ТIабиIетиъ ая екьу вегIдайин арайи дуяйил давере джурейин гьавабур адава. Гьер вегIдайин ая учин ухьттанвелра читинвелра. Iурд хьуна мекIер ппара хьу вахттуни гIул кканде агъа. ГIулана куче хьу вахттуни, инсанар аве найч гьишагьан агъай. Инсан, фикир акьучин, фиттилра рази вереф дава. ЯгIай кканде гьер вахттунин ухьтанвел агвас, бахил хьас, муфеIет кеттивас. Исалас иса гьер вахттунин гьавара духIуба ве. Са иса хьугъилди сасра иса вейдава. Авала фикир акьучин хIурариъ алтухъ кучевелар верефттавуй гIулана. Амма Iурдар — нецIварил хIа меркквара дивуна, хуларикес хIа кIутIкIутIаяра кедагъуна цIуппе верефи. Те вахттарин Iеламатар андава Iурдарин, амма арабир аркьай Iеламатар айчIва сасра вахттарин.
Мус хьучира ке ухьтан вахтт хIисаб аркьафе цул. Ме арайи дуйис йирхIуна аве Iу-хьибу джурейин рангар. Са кIуранил алдея цIабар аве гъазе, хъуьхъе, ире рангунинттар. Са багв гъазе амичин, сасра багв гьаттушуна ранг алттивуна аве. Инсанар рази давайчира, гьер са вахттунин вахтт лазим э тIабиIетис. Угъалар, ибхьер, рагъар герек э тIабиIетиъ агъучIа Iуькерис, кьаларис, кIурарис, нахширарис.
Амма фиттин хьичира кьайда ай кканде, алтухъламабур хье вахттуни инсанарис зарар ирцIанде. Миштти ме ягъари кIилди Дагъусттандиъ хьуне лап Iа кулакар. Кулакин зарар мус хьучира руцIафе агъафе. Мигелайра мин гуджвел хабар дахьуна алттушундава. Гьалдисра бицIи арабир аркьай кулакар аттархьай уй, амма гIифудпе ноябрьди хьу кулаки ппара зарарар йине халкьдис. Шагьурариъ кулакихъас кетуне Iеквар. Iеквар хъаттархьухаб амилгвандава хьеттара, ибгIавелра. Хуларин курар гъирхIуф кедавай, ппара читинве рекъерилра. Iеквар адавай кар аркьайдава светофорари, ппара ве машинар ачирхIубар.
Мигелай хьу кулаки кьатIар акьуне хIа кIурар, алирхIуне машинарил, багулив фая джигагьарил, гIахъуне шушабур, кьатIар хьуне Iекварин синар. Шагьурарин зарарилас чIукь хьуна адава хIурариъра. ЯгIайин ягъас хабарди ая курарикес алдихьуная МФЦйин шифер, гIахъуная инсанарин тIагарар, алахъуная шиферар. Файшуная джигагьарин удигь акьуная навесар. Исал тураригI гIая хуларин шиферар алдахъуна файшуна алирхIуная багулив фая къуншибурин хуларил.
Хулан эессин тахсир адавайчира ппара узи къара ве сасрайин удигь. ХIурариъ ешамиш вея инсанари садсайин хIуьлмат ухIай, алтухъ чIал-гаф пас алучIайдава, ме кардихъас читин э шагьурариъ аяттарис. Мебури са фикира дакьуна сасрайикес зарар хьучин алтухъ гъургъубар дакьуна хъатIас хъучика. Агьалдин багьа дуьньяйиъ, сасрайинф давай гьерттис учин чIирхьу ус батIар акьас чукь аттархьайдава. Герек иде кIур, тахтта, диликра гъушуна, усттайс ирцIанфра хIисаб акьугуна чIукь аттархьайава. Мус хьучира агъафе хIа инсанари са сеIетин Iа кулак далара са митIри ибхь иджи э пуна. Ме са нубати башламиш акьугуна зарар дайина хъаттархьайдава. Инсанаривас е раккагьди айчIвас вейдава, фи хьунара гугариъ ахъас гучIай, е хулаъ мукь куьчIайдава. Хъара читтинве нагагь байирариъ маларихъ, хIуппарихъ фуш хьунара хизанарикес аяхаб, ппара Iайи гIезаб ирцIанде. Нагагь телефонарин связар амехаб телефон акьуна хабар гъушанас ве фи-фидавай чугас. Авала ме кардихъас читинвейи. Аттушу инсан хаб хулади ачадесттегьен фера хабар авейдавуй михъас.
Луиза Гусукаева
