9-пе августи физкультурникарин хIаягъ э. Ме хIаягъа гьер са инсанди, зас ягIаф, фикир аркьа: фи акьуна кканди аягьан зун, зе сагъвелдихъ хъучавес, фера даркьай экьуне агъай, сагъвел алтухъ хьасттава пуна. Джалла инсанар хъучушуна кканде чиппин сагъвелдихъ. Гьемишан чиппин джандин гьавайил иркIв алиянди, адаркай, упражненибур аркьаттар чишна хьуна кканде ккулинттарис. Амма сур инсанарис ме ягъ-гьемишанди суман, чиппин хъая агалкьунар вартт акьас алучIай, кар алтухъди акьас алучIа ягъ э. Сад мишттин инсанарикес Султалумарин Iисайин кIиркI-Магомедов Рамазан э. Ме бицIигуна димари сакинди экьвас ягIаф давуйи. Махьтабиъ хурай ами, 5-пе классиди агъархьегъилди, ме дадана баба Детско-юношеский спортивный школайин дзюдойин группайиди гьикуни. Те вегIдуни, 1985-пе иса, мисаъ шиникквар вардиш акрьай уйи. Ппара шиникквар вейи мин гъиликкди: шиниккварис кьабул вейи чиппис укъас ягIар аркьагъилди, ги чиппин йиркIв гъулангъилди. Иджи укъас вереттар гьер соревнованибуриди гъай вейи. (Агьалра гишттин секцибур я, агалкьунар ая).
Гьетегунан хаб Рамазана ме кар фадихьуфттава. Учифас батIарди укъас вей, соревнованибуриъ садпе мукьар фарцанди: хьимурна сагелай махьтабарин соревнованибириъ суман, республиканский первествобириъ гъалибвелар гъушуфе ми. Махьтаб ккиркIуна, хурас учIу Дагъусттандин Сельхоз Акдемиъра спорт фадихьундава ми: 2-пе курсуниъ боевой единобарствабуригI гIачучIуна, 1992-1994-пе исари Ушу-Сандайинра, кикбоксингдинра Мастер спорта агъа ттурар гъушуни. Институтдиъ хураядегьен гагьди курсунин староставел аркьай. спортивный достиженибурин стипендира гъуршанди уйи.
1996-пе иса, хуруб ккиркIвуна адехаб, Дербентин ДЮСШ-3 -йин дзюдойинра самбойин тренервел аркьас хъучучIуне, учи учра вардиш аркь ай. 1998-пе иса Мастер спортайин нормативар йина, дзюдойиъасра самбойиъасра Мастер Спортайин ттурар гъушуни.
2013-пе иса микес Дагъусттан Республикайин гъиликк ккея Спортивный школайин директор хьуни. Хабди ме школайикес, 2018-пе иса, Спортивная Школа Олимпийского резерва хьуне (школайиъ ая шиниккварин агалкьунар ппара хьуна). Рамазан гьалра ме школайиъ кар аркьай аме. Учин мегIелимари уч фиштти вардиш аркьай ичин, учира гьагиштти йиркIв фай кар аркьай, гин гъиликк ккея ппараттари гьер джуьре спортивный соревнованибуриъ гъалибвелар гъуршанде, гебур зурбадалди вардиш аркьая. Мин гъиликк 6 Мастер спорта хIахьуная.
1.Магьа мин ттур ая ученикар: Ханмагомедов Камал-Заслуженный Мастер Спорта, Победитель Европы, ацIуна международный турнирарира.
2.Амирметов Рустам М.-международный турнирарин Победитель.
3.Рамазанов Заур — Победитель первенства мира.
Рамазан Исаевич мидегьен агалкьунар хъая захъ агъай, экьуна эркьвай дава. Ме ягъди кардик кея. Мишттарин гьунарар аргвай, сасрабурира кьастт акьуна кканде гиштти кар акьас.
Республиканский Олимпийский резервдикес мебурикес Российский Олимпирский резерв хьасе агъай ая мебурин школайикес. Ме кIилил алди ппара спортсменар завал аркьа хIа соревнованибур аве. Мис хье агъуларин ттур вартт хьуна кканди ая. Учифас вереф аркьа ми четинвеларихъ хъудайланди.
Магомедов Рамазан Исаевичан джандин сагъвел, йиркIвуран сакинвел кам дахьурай, учин йиркIвураъ ая мурадарихъ рукьурай учра, учин гъиликк ккея шиникквара. Мишттин учин маккан ккане инсанар хъара ппара хьурай хье райондихъ.
Тамам Рамазанова
