ГIулин ибгIа ягъар алттархьуфна сад хъучучIа бицIи бицIи мекIер хьас. Угъа угъалар, гъайша кулакар, мункине са са исари сентябрь вазала димари ибхьер угъубра. Дуьньяйин гьавабур духIуба верегъилди инсанарин джандин хIелра духIуб ве. Бадил ве гьер джурейин итталар. Инсанар цулана ппара лирхандира э. Фас пучина Iурд багу вере вахтт э, хIезурвелар акьуна кканве вахттуни. Мал-къара хъаттарис алчархьа хъара ппара курар. Дуьньяйин гьава алзиянде, хулан курар ппара хьуна инсандин кьуватра чIукь ве. Миштти идегуна лазим иде курар вахттуни арайил акьуна кканди айчира, гьер инсан учин джандин хIелдихъра вахттуни хъучушуна кканве сагъвел ухIас, дахьучин итталар гъамаз ве. Ми кардихъас фикир йина кканве хIаттарис суман хулаъ ая шиниккварисра. Иттали бицIиф- хIаф агъайдава иттарве джалла. ХIапай иттар вереттара махьтабариъ, садикариъ ая шиниккваре, дехIела эхIттият акьуна кканде джаллабури. Ме кардихъас хIел- хIел аркьай духттурарира кIвал аркьа, тIалаб аркьа эхIттият акьуна кканде пуна. Хъара агъа джандин сагъвел ухIас ишламиш акьуна кканде хайир кея сурсатар, ухуна кканде джандис лазим витаминар. ХIапай мишттин тIалабар духттурари аркьа хьидана цулана. Нагагь са инсан хулаъ иттархьучин джаллабурис кедиша грипп агъа иттал. Ахиран вахттари итталарин гудж вартт хьуная. Авала суман хулаъ аркьа джерехIвеларикес кумак вей андава. Миштти идегуна духттурари тIалаб аркьа вахттуни руб йирхIас гриппинра пневмококковой инфекцин хIаттарис суман бицIиттарисра.
Духттурари агъа чIаларис са чIукь фикир йина джандин сагъведихъ хъучушана канве. Гриппин итталин акьуна ккане эхIттиятарихъас вахттуни руб йирхIубахъас гъургъуне Агъул райондин инфекционный отделенин духттур Ибиева Таибат Рамазановна. Ме хабар йине ягIайин ягъас Агъул райондин больницайиъ гриппин пневманийин дарман ая пуна. ТIалаб акьуне эхIттият акьуна кканде пуна, иттал ппара бадил дахьас. Хабди итталин къадгъабур дахьас. Хъара хабар йине ягIайин ягъас Агъул райондин больницайиъ гриппинра пневманийин итталис ата дарманар Совигриппна Превенар агъаф хъара Ультриксна Квадра агъаф ая пуна хIаттарис суман бицIиттарисра. Инсандин сагъвелдин кьимат багьа э. Гьертти фикир акьуна кканде учихъас суман хулаъ ая хизанарихъасра ухIуна кканде сагъвел. Хизандин сагъвел ухIуб са милат ухIу хIисаб э.
Наибет Гасукаева
