Дагъусттандин Правительствойин председательдин кумакчи Нариман Абдулмуталибовра РДйин сельский хозяйствойин министр Мухтарбий Аджеков ушуне «Дагмясо» агъа мясокомбинат алилан майдандихъ хъуттурфас. Ме ус аяф Кизилюртовский райондин Кульзеб агъа хIуриъ э. Ме кардихъас информагентствойис хабар акьуне РДйин Минсельхозпроддин пресс — службайи. Райондин хIаф иде Рустам Татархановра, Дагмясойин генеральный директор Юсуф Юсуфовра хъай делегация аларуцуне ме джигагь алиланди ая майдандил. Ахтармиш акьуне мебурин план — схема, хъара лазим иде курар акьубан графикра. Ме завод гъадивубан проектин мегIракабуригI иштарак аркьая «Дагагролизинг» агъа идарайи. Ме заводин вакиларин фикирдиъ ая рукку мал — къарайин якк кIилди гьемисаъ хIел акьуна гьадихьуб, хъара чиппин ттуранихъди ругъас акьу, мерккуъ икIу натиджабур, гьер джуре колбасабур, консервабур, хъара ацIуна сасра сурсатара адихьуб. Мебур кидавай, хъара фикирдиъ ая пеIер — къазарин яккара ишламиш акьуб, мала рин леIерикес, хIуппарин кьудакьарикес джихетIара акьуб. «Ме проект хье республикайис ппара лазим э. Дагъусттан мал — къара ухIубан рекъуьъ садпу мукьаригI гIая. Гьеме кардилас асуллу э проектдин лазимвелра. Са суткайин арайиъ мисаъ кьабул акьасе ери верш хIуппарин джандакар, гIуьфцIур джандак хIа малар. Джигагь алийибан курар лап худтти аркьай ая. Ме курарил алгъузу идарайихъ зурба таджриба хъая. Миштти идегуна, че муш кея ме исан ахирарихъди завод кардик кихьас», -ахъакьуне Нариман Абдулмуталибова. Мишттин хIакьадарарин якк хIел аркьа завод арайил акьубан гереквел хIа э. Мишттин ус акьучин, ацIуна инсанарис курар хьасе. Мухтарбий Аджекован ахттилатарилди, са вершна хьибцIур инсандис кар аркьа мукьар хьасе. Ми хъара пуне, чиппин фикирдиъ аягъилди хьучин, хье республикайисра гьуркIуна, Машрикь багухъ хъая хIуькуматаридира гьикас хьасе яккун сурсатар пуна.
Салихат Малагусейнова
Дагъусттандиъ цIае мясокомбинат арайил аркьая
![](https://vestiagula.ru/wp-content/uploads/sites/15/sites/15/2024/02/i-3.webp)