Гъалибвел агъа чIал хьес ппара багьа чIал э. Ми хье зурба хIаягъас лайикь гаф э. ГIедат идегъилди ме исара шадвелилди къаршиламиш акьасе ерчIудпе майди хье Ватандин ХIа дегIвин Гъалибвел гъушу ягъ. Ттиъ муйцIур исан юбилей э ме хIаягъан. 1941-пе исан июньдин вазалан 22-пе ягъа, хье Советский Союз агъа азман хIуькуматил хIа бала алчархьуне — хабарсузди Iекв вере арайи хьеал душманди гьужум (нападение) акьуне. Фашистарин Германия агъа хIуькуматин хIатти, Гитлера завал акьуна учин къушумра Iуьшан багамис фиттикесра хабардавай гъархьу инсанарил цIа угъуне.
Ул ачатухаб, баджат ая ме дегIвин гъамна дард, къакъ алдава хизан, михъас хабар дахьу вилаятин мурттра кехIей. Гьер са инсанди, хизанди учин дард чиппин несиларилди фачиланде. Чиппин алгъархьу джигьиларин йиркIвариъра амилгурай пуна хIададар — хIабабарин загь матар джафабур, гъалибвелдин рекъуьъ пуч акьу джигьил Iуьмурар. Ме курар йиркIураъ ухIучин, ягIай амилгванасе мебурис гъалибвелдин кьиматра. Мус хьучира дегIвибурин кар инсанарин Iуьмурар фаттивуб э, амма Ватандин ХIа дегIви ппара къатеф хьуне. Мисаъ кIиттар, гулуттар кедавай, джан алмичира ватанилди хаб адес дахьуттара ацIуна хьуне. ДегIвиъ иштараквел акьубан шартIара зурламабур и. Хье хIаф иде И.В.Сталина йина уйи буйругъ, фишттин цIа завулас угъучира, удигьас адичира, хабкIила са эскердинра лекун кьадам дахьурай пуна. Нагагь гьишиф хьучин, чиппи димари йирхIуна луькIей и. Хъара четин и эскерарин хIел немцарин есирдиъ архьучин. Мишттарис есирдиас гьишичира чара адавуй. Гьишина адеф хьучира, хIуькуматис хиянаткар э пуна дусттагъариъ ачикай и.
Са багулихъас гьемиштти цIуппи дагъузучин, хьин гъалибвелдин эессибур хьасттавуй. 1945-пе иса 9-пе майди душман ккедихьуна дегIви ккиркIуне, хье халкьди гъалибвел гъушуне.
Ме ягъ хье ватанагьлибурин лап зурба хIаягъ э.
ЯгIайин ягъанисра аме инсанар чиппин багу-кIилар джикIесегьан пуна руцаттар. Сурис джиркIендира э. Мебур э дегIви ккиркIухаб есирвелдиас азад хьуттар. Хаб чиппин хулариъди адес дахьуна, джуьре хIуькуматариъ бина ккийина экьуттар. Гьерф уч ая усаъ сагъ саламат хьурай.
Хьевас акьас вере курар ппара ая. Амма ме кардин рекъуьъ садпеф э, гъалибвел хум гьадатуна, хьехъас джанар алихьуттарин джафа гIачадатуна, чиппин Iуьмурар йина хьес гъалибвел гъушу инсанар батIар чIаларилди йиркIурал акьуна, гебурин хIуьлмат ухIуб. Дуьнья ислехI хьурай, те вахттарин четинвелар, гIезабар эмкIерикесра дагурай!
Салихат Малагусейнова
