Дагъусттандин Правительствойин Председатель Абдулмуслим Абдулмуслимова кIили файшуне мегIрака инсанарис хуларидира хъара джуре социальный джигагьариди ибгIавел фатубарихъас. Ме мегIракайил ишттарак акьуне РДйин Минстройдира ЖКХйи, Минэнергойи, Госжилинспекцияйи, ООО «Газпром межрегионгаз Махачкала», ПАО «Россети Северный Кавказ» — «Дагэнергойи», хъара шагьурарин хIаттараира. МегIрака башламиш акьуфна сад, Абдулмуслим Абдулмуслимова пуне, ахиран вахттари фидегьен тIалабламабур айчин инсанарин багухъас ибгIавеларин курарихъас. Ме хъара кIвал акьуне, Дагъусттандин хIатти Сергей Меликова файшу ахиран Оперативный штабин мегIракайил газаринра Iекварин хIаттари ахъакьу хIезурвеларихъас Iурдис.
«Джаллабурис ягIа, фидегьен шагьурарин хIаттари отчетар йичира ибгIавелар йиная агъай, камвейдава инсанарин тIалабар. ДехIела, Сергей Алимовича буюрмиш акьуная гьер ягъа ахттармиш акье пуна нае хулариди ибгIавел дайина амичин. Ппара тIалаб э джаллабурикес герек дава отчетар махура, хIекьданди фиштти айчин уп, фи читинвелар айчин ахъакь», — пуна башламиш акьуне мегIрака Абдулмуслим Абдулмуслимова. Ке удигьай гъургъуне министр строительства, архитектуры и ЖКХ РД Бахтияр Уллаев. Ме пуне, Iурдар хъучаверегунас батIар акьуна хIезур акьуная 4858 ппара мартабарин хулар, джалла хуларис хIезур акьуная хIезурвелдин паспортар, арайил акьуная 479 (99%), 17 центральный тепловой пунктар (100%), батIар акьуная 169,56 км хьеттарин турбабур (100%), 69,25 канализацибур (100%). Газар адава хIурин джигагьарис хIезур акьуная 13,5 тонн угольдин. Iурдин вахттуни Iеквар газар хъаттархьуна мекIер дахьас цIуьре джигагьар батIар акьуная.
«2023 иса Единный операторди национальный Фондуниас батIар акьуная ибгIавелдин турбабур Дагестанские огни агъа шагьурдиъ. Миштти батIар аркьая хъара Кизилюртин турбабура, мисаъ курар ккиркIвасе 15 ноябрьдис», — пуне Уллаева. Хабди гъургъуне Дагъусттандин Государственный жилищный инспекцин хIаф Сергей Касьянов. Ми пуне, ягIайин ягъас ибгIавелар ахъихьуная 9 шагьурдин ппара мартабарин хуларис. Кизилюртиъ ахъихьасе 15 ноябрьди. «Дагъусттандин Ростехнадзордин Управлени ахттармиш акьугуна ягIархьуне Дагестанские Огни, Избербаш, Кизляр, Хасавюрт шагьурар хIезурди ая Iурдис. Вере ягъари Дагъусттандин Ростехнадзорди йисе Актар ме шагьурар Iурдис хIезурди ая агъаттар. Шагьурарис: Дагестанские Огни, Избербаш, Кизляр, Хасавюрт акьуная буюрмишар аттивуная гъалатIар 15 ноябрьдис арайил акьас», — пуне Касьянова. Читинвеларихъас гъургъас башламиш акьуф Сергей Касьянова пуне Каспийскдин ибгIавеларихъасна ибгIа хьеттихъас. Iеквар хъаттархьеф мисаъ хъаттархьуне кательныбур.
