ЦIеIудпе май медсестрабурин хIаягъ э. Хье чIалалди мебур бицIи духттурар э. Сагъламвелдин рекъуьъ кар аркьая пешакурарин хIа пай бицIи духттураре. Гьер са кьит пеша барамбар э духттурвелдин лазимвелдихъай. Ме пешайин кIил э гIегвалвелна рехIимлувел хъахьуб.
Духттурвелдин пеша гIаттиву инсанди «Клятва Гиппократа» агъа чIал йина хIаву фарцанде итта инсандис чиппифас аттрукьадегьен иджвелин кумак акьасе пуна.
Зе фикирдилди, фидегьен хIа чIал йичира, хIав ккедава, йиркIурахъ хIейифна гIегвалвел хъудава инсандифас ме чIал кIили гъас хьасттава.
Фидегьен ппара гIилми ягIа, хIа духттур хьучира, михъ учин кардис хъуьдухьу медсестрара хъаве. Ме медсестрайин ягIарвелдиласна таджрибайиласра ппара курар асуллу э.
ЯгIа зун ахъакьасе гьемишттинрехIимлу, имунин, гIунарихъ 40 исалас вартт кардин таджриба хъая медсестра дишагьли Абдуллаева Лимунат Давудовнайихъас. Лимунат Давудовна са агъзурна ерчIу вершна ерхьцIурпе исан цIехьибудпе сентябрьди Агъул райондин Гехъуьнарин хIуриъ Давудна Сабират Рамазановарин хизандиъ хуне. Хабди мебур айчIуна ушуне Азербайджандин Баку шагьурдиди. Мисаъ ме ушуне сагелан садикди, хъабди махьтабиди. ГIуьфудпе классилдегьен хуруна мебур хаб айчIуна адине чиппин ватанилди.
Дада мебурин, Рамазанов Давуд Рамазановича заочно Сельхоз институтиъра хурай трактордихъ кар аркьай уйи, баба Рамазанова Сабират Абукаровнайи кар аркьай уйи махьтабиъ поварвелди.
«Баккуйиъ яшайиш чIирхIи давуй че. Амма фас ичин дадас кканхьуне адес учин ватанихъди. ХIуриди ади вегIдайи зас бицIиди читин хьуне ху чIал дагIа хIела. Са исалас бицIиди дехIера арайил алчархьуни. Баба хIуриъра учин кар давам акьуне, дада сагелан колхоздин председательвел, хабди бригадирвелди курар акьуне.
Гьелбетта гьате вегIдайин джалла шиникквари суман чинра хулан курарис гъил гьучихьайи. Ке читин ий засра зе хIа ччуччус. Аркьая цIае хуларис гъван гъайчира хъучаркьайчира ке удигь гьавей и чин. IуькI агъучIугуна гьер ягъа файдина кканвейи Iуьрджанди икIуна са шишал IуькIерин, кIурарин дучар, нецIухъ дада завал аркьаф и гъванар, хабди чин гебур хъархъай гъарефи хулади. Хъай уй чахъ гIуьфуд хIуьнивар аме чIире малар кидавай. Мебур багайми баба узучин гIуьбехъми зун узайи. Иса са кьвадилкьванра акьафи, мисахъра шиберин кумак лазимди авейи. Аме хуларин мерттхьун, Iуьччуб — чIирхIубарихъас зун гъургъасра кехIей дава.
Муядпе класс хIуриъ ккиркIуна зун адине Типпигъарин махьтабиди хуруб давам акьас. Те вахттуни махьтабинра интернатин директор и Манафов Манаф Манафович. Ппара джувабдар инсан и ме. Воспитательница ий че Ума Рамазановна. Гьер сайин гъавурдиъ архьай йиркIуранра идже учительница ий мера.
Зас дарсар йи мегIелимара йиркIураъ аме зе. Мебур: Айша Багаудиновна, Манаф Манафович, Гасан Гаджиевич, Али Гамидович, Низам Гамидович, Муслим Мусаевич, Тимур Магомедович, Тамам Рамазановна, Фарида Акимовна, хъара джуреттара. Ппара идже, гIилмийи гIан ацIу мегIелимар и мебур. Чиппин гунагьарин гIефу акьуна, джаннатин гIанаъ мукьар хьурай», — агъай двегIебур аркьай кIвал аркьа Лимунат Давудовнайи те вахттар.
Махьтаб ккиркIуна ушуне ме Дербент шагьурдин мед училищейиди, бицIигунахъас мич учин Iешкъ ая кардис хIезурвел акьас дишагьлибурин духттурвелдин курсариъ учIас.
Хуруб ккиркIуф адина кардил хьуне Агъул райондин больницайиъ женконсультацин акушеркавелдира смотровой кабинетиъра. Хьибу — якьу иса кар акьуна шувас ушуне. Хабди учин хизандихъай айчIуна ушуне Махачкалайиди. Са гIуьфу иса кар акьуне Центральный Перинатальный родильны домдиъ. Хаб адине мебур чиппин бицIи ватан иде Агъул райондиди.
Мич адихаб ягIара кар аркьая Агъуларин ЦРБйиъ.
«Кардилди зун кьабул акьуне Джамалудин Гаджиевича. Хабди зе кардин рекъуьъ мисаъ духIуба хьуне главврачар: Раджаб Алиханович, Закир Зулкаидович, Рамис Нажмудинович, Магомедзагид Закирович. Мебурис кIилдибурис лап йиркIурастти чугъсагъул хьурай, кIиттарин мукь джаннатиъ хьурай аметтарин джанарин сагъвелар хьурай ватанагьлибурин сагьламвел бадалди хъара зейдайи кар акьас», — ахъаркьа ме.
Лимунат Давудовнайихъ учихъра хъая гьеме главврачарин багухъас чугъсагъуларин кIеджарна грамотабур.
Сара фера дахьучин, коронавирус хьу вегIдайи диву загьмат хьурай мебури.
Учин хизандиъ хьуне мебурихъ хьибуд шиникквар: Iу рушна са кIиркI. Мебурис тарбия йина дуз рекъ агвар акьуна, гьерттис учин Iуьмурдин пешайин, хIа гIилмин дипломар йина, цIакIин акьуна гьерф учин хулан хизандин эессибур акьуне мебури. Хъая михъ ерчIуд хуттулара.
ЯгIа хизан кIина гIуьфу исахъ хъучархьая. Ачавей аттвей учин кардил вей хаб вей учин хулаъ ая ме. КIиркIа шибери чиппихъди багу хьас шагьурдиди шаб пучира хулаас найичра вес ккандава.
ХIа шадвел ве мис учихъди валадар хуттулар гIаттиб.
Хьин больницайиди вереф иттархьугуна э. Шадра ве сагъ хьугуна. Амма гьеме хIуьлакди ая вегIдайи кIвалас ве хьес кумак аркьая духттурарис чугъсагъул пас, мебури гьер ягъа дивая загьматихъас.
Чиппихъас джандин сагъвел, йиркIурас рехIет кам дахьурай. Хъара кьуват йирай ацIуна исари иджвелин кар давам акьас.
Салихат Малагусейнова
