Гьер са инсандин Iуьмурдин рекъ китаб хIисаб э. Ме гьер са китабин тарихна мегIнара гьер джуре э. Гьелбетта, ме китаб, зе фикирдилди, гьер са инсандис уч рухагунас ликIина аве. Мисак кеве гьинан Iуьмур фидегьен ичин, фиштти вейчин. Гьертти учин яшамишдис гунин кьацI фиштти къазамиш аркьайчин. Са чIалалди, Iуьмурдин рекъуьн са дакьикьара кехIей гIадартай нубат хъихьуна хъучаве микес. 30 октябрьди тренерарин хIаягъ хIисаб аркьа. Ме ягъ хьуна ппара вахттар дава, айчира тренердин кардихъ ппара хIа мегIна хъая. Тренер Iари кар дава, ме Iуьмурдин рекъ э. Ме кардин хIавелдилас, лазимвелдилас асуллу э шиниккварин, кегъархьая несиларин Iуьмур. Ме агьал ая пешакурарикес ке лизимф хIисаб аркьа. Мебури шиниккварис батIар тарбия ирцIанде. Фикир акьучин, ягIайин ягъас тренерар Iудпе дад хIисаб э шиниккварис. Сад мишттин зурбадалди шиникквар вардиш аркьая тренерарикес Байрамов Рамазан Исакович э.
Рамазан Исакович хуне Агъуларин райондин Типпигъарин хIуриъ 1979 иса ИсхIекьанра Калиматан хизандиъ. Рамазан кедавай мебурин хизандиъ ая хъара Iу кIиркIна хьибу руш. Джалла учин къаттиъ ая шиниккварихъай Рамазан Исакович ушуне 1985 иса махьтабиди. Хьибудпе классиди агъархьеф учин гIешкъ хьуна ушуне Юрий Гусейновичан гъиликкди дзюдойиди. Ппара гIешкъунис вейи ме спортзалдиди, Iуьшар гIуьбехъер верефи мисариъ. Ишттарак аркьайи учивас вередегьен соревнованибуриъ. Гъуланди ий гьер джурейин джавизара. Махьтабар ккиркIухаб ушуне Рамазан Исакович хурас Махачкалинский педогогический инститтутин физкультурный факультетиди. Хурубар ккиркIуна адехаб башламиш акьуне кар акьас Типпагъарин хIурин махьтабиь физкультурайин мегIелимвел аркьай. Хабди мин дусттари, мин мункинвелар ягIаттари насихIет йине тренервел акье пуна. Сифтта иджи кIил ккиянас кканди адавуй мис, хабди бицIи-бицIи шиниккварин гьунанар аргвай гIешкъ хьуне кардин. Фуш э шиникквдис тренер пуна суал алихьучин пас хьасе алтухъ хIа гафра давай удигь кIил акьуна ме Iудпе дад э пуна. Фас пучин, барамбарди дадахъай минра фикир аве учин гъиликк вардиш аркьая шиниккварихъас. Гьер са шиниккв вардиш акьуна арайил алчархьагунас са халин вахтт кканве. Аве бицIи амий димари дире шиникквара. Мишттинттарихъай кар акьас джурейи гIешкъ ве. Аве бицIи суман ккулинвелар аркьаттара, фиштти ичира гьер са тренердин вазифа э шиниккв адехаб мин гIешкъ верегъилди вардиш акьуб. Ке удигь кIил акьуна алгъузуна кканде шиникквди Iелеттилра ухаттарилра. Авал вахттари ме кардихъас алтухъ читинвелар адавуй, агьал Iайи ппара сагъвелдис зарар ирцIан задар ая шиниккварис.
Сайи акьуф сасрайис кканве, дехIела мебурихъай ягъди гъургъуна кканве иджвеларихъасра Iайвеларихъасра.
Тренер — психологра, мегIелимра, хъучмара, багунфра э шиникквдис. Зун ягъди агъафе шиниккварис гъалибвелар гъушанас дахьучира ке удигь кIил акьуна инсанвел, идемивел кей тIушуна кканде пуна. Ме Iу шартI фадавай чве гъалибвелара агвасттава пуна».
«ЦIеерчIу истти тренервел аркьай иджвелара, читинвелара алчархьуфе. Хъай шиникквара зун Россия идедегьен аруцуная гьер джурейин соревнованибуриъ ишттараквел аркьай. Машинар чIирхьуна рекъериъ гъузубара хьуфе, хъара джуре читинвелара алчархьуфе, амма зе гъиликк ккея шиникквди гъалибвел гъушу вахттуни, кIилди дунья гъушуф дегьен йиркIв гьава ве. Ме арайи шад хьeбагьас фера читинвелар, алчархье курар кIвалди амилгвандава»- пуне Рамазан Исаковича. ЯгIайин ягъас мин гъиликкес ушуная цIегIифудар дегьен несилар. Гьер са шиникквдихъас мин иджвелин фикирар э аяф, гьерф сад суман багьа э мис. Ппара хIа чугъсагъул агъа Рамазан Исаковича райондин хIаттарисра, шиниккварин дадар бабарисра, меценатарисра учин кардин рекъуьъ майилна кумак акьунаттарис. Рамазан Исаковичахъ хъая хизанара якьуд шиникквара, Iу кIиркIна Iу руш.
Луиза Гусукаева
