Дуньяйил ппара пешабур ая. Джалла пешабур хъучучIаф мегIелимвелдилас э. Фас пучин, мегIелимди э ке удигьай дарс киянас хъучучIаф махьтабиккди кичаде шиниккварис садпе хатI акьас ягIар аркьаф, хIерфар агвар аркьаф, сан акьас, хъара амеде курара. Бабан кьабахъай, шиниккварин йиркIвурал амилгванф чиппин садпе мегIелим э. Шиникквар йиркIвураастти дакканхаб, ме кар ппара гагьди акьас хьасттава. Амма са ппараттари суьре асирди кар акьуна, гьалра кар аркьай аме. Сад мебурикес БархIачарин ХIададан руш Барият э. Барият махьтабиъ кар аркьай 51-пе ис э: 1973-пе исалас мич, Буйнакскдин бицIи мегIелимарин училище ккиркIуна адехаб мич. ХIададан Бариятахъ, махьтабин шиникквар кидавай (Iудпе бабвел акьуб кидавай) якьу шиниккв учин хунаттара хъая: хьибу рушна са кIиркI. Джаллабур хизанарин эессибур хьуная, чиппин гIешкъ ая курарикра кея. Мин Iу руша: ХIевайира, ФатIимайи арсуран медалар фай ушуфе хуравусариди. Мебури Iударира лап иджи ккиркIуфе чиппи хурай уйи мукьар: ире дипломар фай адифе хулади. ХIа руша мегIелимвел аркьай хьуфе Типпигъарин махьтабиъ. Шувас ушухаб, МахIачкьалайиъ садикдиъ кар аркьай хьуне, бицIи шиниккварин мегIелимвелра акь уфе. Агьал МахIачкьалайин «Горка» агъа санаториъ дарсар киланттарин мукьуйин хIавел аркьая. Бабан пеша кьабулди идехIела э ми ме курар аркьай аяф. Махьтабиъ кар аркьадегьен гагьди Бариятас 7-8 грамотабурна, Дагъусттандин Министерствойин «Баркаллагьдин кIедж» йиная ппара гагьди иджи кар акьуф идехIела. ХIададан Барията агъа: «Зун 10- гелай, кьабул акьуна махьтабиди кичавей аме шиникквар, вартт иде классариди гьикуная. Агьал кьабул акьунаттарис зун 3-пе классиди рукьуна дарсар кийиная, киландира аме. Зун дарсар кийи шиникквар гьер джуре пешабурин эессибур хьуная. МебуригI мегIелимвел аркьттара гIая, духттирвел аркьаттар, амеде мукьариъ лирханттара гIая. Миштти хусуси(специальный) курар аркьаттар суман, агьал СВО-йиъ аяттара ая.» Гьалдин хабра кар акьас джандин сагъвел, йиркIвуран рехIетвел, дуьньяйин сакинвел кам дахьурай учинра, учин валадаринра, хуттуларинра.
Тамам Рамазанова