«Читинвелар хьуне Алферовайинра Халиловайин куьчабурин котельныбуриъ. ибгIавеларин читинелар хьуне ппара мартабарин хулариъ Ленина, Алфёрова, Советская, Октябрьская, Дахадаева, Назарова, Комсомольская, Халилова, Хизроева, Байрамова, Орджоникидзе, Абдуллаева, Мира, С. Стальского агъа куьчабуриъ»,- пуне ми. Региондин Госжилинспекцин хIатти ахъакьуне, 1 ноябрьдин 2024 исалас «горячий линиди» коммунальный суаларихъас тIалабар фай телефонар акьуне 190 инсанди, мебурикес: 81-отопленихъас, 39-куче хьеттарихъас, 46-Iекварихъас, 24 — газарихъас. Ке ппара гIерзабур вереф Махачкалайиъна Каспийскдиъ яшамиш вея инсанарилас э. «Газ, Iекв, ибгIавел, ругъу-куче хьед фи адава агъай гIерза адичин унахъуна ме курарихъас джувабдарвел гъаре идарабурисра дуз аркьа. Дагъусттандин Госжилинспекциъ ая телефон «Горячей линии» 51-63-29, мич фи арайи кканчира телефон акьуна инсанаривас ве чиппин гIерзабур пас», — пуне ми. Абдулмуслим Абдулмуслимова Каспийскдин хIаттивас ахттармиш акьуне фи читинвелар айчин инсанарис ибгIавел ахъихьас. Ахиран вахттари хьу кулакарихъас Алферавайин куьчайиъ ая котельный чIирхьуна уй. ЯгIайин ягъас джалла дуз акьуна кар аркьая, пуне Каспийскдин хIаттин заместительди Руслан Мирземагамедова.
Махачкалайин читинвеларихъас ахъакьуне Светлана Багровайи. Мин чIаларилди, Тимирязева 15 «а» агъа куьчайиъ ая котельный чIир хьуна уй турбабур Iайи цIуре хьунаяхIела. КIилди хIисаб акьучин духIуба акьуна кканди ая 5 котел, ягIайин ягъас духIуба акьуная хьибуд, Iуд дуз акьуная. Аме сасра бицIи суман читинвелар вере ягъари арайил акьасе, пуне ми.
Кизилюртихъас гъургъучин, мисаъ цулана башламиш акьунафе цIае турбабур кичикIас, гьалдис акьуная 12,1 км. Избербашдиъ алтухъ читинвелар адава. Мисаъ Единый операторди духIуба акьуная 2,7 км ибгIавелдин турбабур. Ме курарис кIилди хIисаб акьугуна аттархьуне 22,2 млн.руб. Избербашдис Iурдис хIезурвелдин паспорт йиная. Буйнакскдиъра чин Iу ваз дала давайчира кар аркьай, Единый операторди батIар акьуная «ЦТП-5», гъушуная 3 цIае 2 Мвт Энтророс агъа котелар. Хабди Iекварихъас гъургъуне и.о. директора филиала ПАО «Россети Северный Кавказ» — «Дагэнерго» Арсен Гаджиев. Са Iу районариъ бригадабури кар аркьая читинвелар дуз аркьай. «ЯгIайин ягъас Карабудахкентский райондиъ трансформатордин мощность вартт акьуна кканди ая. Ме кардихъас ппара чалиш-миштти ая чин», — пуне Гадживеа. Абдулмуслим Абдулмуслимова тIалаб акьуне ПАО «Россети Северный Кавказ» — «Дагэнерго» хIаттикес тIалаб акьуне варха районара хум гьамарта пуна.
«Кулинский, Докузпаринский, Рутульский, Агульский, Ахтынский, Цунтинский, Цумадинский районариъ ягъди керта Iеквар. Агьал ппара фикир йина кканди ая мишттин районарис, акьуна кканде мисариъ шартIар инсанар айчIуна давес шагьурариди», — пуне Абдулмуслимова.
Арсен Гаджиева учин багухъас пуне, давурариъ ая районарис энергетикари джурейи фикир ирцIанди ая. Кулинский райондиъ хье читинвеларихъас зун гъургъуне ме райондаин хIаттихъай. «Мисаъ «Русгидро» хьуне авари, дехIела э напряжени чIукь хьуф. Агьал мисаъ кар аркьая пешакурари. Ме кардил зун алгъузуная», — пуне Гаджиева.
Абдулмуслим Абдулмуслимова тIалаб акьуне джаллабурикес джувабдарвел хъай ме курарихъди тIушас.
Луиза Гусукаева
