Дагъусттандин Минобрнаукайин пешакурари джигьилар экстремистарин, террористарин кIватIаларигI гIачадархьас, мебурихъай эхIттиятин, тематический дарсар гъая. ЯгIайин ягъас ме рамкабуриъ ай — , Дагъусттан Республикайин гIилминра наукайин министерствойи гьемишттин дарсарин мегIракабур давам аркьая Буйнакск шагьурдинра Буйнакский райондин махьтабариъ, хIа гIилми хура усариъ.
Ме кардин кьастт э, гьеме кIватIаларигI гIачучIубан, терроризмдин фикирар гIачихьубан, мебурин кардис пуларин майил акьубан джувабдарвел ягIар акьуб. Пешакурари батIарди шиникквар гъавурдиъ архьагъилди ахъаркьа мебурис, фидегьен хIа хатIа кейчин «хIекьвелдинра», «игитвелдин» ттурарикк джин акьуна чиппигIди джигьилар гIачадивай, мебурис чIире рекъ агвар аркьаттарикес. Зарара Iари сад Iу инсандис дава, кIилди хIуькуматис, джемеIетис, бат аркьай мебурин Iуьмурарна кьисматара.
Ке ппара фикир йина кканде гIерчIве инсанари аркьа ахттилатарис, мугъатти гъузуна кканде, унихьу хабарарис, Интернетариъ аргва курарис дуз кьимат йис ягIай кканде, Iайвел акьас ккане инсанарин гъилариъ деликвел акьуна ккандава. Ке хIа кьастт э джигьиларис экстремизмдинра терроризмдин удигь цIуппи гъузас ягIар акьуб, ислехIвелдин кьимат ягIар акьуб, учи аркьа кардин джувабдарвелна ватанперасвел хъахьуб. Гьемишттин мегIракабур Агъул райондиъра аркьая. Хье райондин, Миссиарин хIурин махьтабиъ шиниккварис насихIетин ахттилатарин мегIрака акьуне. Ме мегIрака кIили файшуне А. Абаевичана А. Рамазановича.
Мисал гъургъуне: надинжвеларихъас, хасиятин тунтвеларихъас, буш шиниккварил гудж алгъидихьубарихъас, са чIалалди шиниккварин арайиъ ухIуна ккане нуьхIуьбат хIуьлматихъас. Арайиъ хIулмат ухIуб ппара хIа кар э, гьер са суал ширин мез фай, укъубар, гIахъубар, гиранвелар хъудай хIел аркьай кканде пуне мебури.
«Че муш кея гьеме гъургъубари кумак акьасе пуна хьес джаллабурис, хье арабур дусттвелна хатIасузвел хъаяттар хьас. Гьелбетта шиникквдин тарбия удигь кIил акьуна дадалас — бабалас, гьерттин хулан гьавайилас асуллу э. Миштти пучира ягIайин ягъа, гьалдин дуьньяйиъ, ппатталас ппара чIирхIе шартIар ая хасият духIуб аркьаттар. Хьин цIуппи алгъузуна кканде валадарил мебурис ме шартIар итте дахьас. ЯгIа шиниккварис хьин ирцIан тарбия, багагь хье ватандин давамлу э. Фас пучин мебур э хье кегъархьая несилар, ватандин кIилиъ гъузуна тарих лиркIенттар», — пуне Абдуризак Абаевича.
Салихат Малагусейнова
