Ахиран ягъари ппара ахттилатар хьуная гьер миллатин ху чIал ухIубахъас. Ме кардихъас гьер джурайин фикирар ппара хьуная. Дагъусттандин миллатарин чIалар ухIуб ягъди хIаттин алгъузубакк ккеяфе. Федеральныйра региональный къануниъ аягъилди ху чIалан дарсар гIачихьунафе джалла махьтабариъ. Минпросвещений тастикь акьуная 6 вариант учебный планин, мебуригI гIая родной языкдинра родной литературайин дарсар. Миштти идегуна са пай фишттира духIуба акьас хьасттава, сасра пай гьер махьтаби чиппис фиштти иджи вейчин духIуба акьас верегъилди артая.
Минобрнаукайи йиная джалла районарис насихIетар чиппис йиная родной языкарин сеIетар ишламиш аркьагъилди.
Фиштти э ягIа арайил акьунаф образовательный процесс?
Республикайин махьтабариъ мугьлатар арайил акьуная 13-д ху чIалар ягIар акьас: русский, аварский, агульский, азербайджанский, даргинский, кумыкский, лакский, лезгинский, ногайский, рутульский, табасаранский, цахурский, чеченский чIалар. Ме дарсарин хIисабар ахттармиш акьугуна аргва «Родной язык и родная литература» дарсарис са хIевттайи йиная 1-3 сеIет. Ме дарсар гъаре мегIелимарис кумакис акьуная гьер джурайин программабур. Дагъусттандин Правительствойи фидегьен читинди айчира 2023-2025-пе исари ху чIаланра литературайин 1-8 классарин китабарис фатуная 777 млн манат.
Ме дарсар гъаре мегIелимарин фагьум ппара хьас ахиран 3 иса 2730 мегIелимди хуруная Дагестанский институт развития образованиъ. Хъара 2024-пе исан октябрьдилас декабрьдилди джалла ху чIалан дарсар гъаре мегIелимари хуруне ФГБУ «Федеральный институт родных языков народов РФ» доп.образованин программабурин дистанционный курсар.
Гьал 9-пе классариъ хурая шиниккварифас ОГЭйиъ гIаттивас хьасе родной языкна литература. АцIуна гьерджурайин мегIракабур аркьая ху чIал ухIас, хъара ппараттарис ягIар акьас. Ме олимпиадабур родной языкариасна литературайиас, гьер джурайи бехIсунин мегIракабур махьтабариъ хурая шиниккварин арайиъ, мегIрака «Лучший чтец произведений дагестанских авторов на родных языках»,»Чтение любимых стихов на родном языке», «Второе дыхание родным языкам» хъара джуреттара.
МегIелимарин фагьумра чиппин арайиъ таджрибара ягIар акьас мебурин арайиъ аркьа гьерджурайин мегIракабур, мебуригI гIая Всероссийский профессиональный конкурс «Лучший учитель родного языка и родной литературы».
Хабди мегIракайиъ гъалибвел гъушу мегIелимдис ирцIанде Дагъусттандин Минобрнаукайи 100 агъзур манат пул, мидегьен сара ирцIане РФ-динра Дагъусттандин халкьдин гIилминра наукайин пешакурарин организацин союзди.
Луиза Гусукаева
