Хьуне агъа, хьундава агъа са савдагар. Тихъ хъай уйи агъа хьибу руш. Ке бицIиттин ттур и агъа батIар руш. Чияриc ме Iайи батIарф идехIела кьацIра кканвей хьуна адава.
Мебирин дад ппара Iайи девлетлу хьуная. Ми, шибери фи кканде пичин, аркьай хьуная мебирис. Са ягъарикес са ягъа вей ахьуная савдагар шагьурдиди. ХIа шибери пуная дадас чиппис ухьтан берхIемар фаша пуна, бициттиI- учис ире къизилгюл(роза) фаша пуная. Базариъас джикIина, гъушуна шиберис савкьатара, учIуная ме хулади вес рекъуьъ. Рекъди веяф, гIачагулуна, аттархьуная ме савдагар са дараъди. ДарагI агуная мис са агугуна гучI вере суман къала(дворец). Ккан хьуная мис мисаъ Iуьш алдихьас. Ачушуная хулади- тIуруша тIутIра кехIей ахьунадаъ хулаъ. ЯIанигI хулан усттулил Iэлеттар алхьуная. Багулив фая гъархьа хулаъ аккихьуна ахун ахьуная, мис аккуьчIуьна гъархь агъаф суман. Эхъекьуна, IуьтIуна учис гунира, ушуна гъархьуная ме. Багамикестти ккидаркас багъдиди аттушуная савдагар. Мевус агуф, багь атIуна гъузуная ме. Джалла багварихъ ухьтан гьер джуьрейин тукар, арабириъ ая рекъерил- джагвар къум- пас деведегьен батIарди ахьуная мевус. Багъдиъ ире къизилгюлар агуф,мин йиркIвурал хьуная бицIи руша учис ире къизилгюл фаша пуна уйиф. АлдартIа ми са къизилгюл. Те алдатIуфна сад, джилиъас агучIуф суман, са хIа Iэламати фацуна, зун вун хулади фатасттава, нагагь вун ве еринди мич ве шиберикес са руш гьидикучин, пуная мис.
Хулади рукъугуна, дада ахъакьуная шиберис хьеф хьегъилди. ХIа шибери, ундихьу кIалиб акьуна, чиппис файдина берхIемар алцанди, Iэгваригь гьударкай экьуная. БатIар руш, учис те Iэламатигьас гучIайчира, ушуная дада агъа мукьуйиди. Iэламати, шаб пуна,ппара иджи кьабул акьуная ме учин хулаъ. Учис кканегъилди учин хулаъ суман адаркай, яшамиш вей экьуная ме мисаъ. Гьелидегьен Iае Iэламат давахи ме, пуна йиркIвураас адайшуная мин. Ми фи аркьайчира, хулан эесси са чIалра агъай хьуна адава мис, е фиттихъасра улиъ ачадатай, сакинди, учис кканегъилди ахьуная БатIар руш.
Са хубджи гьагьдилас, дадахъна чиярихъ ул хъархьуна, чиппин хулади вес ккан хьуная ме рушас. Ми уч са-Iу ягъаринди дадан хулади фат пуна миннат акьуная Iэламатис. Кканди-дакканди, са чара адатти суман рази хьуная ме са хIефттайинди фатас.
Са ягъ дахьеф суман алттушуная хIефтта. Руш хаб вес рекъуьъ учIаягуна, чияри са-Iу ягъа сара экьве пуная мис. Тебирин хиял хьуная: нагагь ми адес кьана акьучин, тe хъел адина мил алухIанасе пуна. Iу ягъалас са Iае эмкI агуная БатIар рушас: багъдиъ ая къизилгюларигI фаттар хьуна, Iэламат люкIеяф суман. Гъагьархьуна, ккитIуна фургъуникк хIейванара, ушуная руш къалайиди. ХIекьди, са эл алми хъучархьуная руш Iэламатихъ. Iэшай, алчухьуна:
-Ппара миннат э вас, малюкIе сара, -агъай, гьарай аттархьуная БатIар рушан.
Мин гьарай аттархьегъилди, джан керхьуна, са ухьтан амир(принц) гъайшиная. Амира ахъакьуная рушас уч гьинас хьунара ккандахьедегьен гагьди суьхIуьрди итIун илгванасе пуна са кафттара. Сайис сад кьабул хьуна, ккан хьуная. Хабди, акьуна цIакIинара, шадтти, элхъенди, дурухIай яшамиш вей амилгуная мебур Iудар те къалайиъ.
Тамам Рамазанова
