Дагъусттандин хIатти кIвал акьуне гьемишанди федеральный оперативный штабиъ хIел акьуна ккане ке лазим суал кIилди субъектариъ гьуркIадегьен чIирхIарин контейнерар арайил акьуб э пуна.
«Ме чIирхIар фадахъубан кар кьацIра мехIкамвелилди арайил акьас хьасттава хьефас республикайин гьер — са идарайин даражайил ме суал гъадивуна михъ йиркIв фай хъучудушудегьен гагьди. Чин алучIа чефас вередегьен гъил гьучихьуна кумак акьас ме кардин рекъуьъ гьер са муниципалитетис. Амма мебурин багухъас алучIуб зас чIукь аргва. Фидегьенттар акьучира ке хIа читинвел муниципалитетариъ ме рекъуьнф э. Фас пучин мебури дузвелилди агъайдава чIирхIар фадархъа контейнерарин кьадар чиппин мукьа риъ ая.
Республикайин джалла шагьурариъра хIурариъра камди аме мишттин бурчIинар. ТКО-йихъас ахирангелай оперштабил акьу ахттилатариъ ме площадкабур арайил акьубахъай алакъа иде кIилди суаларис джувабар йина уй. Республикайин финансарин министрди ахъакьуна уй гьер муниципалитетин пуларин мугьлатарихъасра. Миштти идегуна пуларилас асуллу иде суалар ме кардин ахьуна кканди адава», — пуне Сергей Меликова.
Региондин хIатти агъагъилди: контейнерар арта площадкабур, чIирхIар ахъуна завал аркьа мукь, адавахаб, шагьурарин, хIурарин мерттхьунихъас, экологин саламатвелдихъас гъургъасра кехIей хьасттава. 
Ми ахъакьуне ме кардин рекъуьъ лазим иде инфраструктура арайил акьубан курар фиштти кIили вейчин. Кумторкалинский райондиъ акьуная чIирхIарин бурчIин, хъара арайил аркьай гъилариъ ая 5 объект.
Республикайин тIабиIетин сурсатарин министр Ратмир Расулова хабар акьугъилди, республикайин джалла районари тасттикь акьуная алихьая контейнерный площадкабурин рекъерин картабур. Амма сур муниципалитетарин планаригI мебур арайил акьубан вахттар гIадава. Ме кардин иджвелин чишна хьуне Каспийск шагьур, мисаъ ме курар аркьая лап цIуппи арайил акьу графикдилди, гьер вазала отчетра ирцIанди.
«Тасттикь акьу рекъерин картабурихъ хъуттурфуна, муниципалитетарин планариъ ая гьеме исан ахираристтегьен 2077 площабка арайил акьуб, гьалдис Iу вазалан арайиъ (май-июнь) 335 контейнерный площадкабур арайил акьуна ая», — пуне Ратмир Расулова.
Ке идже кар гьалдис агвар акьуная Бабаюртовскийна, Новолакский районари. Мисариъ арайил акьуная са усаъ 26 сасра усаъ 32 площадка. Ме читинвелдис ишламиш акьас гьуркIудегьен пулар адавахаб, Минприродайин хIатти тIалаб аркьа районарин хIаттарикес мебури чиппин багулихъасра майил йиб.
Ратмир Расулова хабар акьуне коммерческий курар аркьая юридический лицобурихъай аркьая кардихъасра, мисагI гIая туристический объектара. Арайилди аттивуне мебурикес сурихъ региональный операторарихъай ТКОйис лазим иде икьрара кехIей хъудаваф. Ме кара кидавай хIа пай вахттари мебурин предпринимательский курарилас асуллу ий арайил вередегьен чIирхIар архъа контейнерара хъудаваттар ая.
«Лазимвел ая, завал акьуна джалла предпринимателар мебурин удигь шартIар агьийиб: чиппин ариш — вариш файшубан рекъуьъ е тIабиIетис, е джемеIетис зарар дайина багулив фая манзиларин мерттхьун ухIуб. Чин агъаяф чIирхIарин системайихъас э — мисагI ишттарак акьуна кканде джаллабури», — хъара хъучихьуне региондин хIатти.
Сергей Меликова буйругъ йине ме мегIракайин кулар арайил акьас муниципалитетарин хIаттарис, гьертти учин райондиъ, региональный оператора субподрядчикара гIай, ме кардин рекъуьъ лазим иде джалла суалар хIел аркьагъилди.
Гьеме рекьуьас кар аркьая хье Агъул райондиъра. Гъуршанди ая чIирхIар архъа контейнерар, хIезур аркьа цемент агьартай мебурис площадкабура.
Ме площадкабурна контейнерар арайил акьучира гьер са инсанди учин мерттхьунра ухIуна кканде. Кичархьу усариъ фадахъуна ккандава чиппин чIирхIар, бурчIинарихъди рукьас акьуна кканде.
Салихат Малагусейнова
