект кIили файшуб гьучихьуне, ме налогарин къанунил йиркIв алийибахъас э. Ме кардикес кумак хьасе Дагъусттандин налогарин дуз рекъ гъас. ЯгIайин ягъа налогарин бурдж 340 миллионилас вартт ая.
«Ме кардин кьайдабур лап мерIериас духIуба акьуна кканде. Джалла ариш-варишарин, мукьарин цифровизация акьуна кканде. Миштти акьучин, алгъузуттаригьас са хайира джин акьас хьасттава. Налогарин пул ппара завал акьас хьасе», — пуне Сергей Меликова.
«Дагъусттандин экономикайин сиясатиъ майил йис эхIттиб хъая ариш — варишдин рекъерикес сад э багъар бусттанарин курар. Фас пучин, ме курари региондин кIилди натиджабурин гIуьфу пай фарцанде, джемеIетин хьибу пайунис курара ирцIанде», — хъара хъучихьуне Сергей Меликова. Сергей Меликов гъургъуне Дагъусттандин дагъдин районариъ цIае махьтабар акьубан программайихъасра. Хье вазифа, суван районарик цIае кIилиластти джан кихьуб э», — агъа региондин хIатти. Региондин хIатти фикир йине ке гъам хьас аркьая Каспий хIуьлинкъерехарисра. Сергей Меликова тапшурмиш акьуне РД-йин Правительствойис тегIде хIелди хIуьлин къерехиъ аядегьен хулар, джигагьар ахттармиш акьуна, мебур къанунин дузвелилди акьуфна дакьуф ягIар акьуб. Ахиран исари 62 километри рекъуькес акьуная якьу полосайинф. Хъара фикирдиъ ая 100 километри сара IирIе акьас.
Миштти хьухаб хъара идже хьасе рекъерин курар, машинарин сад сайихъ гъузубра хьасттава, вере усариди дахи рукьасра э. Хъара идже э аварибур дахьеб бадалара. Сергей Меликова ахъакьуне ме иса хъучучIуна региондин «Продолжитетельная и активная жизнь» агъа нацпроектин программайилди арайил акьу ерчIу проектихъас, хъара «Семья» агъа программайилди арайил акьу са проектихъасра. МисагI гIая гьер багвар, здравоохраненин модерниз акцихъас хъучучIуна йиркIуран итталарин, онкологический итталарин, сахарный диабетин, тегIде кумак лазим идеттарин, хъара здравоохраненин цифровизацихъди рукьуна», — пуне Сергей Меликова. Дагъусттанди арайил акьасе ху чIалар ухIуб бадала госпрограмма. Сергей Меликова гIерз акьуне, ппара миллатар ая республикайиъ мишттин программа лап лазим э пуна.
«ЯгIа хьес аргвая инсанар вей-вей чIукь вереф, мебурихъай гьерттин чIаларилди гъургъубра чIукь ве. Гьеме кардихъ хъуттурфуна зас хIуькуматин программа арайил акьуна ккандий аргва, Дагъусттандин чIалар афухIуна авадан акьас», — пуне региондин хIатти. Ме программайигI гIахьасе гьер джуре рекъерин мугьлатар махьтабиди вестти ху чIал ягIар акьас бицIи шиниккварис. Ппара фикир йисе Дагъусттандин чIалар джуре регионариъ ая ватанагьлибурисра хум давес. Сергей Меликова посланиъ акьу ахттилатар бадалди акьуне прессконференцияра. Дагъусттандин хIатти суаларис джувабар йине. Ме суалар алихьаттаригI гIахьасе пресс-турдин рамкабуриъ ай республикайиди ади, джуре хIуькуматарин журналистара. Пресс-конференция хъучучIастти ишттаракчибур журналист Алик Абдулгамидован фикир ухIас са дакьикьайи буIуне.
Салихат Малагусейнова
