Дагъусттандин инсаанарин Iуьмурдин шартIар асуллу э рекъерин ачухъвеларилас. Фас пучин, мисаъ яшамиш вере инсанар хIа пай ая гьава дагъдин дагьарарихъди рукьуная мукьариъ. ХIа пай рекъер читинттар э тич-мич кеттвереттар вартткIила агъавереттар. Миштти идегуна нагагь угъал, ибхь угъучин ке удигьай зиян верефра рекъерис э. Рекъериас лихуб дахьухаб инсанарин Iуьмура гъузуф суман ве. Ке ппара четинвелар алчархьа ариш-вариш, рекъ-радж аркьаттарис нагагь иттаф хьучин. Инсанарис рекъ табар хIисаб э Iуьмурдин шартIар хъукъас аркьа.

Миштти идегуна инсанар лирхан мукьар, рекъер, мугIар ачухъ акьуб ке лазим кар э инсанарин Iуьмур авадан хьас. Ахиран вахттари ме кардис хье хIуькумати ппара фикир ирцIанде. Хье вилаятин гьер мукьариъ ая шагьурарин районарин хIурарин рекъерин читин мукьар батIар аркьая, исал мукьар шинихI аркьая, улакь вере рекъерил алихьая асфальтар.

Ме кар авадан хьас хье хIуькуматиъ арайил акьуная цIае программабур, проектар, хъара региональный целевой агъа программабура. Ая хIуькуматин «Комплексное развитие сельских территорий» агъа программабур хъара сасра джурайин проектара. Гьеме проектаринра программабурин рамкабуриъ мункинвел, мугьлат хьуне ачухъ акьас. Агъул райондин гьер хIурариъ ая цIуре мугIар батIар акьас, лазим му кьариъ цIае мугIар алихьас. Хъара улакь лихан рекъер, инсанар лихан куьчайин рекъер шинихI акьас. Мишттин хайрдин курар мисаъ давам аркьа гьер иса.

Гьеме иса, гIулана Агъул райондиъ Типпигъарин хIуриъ, речная агъа куьчайин рекъер батIар акьубан курара давам акьуне. КIвал акьасе алттушу иса гIулин угъалари ппара зиян йине рекъерис, мугIарис, хуларихъ хъая мукьарис. Ме курар арайил акьас йиркIураъ ай уйи 2026-пе иса. Амма СВОйин ишттаракчин тIалабилди Закир Каидова тегIди кихьуне ме кар арайил акьас. Гьелбетта мишттин курар вахттуни арайил хьас хIуькуматин багухъас пулун майил вереф ичира райондин хIаттин тIалабарилдина кьасттунилди э.

Наиба Гасукаева