Хьес ягIа дагь заманабурихъас мич, гьер са инсанди учин Iуьмурдин рекъуьн пеша гIаттива вегIдайи гьакIанди фи кканчира хьурай пуна гIаттивайдава. Мебури сагелан чиппин йиркIуран ниятихъ фикирдин гIешкъунихъ хъуттурфанде. Гьелбетта аве сад — Iу инсан чиппил алчархьу кар хаб дакьуна гьегис йиркIв йина эркьваттара. Мишттинттар хьин пугъилди сад — Iуд э.
Гьемиштти йиркIуран кьастт фай, учин фикирдилди культурайин рекъуьн пеша гIаттивуна ацIуна исари КДЦйиъ кар аркьая инсанарикес сад э Абдуллаев Рамазан Шамсудинович. Рамазан Шамсудинович са агъзурна ерчIу вершна ерхьцIурна хьибудпе исан йицIудпе ноябрьди Агъул райондин ФитIарин хIуриъ Абдуллаеварин хизандиъ хуне. Дад, Абдуллаев Шамсудин мебурин хIуриъ садпе мегIелим и, бабра Абдуллаева СехIибат учин хулан цIуфул ухIай, багайин ягъ аркьа кайвани ий.
Мебурин хIа хизандиъ ай уй гIуьфуд чуппар хъара Iуд чияр: Рамазан, Сардар, Раидин, Ильмудин, Лейлият, Экюнат. Гьелбетта те вахттарин гьер са хизандис, шиниккварис суман мебурисра четинвелар агуне. Чиппин аттрукьубарихъ хъуттурфуна гьер са шиникквди учифас вере гъил гьучихьуна аттрукьа кар аркьайи. Мал — къарайин, гIаран — IуькIерин, хуппурарин курар аркьайи.
Са агъзурна ерчIу вершна ерцIурна ерчIудпе иса Типпигъарин махьтабиъ йицIудпе класс хуруна ккиркIуне ме. Хабди Iу иса ватандин удигь учин эскервелдин бурдж ирцIанди армиъ хьуне.
Армиас адихаб, са агъзурна ерчIу вершна муйцIурна хьибудпе иса цIакIин акьуна Рамазан Шамсудиновичахъ учин хизан хьуне. Учихъ шиникквар хьухаб микес ппара джувабдар дад, хизандин вакил хьуне.
Хизан ухIасе пубра рехIетин кар давуй. Шиникквар хIа акьуна кканди уй. ДехIела сифттан вахттари джуре шагьурариди, тич — мич вей гьер джура курар аркьай, къазамишар аркьай кIил ухIуне. Хабди Махачкала шагьурдиъ культпросвет училищейиъ хуруна кар акьас хъучучIуне ФитIарин хIурин дом культурайин директорвелди. ЯгIайин ягъара учин гьеме кар давам аркьа ме.
Хизандихъас хабар гъушугуна йиркIуран дариниас, ппара ибгIавел, хIуьлмат хъай ахъаркьа: «Хизан заал алчархьуне хIаттари, ягIаттари агъаф суман лап зе мугултIулдукес. Сад сайин гъавурдиъ ай валадарихъас фикир хъай лирханди Iуьмур кIили файшуне чин. Ме иса че хизан арайил хьуна ягъцIурна Iу ис э».
Са агъзурна ерчIу вершна ерцIурна ерчIудпе исахъас мич э мин хизанди чиппин ФитIарин хIурин библиотекайиъ кар аркьай. Хуруне ме Ставраполь шагьурдин училищейиъ библиотекарьдин курсар. ЯгIа валадар хIа хьуна гьерф учин хизандин, хIа гIилмин эессибур хьуная. Мебурин чиппин хизандиъ ая Iу кIиркIна якьу руш: Рашид, Рамид, Мерджанат, Минаят, Раисат, Маина.
Хъая Рамазан Шамсудиновичахъ иджи кар акьубан рекъуьас чугъсагъулдин кIеджарна, грамотабура. ХIурин IуьмурдигI, лазим иде гьер са мегIракайигI ишттарак акьубахъас ФитIарин мазгитан имамдинра, хIурин джемеIетин багулихъасра ппара хIа чугъсагъулар ая мис. Кардигьас азад вахттари Рамазан Абдуллаева Iешкъунилди лиркIенде шиирар учин ху чIалалди. Учин ватанагьли шаирарин шиирар ахттармиш аркьай ягIар акьасра Iешкъ аве мин. «Зун мус хьучира хIезур э зе райондин, хIурин, ватандин иджвел бадалди фи мегIракайигI кканчира ишттарак акьуна зафас вере майил йис», — агъа Рамазан Абдуллаева.
ХIа руш Мерджанат Шамсудиновичан, дадан хьилариас ушуная. Яшамиш ве ме Чинар агъа хIуриъ. Мерджаната кар аркьа Чинардин садикдин заведующаявелди. Дадан бажаранвелдин пешабура кея мик. Джуре шиберира культурайин рекъуьас давам аркьа дадан пеша. ХIа кIиркIа Махачкалайиъ Перенатальный центрдиъ духттурвел аркьа, бицIи кIиркIра чиппин хIурин дом культурайин пешакар э. Хьес кIилдибурис ягIа пешайи инсан дава ухьтан аркьаф, инсанди пеша э. ЙиркIв фай акьу кар мус хьучира гьава э.
КДЦйин пешакар пугуна мебури Iари мегIнибур, лихъунар, тамашабур дава аркьаф, хье кегъархьа несиларис ватанперасвелдин тарбияра йина кканве. БицIи амий мин йиркIурас ппара нуш и хье бицIи халкьдин гIедатарна хасиятар. Белики гьеме кканхьунихъас иде таре ме учин халкь, учин ху чIал, миллат, гIедат, тарих ухIубан рекъуьъ мидегьен джафа дивуф. ЯгIа учин яшра хIа ичира фиттин кканчира кумак акьас хIезур э ме. Гьалдин хабра кьуватна Iешкъ йирай учис ме учин йиркIурас нуш иде кар давам акьас.
Салихат Малагусейнова
