Хье хIуькуматиъ ахиран вахттари башламиш акьу программайилди гьер регионариъ арайил аркьая цIае махьтабар. Ме махьтабар арайил акьубан программайин кьастт э мехIкам гIилми гъушанас джалла шиниккварис сад суман мугьлат йиб, цIуьре махьтабар цIае акьуб ачухъвелар алтухъ акьуб хатIасузвелар ухIуб, махьтабариас хьибу смена гьаттивуб. Гьеме программайилди гIилмин идарабур арайил акьубан, цIае садикар ачмиш акьубан рекъуьас Дагъусттан садпе мукьуйиъ ая. Ме программайин санаригI гIачархьуна уйи Агъул районра. Алттушу исан августин вазала Агъул райондиди адина уйи Дагъусттандин Правительствойин Председатель Абдулмуслим Абдулмуслимов. Ме маслихIет акьуне Агъул райондин Типпигъарин хIуриъ алиянас цIае махьтаб.
Мисаъ ая Iу мартабайин махьтаб акьуна ацIуна исар э. Гьалдин иджвелин шартIар, ибгIавеларин ачухъвелар кIилди бегьемди адава.
Гьелбетта гьемишттин курар гьер са райондин хIатти фикир дайихаб арайил акьас хьасттва. Фас пучин, гьер са райондин читинвел гьемисаъ яшамиш вереттисдала ягIай ахьасттава. Зе фикирдилди хье махьтабин читинвелара Закир Каидова хье хIаттихъди рукьас акьуне.
Гьеме хIефттайи, 2025- пе исан 24 мартти РДйин Правительствойиъ хьуная совещанил Абдулмуслим Абдулмуслимова гъадивуне Агъул райондин Типпигъарин хIуриъ социальный объектар арайил акьубан суал.
Сифтта премьер-министр гъургъуне цIае аркьая 300 мукьуйин махьтаб хIезур акьубан проектихъас.
Ме кардихъас Абдулмуслим Абдулмуслимов гъургъуна уйи алттушу иса, кардин рекъуьас Агъул райондиди уч ади вахттуни Ме Дагъусттандин Минстройдис буюрмиш акьуна уйи, райондин администрацира хъай маслихIет акьуна арайил акье пуна социальный объектар гъадивубан суалар.
Ме объект гъадивубан проект арайил акьастти РДйин ГКУйин «Дирекция единого государственного заказчика-застройщика» агъа идарайин пешакурари адина ахттармиш акьасе райондин администрации объектис кичихьуная джил.
Ме мегIракайин ишттаракчибурира хъуттурфуне джигагь гъадивас хIезур акьу джилин багулив хIуькуматин улик ккея культурайин ирс ухIая объектар гьайчугакьас. Хъара хьеттин зонабура айчугакьас.
Наибет Гасукаева
