Хьуне агъа, хьундава агъа са гъилиъ кьуват ая гъвандин устта. Хъахьуная михъ са кIиркI. КIиркIак е дадан суман Iекьул, ери пеша кихьуна адава. Хъая са валад э агъай, гIентIи хIа хьуная ме. Гьер ягъа дада ирцIанди учин кIиркIас пул, амма мис къадри адавуйи пулун. Гьеге учис дада йиная пулар адартай ахьуная ми учин дусттариас. Дусттари, мин джумартвелар аргвай, хIа гафарар аркьай мин, ттур багьа аркьай ахьуная. Хубджи гахьар хьуная мебурин, миштти дадан пулар харджар аркьай. Сагелайна Iугелай давуйи дада мис Iекьулар ирцIанди, дусттариас пулар адартафттава агъай. Айчира алтухъ дадан чIаларис ибур ирцIандавуйи. Вахттар алттвей, Iуьсе хьуна афадивуная дад. Ахирахъди, Iайи иттархьугуна дад, хъая девлетара хардж акьуная кIиркIа. Уч луькIеф ягIархьуна, унахъуна дада учин кIиркIас, пуная: «Зун луькIея, зе кIиркI. Зун кIихаб вас ппара четин хьасе, агвасе вас мекIра, гашра. Амма вас хьанара кумак акьсттава, ве дусттари вас ул йирхIасттава. Вас ке Iайи четин хьу вахттуни, дуьньяйил экьвас кканди андава гуна, ве хулан багулив фая бицIи рукь алихьуная хулади ачаях. Тисаъ гъвадикес кейхьуна тIил ая, тисакес кейхь вун. Пуна ме гафарара, кIиная къуджа. Са вахттра дахьуна, аме дадан къазалмишара хардж акьуная кIиркIа. Алтухъ фера хъундавай четин хьуная мис. Са ягъарикес са ягъа, базариас гъушуна малдин мезра, вей ахьуная ме хулади. Вея рекъуьъ гьучархьуная мис учин суфрайихъ эркьва дусттар. Агуная мебурис мив фая вецунан мез, кканхьуная мебурис михъай вес хулади. Фиркьайчира дагIай, мебурихьас найич аркьайчира дагIай мез, джин акьуна алийиная гъвандил. Ме арайи, нандиас бадил хьуф ичира дагIай, аттархьуная гъуй, файшуная мез. Хьуная мис дард. Адина хулади, аркьаф даркьаф дагIай, кканхьуная мис учин кьуркь итIуна кейхьас. Ме арайи кIвал хьуная мис учин дадан чIалар. ДжикIина хулан гулегра, ачушуная хулади. Ракк дахъу вахттуни, агуная мис гвадикес кейхьуная тIил. Араджуна гардандиъ тIилра, ккедихьуная ми лекарикк ккея курси. Мин къакъ гъадивас дахьуна, архьуная гъвад. Адархьуная лидас бицIи сундукь. Дахъукуна, агуная кIиркIас кизилдин, арсуран пулар, кванишарна тIубулар. Ме арайи гъавурдиъ архьуная кIиркI учин гъалатIарин. Са ягъа гьучархьуная мис хаб учин дусттар. Агуная мебурис мин куц духIуба хьунаф, абур але кунар алди. Шад хьуная дусттар, хаб мин гардандихъ ахъекьвас кканди. Мебурин гьава агуф, унахъуная ми хулади. Джаллабур суфрайихъ завал хьу арайи, агуная мебурис сайис дала Iелеф адаваф. Хулан эеси, гьучадивуна яма гая барсу, башламиш акьуная IуьтIанас. Михъай адина гIулар муьхIтал хьуна хъуланди гъузуная. КIиркIа пуная мебурис: «Зун девлетлу иде вахттуни, чун джаллабур захъас хъуруцай багулив файуйи, зун касиб хьу вахттуни чун гулуне, зун хIисабикк ккиндавуйи. Гьал, зун хаб девлетлу хьу арайи, хаб кканхьуне чвас зун. Ваъ, дусттар, зас гьал аргвая иджвелна Iайвел, зун чве илдеш, дустт дава. Гул-багур ухь зе хулаас, зас чун сара даргвагъилди».
Луиза Гусукаева