ГIуьфцIурна Iу истти садсайихъай яшамиш вей ая хизанар. ЦIуьппе хизанар –хIуькуматтин даягъ э. Ме кардин гъвурдиъ ай, хье хIуькуматдин хIатти ая, 2024-пе, ис — «Хизанарин ис» э, пуна ттур алийина ая. Хье агъуларин хIурариъ, Дагъуссттандин сасра миллатарин суман, мус хьучира ппара шиникквар хъай, хулаъ нуьхIубат ай яшамиш вея дуьхьуь хизанар аяф э. Хизанарин цIуьппевел хъучучIаф дибдилас э. Бабар-дадар фишттинттар ичин, гьетебурин шиникквара гьатишттинттар вей вя. Чиппи акьу хизанара гьетебуринттар суман илгванде.
Ведухъарин хIурин Шагьимирданра Сафият Iудара хIа хизанарин шиникквар э: Шагьимирданахъ 2 чуна, 5чи хъая;
Сафиятахъ -2 чуна, 6 чи хъай уйи. Мебур бицIи гунан хаб хъай хIа хьеттаре: са классиъ хуруттаре, Iудара 1952-пе исанттаре. Шагьимирданан дад Пашана гин чу Маджид, дадар-бабар адай, ятумди хIа хьуна, чиппи чиппин кIил аттивуттар э. Мебурис суман, Шагьимирданасра четинвелар агуф э.
МахIачкьалайиъ пединститутдиъ хураягуна, 1972-пе иса хьир акьуф э мис. Хьир акьу иса димари дад кIина, чияр чуппара мин гардандиъ архьефе. Шагьимирдана багами дарсариди вей, Iудпе сменайи кар аркьай хуруна ккиркIуне институт. Учи кар аркьай (хIуриди адехаб) чияр чуппарира хурас акьуне, уч дад суман кIилил гъузуна. Сафиятана Iудари тебурис хизанара акьуна арайил акьуне. ( Мин МехIемадхIанифа агъа чу – МахIачьалайиъ Научно-исследовательский институтдиъ кар аркьая. Ме кандидат сельско-хозяйственных наук э. Сасра чу-МеIемад-Вали-_Санк-Петербургдиъ «Парнас» агъа яккун концернайиъ главный врачра э, гьетисан хIаттин заместительра э. Чиярира хуруна гьервусариъ курар аркьая агроном велди, мегIелимвелди-гьерф са кардик кея.)
1974-пе иса адефе ме чиппин хIуриди кар акьас математикайин дарсар килан мегIелимвелди. Мин хьир Сафият хурас ушуфттава. Махьтаб ккиркIвухаб,
чиппин хIуриъ 50 истти медпункттунин саниттаркавелди кар акьуфе, агьал пенсиди айчIуна, хулаъ ая.
Iудархъай, садсайин сивиъ агъадаркуна, сайи пеф сасрайи аркьай, нуьхIуьбат ай яшамиш вея хизанар э мебур. Мебури якьуд чиппин валадара ухIуна, хIа акьуна, джаллабурис высший образованибур йина ая: Паша(1974-пе и.х.)- силебарин духттирвелди хуруф э, Раисатна(1976-пе и.х.) Земфира(1978-пе и.х.), чиппин дад суман, мегIелимар э, Хидирнаби(1982-пе и.х.)-экономический факультет ккиркIуне.
Джаллабурихъ чиппин хизанар хъая, валадара; гьерф гьервусариъ яшамиш вей ая чиппин хизанарихъай. Шагьимирданра Сафият хIуриъ яшамиш вея: чиппин
валадарис найис фи кумак лазим хьучин –гьете кумак аркьай экьуна. Хизанар цIуьппе вереф, хизандин кIил иджеф идегуна э:
дузди тербия ирцIанди, гьер са алчархьу четинвеларин кураккес кIил ккетдивай, хIел аркьай, арайил аркьагуна. Ери ис хьуна махьтабиди ушуфе Шагьимирдан.3-пе классилас вартт Типпигъарин махьтабиъ хуруфе. 1969-пе иса иджи ккиркIвуна Типпигъарин махьтабра, учIуне МахIачкьалайин пединстутдин математический факультетдиъ-1974-пе исаттегьен хурай уйи. ХIуриди адехаб, ме гьемиша чиппин махьтабиъ математикайин дарсара киланди, завучвелдира кар акьуф э, директорвелдира, хIурин джемеIтарин кураригIасра гIайчIуфттава, ягIара -1999-пе исалас мич пенсиъра ай, кар аркьая(51-пе ис э).
Иджи кар акьубан мис ацIуна гьер джурейн грамоттабурна, сасра джевизар йина ая. МебуригI:«Ветеран труда» агъаф(2014), «Старший учитель»(МинпросвещенияРСФР от 10.10.1984г.), «Учитель – методист»(1986), «Почетный работник общего образования Российской Федерации»(2018г.), нагрудный знак Госкомитета России «За активное участие во Всероссийской переписи населеия 2002г», «Благодарственное Письмо за значительные успехи в сфере образования и воспитания детей и молодежи, многолетний и плодотворный труд»(2023г.РД) агъаттар гIая.
«Мебур дава зас багьа идеф, зун дарсар кийи инсанарин чухсагъул э. Чаб нандиъ аячира, гьетисариъас(Москва,Камчатка, Сахалин, Махачкала…) гъургъай: «Фиштти ая-агъай хабарар гъуршанди-, вас фи лазимди ая агъай авей вя зас»,-агъа ми. Ми дарсар кийи шиникквари гьер мукьариъ кар аркьая.
Шагьимирдан бахил э тебурин агалкьунарил. МебуригI 9 математика, 27 сасра дарсар килан мегIелимар, 60-лас вартт институтариъ математикайин экзаменар йина учIуна хуруттар гIая.
«Мидегьен гагьди кар акьас хьасттавуйи зафас зе хизан давайчин»,- агъа ми.
Чияр-чуппарис, учин шиниккварис, хурин махьтабариъ хуруттарис-джаллабурис дад хьуне микес. Мишттин хизанар- лап хIа девлет э хье миллтин. Чухсагъул хьурай чиппис. Джандин сагъвел, дунйяйиъ ислехIвел, йиркIвуран сакинвел кам дахьурай, чиппин валадарикесна, хуттуларикес Iэквар агурай, кьацIра
гьетебурин Iуьр дагурай мебурисна хье джаллабуринра.
Тамам Рамазанова