Дагъусттан Республикайин Правительствойин Председатель Абдулмуслим Абдулмуслимова, РДйин хIаф Сергей Меликован тапшурмишилди региондин лесное хозяйствойин аваданвелдин суаларихъас мегIрака кIили файшуне.
Мисал лесной сектордин аваданвелдин, биологический джуребур ухIубан, республикайин лесохозяйствойин манзилар алтухъ акьубан, дарарин угубар чIукь акьубан суаларихъас гъургъуне. Гьеме гьучархьубан рамкабуриъ ай премьер-министрди йиркIв алийине ведомствойин хIаф иде Вагаб Абдулхамидован докладилна мин заместителари, акьу курарихъас ахъакьу отчетарил.
Абдулмуслим Абдулмуслимова лесное хозайствойин аваданвелдин лазимвелдихъас, нормативно-правовая база цIуппе акьубан рекъуьъ гьалдин технологибур ишламиш акьубахъас ахъакьуне. «Дар — ме хье джаллабурин девлет э. Хье вазифа э ме ухIуб, мин манзил алтухъ акьуб. Ме кардин рекъуьъ хьин гьертти учифас аттрукьа кар акьуна кканде. ЯгIайин ягъа, республикайин лесной хозяйсттвойиъ хубджи читинвелар ая. Мебур хаб дадивуна хIел акьуна кканди ая. Мебур 2025-пе иса ппара хьу пожарар, дар ишламиш аркьагуна бадил вере читинвелар, алгъузуб, ухIуб, къанунин ахттигьар фадай дар атIуб, хъара ме курарис ачухъ аркьа пул гьудуркIуб», — гьеме ахттилатарилди премьер-министрди мегIракайин повестка дахъуне. 
Докладар аркьаттарин отчетаригI гIай уйи 2025-пе исан «Экологическое благополучие» агъа миллатарин проектилди арайил акьуна, цIае акьу 464-у га джилихъасра. Хъара цIайи ккийи агротехнический уход аркьая 317 га, хъара джуре 1750 га джиларихъасра. Дарарин угубар алтухъ хьубан кар 2025-пе иса, лесное хозяйствойин Комитетин председательдин чIаларилди асуллу хьуне рукъу, куче гьавайилас, гIулин вазари угъалар дугъубалас. Июльдин августтин вазари кьацIра угъундава угъалар. Уга дарарин цIабурар кетубан кар читин ве суварин рекъер адавай агъавас читин мукьариъ.
«ЦIа керхьу усади лазим иде деликар фай алгъавере рекъуьс ачаве Iу сеIетилас гIуьфу сеIетихъди рукьуна. Цlихъай дженг диваттар хьилаба агъаве вартт кIил акьуна, гIунарил алийина хъучIирхIай чиппис Iелеттар, уха хьед, цIабур керта деликара. Авиацилди кетасра гьер са мукь къуллайди авейдава. Фас пучин, хьед завал аркьа ус вархайиъ аве уга усаригьас, цIа уч уьркIе ачIариъ аве, хъара харджара лап ппара ве. Гьеме кардихъ хъуттурфуна фикирдиъ ая Дагъусттандин бюджетилди къакъар гъаре дронар гъушубра. Вершарилди килавар гьадиваттар гъушучин, хьедра, лазим иде джуре къакъара гьикас хьасе уга усади гьеме дронарив фай», — пуне Комитетин хIатти. Комитети планар акьуная видео мониторинг акьас камерабур алиян мукьар хIезур акьубан курар ккиркIвас. Мебур ягъцIуралас вартт ая, чабра батIарди хIа манзилар ккичархьа усар ке ппара цIабурар керхьа мукьар. (2026-пе иса фикирдиъ ая 21,1 млн манатин гъушанас видеомониторингдин системабур), хъара алгъузубарис лазим иде джуре задар, цIабур кертас ишламиш аркьа техникабура (ГЛОНАСС системабур). Лесное хозяйствойин курарин аваданвеларихъас ахъакьуне РД-йин лесное хозяйствойин Комитетин председательдин кумакчи Алимурад Муртазалиева. Ме ахъакьуне дарарин питомникар хьин чиппи узуб фидегьен лазим ичин, региондис мехIкам дар арайил аркьа кьаламар хъучатубан рекъуьъ. Гьер иса 3 гайин манзилил 900 кьаламар дегьен узуна канве угу дарар цIае акьас.
РД-йин лесное хозяйствойин Комитетин председательдин заместитель Салам Абдуллаева чиппи аркьая профилактикайин курарихъасра ахъакьуне джемеIетин арайиъ, мебурис эхIттият ухIубан кьайдабур ягIар акьубахъас. Гьер са инсанди училас асуллу иде кар джувабдарвел хъай акьуна кканде.
Хъара гъургъуне мисал дар ишламиш акьубан кьиматин, административный суаларихъас. Ахирахъди Абдулмуслим Абдулмуслимова республикайин лесное хозяйствойин Комитетис кар авадан акьубан рекъуьас хубджи буюрмишара акьуне.
Салихат Малагусейнова
