«Сохранение, изучение и развитие государственных языков Республики Дагестан» агъа программа арайил аркьая. Арайил акьу кIеджарин вазифа ме кар бадалди майил йиб э Дагъусттандин джуреба — джуре чIаларис, фас пучин, гьеме чIалар надир ирс э хье республикайин.

Программайин кьастт Iари чIалар ухIуб дава, мебур гьер багварихъас аваданра акьуна кканде. Кегъархьая джигьил несиларис чIал ягIар акьас Iешкъ хьас тамашабура акьуна кканде. ЧIалар ухIубан хIа лазимвелдихъас, ме кар бадалди программабур арайил акьубан лазимвелдихъасра пуна уйи учи Халкьдин Собранис аркьа Посланиъ Дагъусттандин хIатти Сергей Меликова. Дагинформдин хIаттин Арсен Юсупован фикирдилди миллатарин чIалар ухIубан рекъуьъ ке хIа мукь фая миллатарин СМИ-бурив. Мебурин кар джан але чIал хIисаб э гьер ягъа загьматилди ишламиш аркьай магьшурвел ирцIанди гьертти учин чIалас, учин миллатис. «Республикайин СМИ-бурин суман хье удигьра гьая джувабдар суал. Ме гьакIанди хабарар агвар акьуб дава, чIал ухIубан кардигIра зурбадалди ишттарак акьуна кканде. Дагъусттандин халкьарин чIаларилди батIар тамашабур акьуна кканде хьин, джемеIети хъуттурфуна мебурис тамаша хьас, джигьиларис чIал ягIархьас. Ме кар дуздин кумак э хье хабдин вегIдайис, хье надирвелна культурайин джуребур ухIас», — пуне Арсен Юсупова.