Дагъусттандин Народный Собранин сессил хье премьер-министр Абдулмуслим Абдулмуслимова агвар акьуне республикайин правительствойи 2024пе иса акъудегьен курарин отчет.
Ме хабар акьуне гьер рекъериас хьудегьен агалкьунарихъас, кIвал акьуне миллатарин проектар арайил акьас фатудегьен федеральный пуларин 99% дуз рекъуьъ ишламиш акьубахъасра. Региондин промышленный производствойин индекс хьуне 101,8%, валовой региональный продукт (ВРП) алтухъ хьуне 1 триллион манатин, ме агъа чIал э 2,8% вартт хьуне пуна. Региондиди инвестицибур алтухъ хьуне 8,3%, буюджетин налоговый неналоговый доходар вартт хьуне 17,2%, кIилди са усал акьугуна 66,7 миллиард манатин.
Экономикайин реальный сектордин майилдин кьадар хьуне 4,2 миллиард манат. ХIурин магIишатин натиджа завал акьубан кьадар 252,3 миллиард манат. Мелиорацин рамкабуриъ ай арайил акьуная 11 агъзур гектар джилин, 1000 гектардилас вартт джиларил ккийиная багълар, мебурикес 17 гектар суварин районариъ э, тIибитIар завал акьуне 301,5 тонндилас вартт. Хьибу исан арайиъ хъуттурфуна ме 26,7% вартт э.
2025пе иса фикирдиъ ая багъ — бахчайин сурсатар афухIас ругъу джигагьар 55 агъзур тонн ухIас вередегьен хIа акьас, хъара хIурин магIишатин курар аркьа техникабура са миллион манатинттар хъара гъушанас.
Энергетический сектордиъ батIар акьуне 813 трансформаторар, 267 километр дегьен высоковольтный синара. Хъара арайил аркьая хьибуд ппара лазим иде проектар зеленая энергетикайин рекъуьас. Мебур э: Новолоакская ветряная электростанция, Дербентская хъара Ногайские солнечные электростанцибура.
Экологин мертхьунин рекъуьас гъургъучин, исан ахир верегунас кардик кихьасе хьибуд чIирхIар тич — мич гIаттирхIа комплексар. Ме комплексари мугьлат йисе 930 агъзур тонн чIирхIар гIаттирхIас. Хъара давам аркьая арайил акьас хьибуд чIирхIарин полигонар. Мертт акьуна ккиркIуная Анджи агъа Iуьр.
Сагъламвелдин рекъуьасра «Земский доктор» агъа нацпроектин рамкабуриъ ай кардин эессибур акьуне 147 хIа духттурар, 30 фельдшерар, хъара 70 агъзур инсандис йиная гьавайин дарма нар. Хъара больницабуриди гъушуна уй 733 единица лазим иде оборудованибур, хъара санитарный улакьар.
ГIилмин рекъуьас алийине 22 махьтабар 8118 мукь аяттар, 11 садикар 1540 шиникквдис мукь аяттар. 700 вартт ЕГЭйин ишттаракчибурис гьава баллар хьуне, 200 агъзуралас вартт школьникарис ибгIа ямаг ирцIанде.
Социальный сферабуриасра 4,8 агъзур хъитIуная социальный контракттар 936 миллион манатин, хуларин шартIар иджвелихъди хьас йиная 101 сертификатар. Ппара шиникквар хъая ерхьи хизандис йиная машинар. Культурайин сферайиъ арайил акьуная хьибуд модельный библиотекабур, батIар акьуная ерхьид дом культурабур, йицIуд гIилмин идарабуриъ ихьуная макьамарин деликар.
Мебур кедавай, Дагъусттанди гьикуная 22 агъзур тоннайилас вартт гуманитарный кумак специальный военный операциди. Хье республикайи лап батIарди майил ирцIанде СВОйин ишттаракчибурис, гебурин хизанарис, социальный контрактарилди, компенсацин харджарилди жилищно-коммунальный услугабурис.
Салихат Малагусейнова
