Са ягъари зас ягIархьуне 1954- пе иса хье райондиди адина, кар аркьай уйи Iуьрус мегIелим шиберирихъас(Авала хье хIурариъ, хуруна, дарсар килан мегIелимар адавай, ппатталас адеттари ппара киланфи дарсар). Зас агу ишкилик 2 дишагьли кей уйи. Сад тебурикес агьалра дуьйил алмеКурский областиъ яшамиш вея — Гобико(Капустина) Лидия Ивановна э. Сасра — Кубаева Алла Алексеевна. Мебур Iудара, Iуд сасра шибера 1954-пе исан август вазала чиппи хуру Курский областин Старый Оскол агъа шагьурдин пединститут ккиркIуна, тидас кар акьас гьикуна, хье Агъул райондиди аттархьуни. 3 руш хье райондиъ шуварис ушуна, амилгуни агъа мисаъ (Соловьёва Людмила Викторовна агъатти — Лидия Ивановнайин руша «Воздух юностиДагестан» агъа макьалайиъ).
Агъулаъ шуварис ушуттарикес сад — Кубаева Алла Алексеевна э. Ме 1954-пе иса Типпигъарин Багьаларин Кьубин ХIададас хьирди адини- военно-морской училищайин курсантис.
Алла Алексеевна хефи 1932-пе исан 9-пе августи Курский областин Вязово агъа хIуриъ (агьал Курский областин Прохоровский район). ДегIвин вахттари- 1941- пе исан хаб 1943-пе исан хьидисттегьен — Курская битва хьасттегьен — немцарин гъиликк ккей уйи-мукьар.
Те исари гIезабарихъас Алла Алексеевнайин йиркIвурал алмилгуна уйиттарихъас ахъакьучин, кIилин са хIа китаб ликIенас хьаси агъа мин хуттул Алиева Аишайи. Тушкин велар алчархьира, ме, батIарди ( с отличием) хуруна чиппин махьтаб ккиркIухаб, Старый Оскол агъа шагьурдин пединститутра гьетиштти иджи хуруна, ккиркIуни.
Тевус ккиркIуна, кар аркьа мукьар агвар аркьагуна (найч вес кканде пуна хабар гъушугуна) мис, сасра мукьарихъай, Дагъусттандиди вес ккандев пуная. Ми, фишттин мукьар э тевусар пуна хабар гъушугуна, мис джуваб йиная: тисаъ хIуьл ая, гьава сувар, батIар мертте гьава, гьер джуьрейин емишар ая мукьар э пуная. Мера гъилгъилари рази хьуная мич адес. Дагъусттандиъ мебур Агъул райондиди гьикуная. Агъулди грузовой машиниъ ай Магъу-дерейиъас вере вегIдунин гучI кIилин Iуьмурди хум девей амилгуная минра, михъай вей уйи шиберинра. Мидегьен пас деведегьен ухь тан, амма хатIа мукьар, эмкIеасра кегьей агвасе пуна йиркIвараъ ирхIасттавуйи агъайи агъа тебури. Амма чаб кар акьас гьику ЧIаарин хIурин инсанари чаб кьабул акьугъилди агуф, амилгуная мисаъ. Михъай мич аде Лидия Ивановна 1956-пе иса, баб Iайи иттар хьуна, хаб ушуная хулади, аме шибер агъуларис шуварис ушуна амилгуная.
Гьемиштти хъучучIуфе Алла Алексеевнайин кар аркьа вахттар ЧIаарин ери исан махьтабиъ. Ми мисаъ бицIи шиниккварисра дарсар киланди, хIаттарис Iуьрус чIалан дарсна литературайин дарсар киланди. Учи мисаъ кар аркьа вегIдайихъас гъургъагуна, лап йиркIв шадтти, идже инсанар и агъай йиркIвурал аркьафи агъа мин хуттула. 1954-пе иса мис гьучархьуни мин кIилин Iуьмурдин илдеш-мин шуй Кубаев ХIадад Шабанович-Багьаларин Кьубин кIиркI -Одессайиъ военно-морской училищайиъ хурай уйиф. Тевус хуруна адехаб, те хаб адини учин ватандихъди- уч хунайде Дагъусттандиди. Гьемисаъ учин шуй гьику вусаъди учра вей, ппара мукьариъ кар акьуфе ми мегIелимвел аркьай гьер районариъна шагьурариъ. 60 истти кар
акьуне ми Дагъусттандин: Агъулаъ, Магарамкентский, Сергокалинский районариъ, Дербент шагьурдиъна МахIачкъала шагьурариъра. Ме кар аркьай уйи мукьарин шиниккварин хум весттава чиппин мегIелим. Ме дуьйил алме гуна, мин ученикар гьергелай, чаб МахIачкъалайиди аттархьегуна, милди вей, кIил дивайи тебури. МахIачкъалайиъ мин гъиликк хуруттари Алла Алексеевна кар аркьай амегуна, чиппис кьабулди ме, хабди мин гъилккди гьикас алучIайи чиппин валадарна, хуттулара.
Гьер иса, ме дегIвин ветеран идехIела, мис Российин правительствойин поздравительный открыткабур вейи, хабди Президент Путинанра открыткабур вейи.
ХIаттара бицIиттара ахъаджихIай ай, 2021-пе исан 5- пе августи кичмиш хьуни Алла Алексеевна. Мин шиниккварис, хуттуларис, ми дарсар кийи шиниккварис, ме ягIа инсанарис мусра хум весттава ми чиппис кийи дарсарна, чиппис акьу иджвелар.

Тамам Рамазанова