Дагъусттандиъ 5 мартди хьуне мегIрака цIае аркьая рекъуьн садпу гъван ккийибан. Ме мегIракайиъ иштараквел акьуне Дагъусттандин хIатти Сергей Меликова, рекъерин идарайин хIатти Роман Новикова, республикайин улакъаринра дорожный хозяйствойин министр Джамбулат Салаватова, хъара Росавтодордин гъиликк ккея «Кавказ» агъа ФКУ Упрдордин хIаф Александр Лукашукра. Ме Федеральный рекъ «Кавказ» аядегьен рекъерикес ке ппара ишламиш аркьаф э: мисаас ве къакъ йирхIу хIа машинара, инсанар ая улакьара Азербайджандидира, хъара джуре хIуькуматарин багварихъди. Ахиран 15-20 исарин вахттари Хасавюрт хьуне ке Iайи ппара ариш-вариш ая шагьур, ме рекъер гьучархьая ус багьана хьуна шагьурдин гIанаъ ая улакьин алакъ ппара хьуная. Роман Новикова кIвал акьуне, ахиран Федеральный Собранис акьу посланиъ Российин Президенти Владимир Владимировича Путина пу гафарар. Ми тегуна пуне вере ерхьи исан арайи дуз акьуна арайил аркьагъилди 50 рекъерихъас шагьурарихъас хъуруцуна аркьаттарихъас. «Хасавюртихъас хъуруцуна вея рекъ Р-217 «Кавказ» ая ке хIа хьи бу рекъерикес сад э. ЯгIа ме башламиш аркьая проект ппара лазимф э. Ме рекъ хьасе хъуруцуна Хасавюртихъасра, Махачкалайихъасра, Дербентихъас. ДехIела ме проектихъ хъая ппара хIа мегIна арайил акьас социальныбур, экономическибур, геополитический суалар. Ме рекъ хьухаб Дагъустандиас Северный Кавказдин республикабуриди вес рехIет хьасе», — пуне ми. Дагъусттандиъ башламиш акьуне цIае рекъра акьас, Хасавюртихъас хъуруцуна, аяф батIар акьасра Р-217 «Кавказ». Сергей Меликова учин багухъасра пуне, халкьарин арайиъ ме рекъ хъара авадан акьуб бадалди «Север-Юг». «Ме проект арайил акьухаб, республикайин гIанаъ ая рекъерин мегIна духIуба хьасе. Ме цIае рекъ дахъухаб шагьурдин гIанаъ ая рекъериъ чIукь хьасе улакъабур. Мишттин арайи инсанарис рехIет хьасе, шагьурдил куцра адисе. Хье ке хIа вазифа э- ме аркьая цIае рекъуьхъди ая манзилар батIар акьуб. Дагъусттандин халкьдин багухъасра, учин багухъасра мубарак акьуне ме аркьая проект!»-пуне Сергей Меликова. Александр Лукашука ахъакьуне, ме аркьая 21 км IйирIе рекь акьас маслихIет аттивуф рекъерил сад сайис мушат даверегъилди машинар фай вес э. Инсанар яшамиш вея хуларигьас вархал хьасе рекъ. Башламиш акьуна 718-727 км рукъасттегьен дуз аьуна IирIе акьасе якьу тал але рекъ. Хъара 10 км рекъуьн цIае акьасе хъуруцуна хуларигьас вархалди гьаттивуна. 738-пу км цIае рекъуьн гIачархьасе агьал ая рекъуьгIди Р217 «Кавказ» Акташ агъа нецIулас алдихьуная мугIуйин багулив. Ме проектигI хъара гIачихьуная арайил акьас хьибу багухъди вере рекъер, Ярык-Су агъа нецIулас мугI алихьуб, хьасе цIуппе цементин 1,3 км манзил цал, гIуьфуд маларин рекъер, хъара мертт акьуна хьед фарта турбабур. Хъара ме рекъерил кар аркьаттарис йисе цIае чиппин кардис хъудуьхьуь кунар. Ме рекъуьн IирIевел хьасе 15 м, гьер са полосайиъ хьасе 3,75 митIри. Тич-мич вере машинарин рекъуьн арайиас акьасе цал. КIилди акьудегьен рекъуьн манзилил акьасе Iеквара. Ме рекъ арайил акасе ерхьи этапин арайиъ, хьибу этапиъ хIезурвелар акьасе, хьибу этап хьасе Iайи лазимттар. Агьал мисаъ аркьая джуре курар, мисаас вея турбабур ккеттивуна джуре усахъди кичикIая, Iекварин столбабур джуре усарихъди ирхIая, ме курар ккиркIухаб рекъерин пешакурари башламиш акьасе чиппин хIекьдан кар. Хъара арайил аркьая улакьабур гъурзар аркьа усар, инсанар эркьва джигагьар, ме рекъерис герек иде задар арта мукьар. Ме рекъ арайил акьуна дахъасе 2028 исан ахирарис. Ме кар арайил хьухаб, духIуба хьасе улакьабур вере багвар, миштти идегуна Хасавюрт шагьурдис мушат хьасттава. Хъара рекъерил вере нехIс курар чIукь хьасе, вереттара дахи рукьасе.
Луиза Гусукаева