Иджвел акьуб савабин кар э. Ме чIалар сифтта хьес унихьа дадар бабарикес. Инсан дуз рекъуьъ ахьуб асуллу э хизандилас. Гьер инсандис учин Iуьмурдиъ, иджвел аргваф, тIул-тIебегIет тарбия ирцIанф, диндин фарзар — шартIарикес, Iуьмурдин шартIарикес ягIар аркьаф ке удигьай дадана-баба э.
Хизан мертте хьеттин булах хIисаб э гьер валадис, ухудегьен Iуьмурдис муфеIет вереф. Хизан, дадна — баб, шериIет инсан иджвелин рекъуьъ хьубан сифтта кIил э. Миштти идегуна дуньяйил ппара гьер джурайин миллатин инсанар алдея.
Гьелбетта гьер миллатихъ хъая чиппин дин, тIул-тIебегIет, гIедатар. Иджвел акьуб кIилди миллатарин диндиъ ая Iуьмурдин фарзаригI гIая шартI э.
Ме карди ухIа садвел, инсанарин миллатарин арайиъ нуьхIуьбат-хIуьлмат, маслихIет дуньяйил ислехIвел. Инсанди акьуная са мискьал иджвели хIа уса гъурзанди. Иджвелин мехIсулин тум къалинф э.
Миштти идегуна благотворительностин кар арайил верефра хIукумдина диндин кар сад хьугуна э. Миштти идегуна ме кар дуньяйил давам хьас ухIас, арайил акьуне благотоворительный фонд агъа мукьар.
Благотворительный фондар арайил акьухаб, мункинвел хьуне кумак акьас ятумарис, гIеджизарис, касибарис, иттаттарис, Iуьссеттарис, читин, хатIайин курар алчархьуттарис, хъара ппара джурайин джуре мукьарисра.
Благотворительный фондари аркьая кумакин къайдабур хIа э мебури ишттарак аркьа кумак лазим мукьаригI. ЯгIайин ягъас хье дуньяйил фондар ппара ая иджвелинттар.
Хье хIуькуматиъ сифтта благотворительный приют хьуне Русь ая заманайин вахттари(IX-XIV асирди). Ме арайил акьуне моностырарина церковарин майилдилди ятумарисна иттаттарис. Хабди хьуне Петербургдиъ. «Благодетельное» агъаф 1802-пе иса.
1990-пе исари хье хIуькуматиъ бадил хьуне гьер шагьурариъ.
Дагьусттандиъ сифтта ачмиш акьуне 2011-пе иса «Чистое сердце», «Инсан» агъа фондар. Хабди 2012-пе иса хьуне «Надежда» агъафра.
Хье республикайиъ ке хIа Фонд э «Инсан» агъаф. Арайил акьуф ме Духовный управленин фикирдилди.
Мебурин филиалар ая хье республикайин гьер районариъ. Агъул райондиъра 2012-пе исалас башламиш акьуная мебури чиппин кар.
КIили гъая ме кар Мусаев Рамазан Абдулкадыровича.
Гьеме чиппи аркьая кардихъас, бегьем аркьая кардин къайдабурихъас, ахъакьуне Рамазан Абдулкадыровича.
Ассалам Алейкум джаллабурис!
Иджвел акьубан дараджа хIа э. Гьелбетта пас кканде ппара хIа чугъсагъул гьеме Благотворительный фонд арайил акьу инсанарис, кумак акьас мункинвел хьубан. Фонд «Инсанди» аркьая кардин къайдабур кIилди ахъакьасра вейдава, чин хьудегьен алучIа чегьди кумак кканде пуна гьучади инсандин кар бегьем акьас. Фонд «Инсанди» кумак аркьа: ятумарис, Iусеттарис, гIеджизарис, читин курар алчархьуттарис, иттаттарис. Са сагейлай алчархьа ппара читин курар, амма михIелдис чин фикир дайина хIисаб дакьуна ату кар шукур хьурай хьуна адава. Iари хье республикайиъ кидавай джуре региодин читин хIелдиъ ая инсанарисра.
Ке читин COViD ая вахттари, агьал СВО аягунара чин алучIа кумак акьас.
Хъара гьер сентябрь хъучавере вегIдайи кумак аркьай ве чин гIеджиз хизанарин шиникквар, дад-баб хъада ятум шиникквар махьтабиди завал акьас.
Ме кар ппара джувабдар кар э, чин ппара шад э чаалди гьучадидегьен инсанарин хиял тIалаб бегьем акьас хьуб бадала.
Ппара чугъсаул пас кканде зас, ме кар арайил акьуттарис, ме кардис майил ирцIанттарисра джаллабурис. Зас пас кканди ая гIеджиз инсандис гъил гьучихьуна кумак акьуба э агвар акьаф хье миллатарин садвел, дусттвел, арайиъ ая нуьхIубат-хIуьлматна джумартлувел.
Наиба Гасукаева
