ЯгIа РДйин Правительствойин заседание хьуне. Ме мегIракайил гъургъуне фидегьен Iайи лазим ичин хье республикайин джалла больницабурихъ хабчихиш акьуна Iекварин генераторар хъахьуб. Хъара гъургъуне мисал Дагъусттан Республикайиъ перинатальный, младенческий, материнский кIибарин суалихъасра, мебур чIукь акьубан рекъуьъ фиштти кар аркьайчин ме суалихъасра.
КIилдин гъургъуб акьуне гьеме ягъари Буйнакск агъа шагьурдин больницайиъ Iеквар хъадихьубахъасра.
Минэнергойин ахттилатарилди, 110 кВ «Буйнакск-1» агъа подстанцигьас гьаттвере 6 кВ Ф-12 агъа кабель кьат хьугъилди хъучушуне Центральный котельныхъди вереусар батIар акьас. Синарил але къакъ тич – мич алдихьас алучIуф хъаттархьуне центральная больницайин Iеквар, суьре сеIет дегьен гагь хьуне больницайиъ Iек адай. Рукьу хабарарилди генератор больницайин идарайихъ хъая, амма ме ахъихьучира больницайин са багв Iекв адай илгуне.
Ме кар тайрикь акьуне садпу вице-премьер Манвел Мажонца. Ме ахъакьуне мишттин генераторар джалла больницабуриъ ахьубан лазивелдихъас, хъара больницабуриъ Iеквар хъаттархьубан Iайвелихъасра.
Абдулмуслим Абдулмуслимова майл йине ме мегIракайил акьудегьен ахттилатарис. ХIел акьуна кканде пуне джалла суалар. Дагъусттандин Минздравдис тапшурмиш акьуне тегIде хIелди хъучат пуна, джалла больницабуридира, перинатальный ценрыбуриди резервный генераторар. Хъара гьучихьуна кIвал акье пуне ме кардин рекъуьъ пулун кумак кканхьучира.

Салихат Малагусейнова