Алттушу хIефттайин джумIе ягъа Агъул райондин ЦТКНРдин идарайиъ хьуне имамарин маджлис. Арайил акьуне ме мегIрака РДйин Муфтиятин программайилди, хъара Агъул райондин имамарин председатель Юсуф Магомедован ниятилди. Маджлис арайил акьубан кьастт э, Агъул райондиъ 2024-пе иса Духовенствойи бегьем акьу курарин кьадар кIил агвар акьуб. Гьеме МегIракайил иштарак акьуне Агъул райондин хIатти Закир Гусейновичара, гьер хIурарин имамари, динагьлубури фонд «Инсандин» волонтерари, шагьурариас адиная гIулари, хIурариас адиная инсанарира чиппин хизанар, шиникквара хъай.

Маджлис ухшар акьуне нашидари, шиниккварис акьуне бехIcар суалар алихьай дин-исламдихъас, шартIар-фарзарихъас. Хабди ихьуне кIур Умра хIадждин путевкайин,телефон, хъара наушникар. Джаллабур ахъутIуна уй гьинасаттархьасегьан агъаф суман.

Аттархьуне Умра ХIадждин шадвелдин кIедж Типпагъарин хIурин хьибудпе классиъ ая рушас Джабарова Фатима агъаттис. Гьелбетта Фатимайи багъиш акьуне кIедж учин бабас. КIвал акьасе мегIрака арайил акьас майил акьуне Агъул райондин хIатти Закир Каидова, хъара Курбанов Талай Тажудинович агъатти, хъара хIа кумак акьуне РДйин народный депутати Агъул райондихъас Магомедали Гаджиомарова.

Ахирахъди ме маджлисил акьуне дуьгIе адиная инсанарис хъара кIилди хье мусульман уммайин халкьарис. Пас кканде гьемишттин мегIеракабур аркьай идже э, хье кегъархьая шиниккварис Iекьул хьас, мебурис абур-асул, адаб,яхI намус ягIархьас.

Наибет Гасукаева