М.М. Джамбулатован ттуранихъ хъая ДагГАУ-йиъ Дагъусттандин Халкьдин Собранин Председатель Заур Аскендеров гьучархьуне ме вуздин мегIелимарихъайна студентарихъай.
МегIракайигI ишттарак акьуне РД-йин НС-дин Председатель Камил Давдиева, РД-йин Правительствойин Председательдин заместитель Нариман Абдулмуталибова, парламентский комитетин председателари Елена Павлюченкойира Мурат Пайзулаева, Халкьдин Собраниъ РД-йин Главайин полномочный вакил иде Нюсрет Омарова, РД-йин НС-дин депутат Девлетхан Алиева, Дагъусттандин образованинра гIилмин министрдин заместитель Гаджимурад Магомедова, «Доблесть гор» агъа программайин ишттаракчи Ахмед Магомедова, хъара республикайин правительствойинра бизнес — сообществойин вакиларира.
Заур Аскендерова ректордин врио Шихрагим Кутаевра хъай аларуцуна ахттармиш акьуне университетин гIилминра хурубарин майданар — биотехнологинра семеноводствойин лаборатория, испытательный центр, хъара ветеринарная медицинайин кафедрара.
КIилдингъилди гъадивуне лабораторин базайин модернизацин суал. Парламентин спикерди кIвал акьуне фидегьен лазим ичин хьин чиппи арайил аркьа тумарин аваданвел. Ме кардин мукь ппара хIа э гIилмин рекъуьъ, аграрный отрасльдин рекъуьъ.
Студентарихъай ахттилатар аркьа вегIдайи Заур Аскендерова хъара пуне гьалдин гIилмин цIаевеларихъас. Аграрный сектордин ягIайин ягъа кIилинди алакъа э технологинра кадровый суверенитетин суаларихъай.
Ке ппара фикир йине АПК-йин пешакурар хIезур акьубан курарис, вузаринра ариш — варишдин рекъуьн курарис. Пешакурарин кьитвелдихъас гъургъуне, отрасль куьгьна хьубахъас, мугьлатар алтухъ акьубахъас. Ме курари джигьиларин Iешкъ алтухъ акьасе хIурин магIишатин рекъуьн курар акьас.
МегIракайин ахирахъди икьрар акьуне студентарин, ариш — варишчибурин, хъара научное сообществойин ишттараквелра гIай джаллабур сад хьуна арайил акьас бизнес-семинар.
КкиркIуне ме мегIрака зурба ариш — варишчибурисна студентарис ирцIан грамотабурилдина джаллабурин хъай йирхIу ишкилилди.
Джалла студентарихъ, джигьил пешакурарихъ зурба агалкьунар хьурай фас пучин гьелбетта мебурилас э хье ватандин багайин агъан иджвелра Iайвелра асуллу идеф.
