Рамазанова(Каяева)Мафинат Курбановна — Агъул райондин «Социальный отделдин» кьулугъчи э. Мафинат хунаяфе Кьаябурин Кьулбананра Ассийи (Ппара идже инсанар и агъа мебур) хулаъ. Мебурихъ 8 шиниккв хъай уйи: 5 рушна 3 кIиркI. БицIигунан хаб аркьа лихунаригьас дагучIай хIахьуна аяттар э мебур: гьертти чиппин кIилра хизанар ухIая. Гьемебур суман са кардигьасра дагучIай, хаб дачукIаф Мафинатра э. 
Мафинат хефе Гехъуьнарин хIуриъ 1963-пе иса 14-пе июньди. Ерхьи иса хьуна- 1969-пе иса ушуна, 1980-пе иса ккиркIуфе чиппин хIуриъ махьтаб. Махьтаб ккиркIу иса ушуна, са иса бухкалттирарин курсар хуруф э. Ме курсар ккиркIухаб- 2 иса Типпигъаъ кунар-лекар масса ирцIан диквандиъ кар акьуф э. Шувас ушугъилди (1984-пе иса), тихъай МахIачкьалайиди ушуни: шува институтдиъ хурай, учи заводиъ кар аркьай хьуне. 1987-пе иса мин хизанНазим Раджабович- ЧIаарин хIуриди Iуьрус чIалан дарсар килан мегIелимвел акьас гьикуни, Мафинат лисаъ Дом культурайин директорвелди ушуни. ЧIаарин хIуриъ хеттар э мебурин хьибудар кIиркIар: Низами-1985-пе иса, Нияз-1986-пе иса, Низам-1990-пе иса. 1994-пе иса На зимна Мафинат чиппин хIуриди кар акьас адини, баб садтти аяхIела-историн дарсар килан мегIелим и ме. Назима махьтабиъ завучвелди кар аркьай, дарсара киланди; Мафинат махьтабарин мерттхьунар аркьа кардил хьуне. Хабди, са гагьдилас, Назим лиханас ушуни, махьтабариъ ваджиб чIукь идехIела. Агьал чиппин хIуриъ сельсоветдин председатель э.
Хьибудар шиникквар, махьтабар ккиркIуна, гьерф гьер мукьуйиъ ая: хьибудара спортсменар э. Низами юрист э. Ми Дербенттиъ машинар батIар аркьа мукьуйиъ кар аркьая. Сасра кIиркI-Нияз- Калиниград агъа шагьурдиъ тренервелди кар аркьая, компьютерный курсар ккиркIуф ичира. Ти 2-гелай «Чемпион мира» агъа ттур къазанмиш акьуфе укъубариъас (бои без правил). Низам- Башкириъ, Уфа агъа шагьурдиъ Металургический завудиъ тренервел аркьая. Мебури чиппин бабар йиркIвуралас гьартай дава: мебур бабарилдира ве, бабар мебурилдира. Ке багуйиъ аяф ке хIа кIиркI — Низами э. Мебур ппара гIагъвей ве хIуриди: идже гьава аяхаб, гьер хIефттайира кехIей.
1998-пе иса Мафинат Типпигъаъ ая Социальный отделдин къулугъчиди кар акьас хъучучIуне. Гьете вегIдунин хаб ягIайин ягъасттегьен гьемисаъ кар аркьай аме ме.
Мафинат дегьен учин аркьа кар йиркIвфай аркьаф нагагьра ахьасттава агъа ми кумак аркьай ая пенсионерари. ЦIайи кар аркьагуна 5 инсандихъ ахъаджихIайичин, агьал 9 инсандихъ хъуланди, кумак аркьая ми. Гьинафас хабар гъушучира, михъас ке идже чIалар дала унихьай дава. Сад мебурикес ФатIимат Магарамовна э. Мин 85 ис хьуна ая. ФатIимата э зас миннат акьуф Мафинатахъас ликIен пуна.
«Мишттин идже, зурба инсан ахьасттава,»- агъа ми учихъ хъуланди аяттихъас. Кибашттан, учин шиниккварира фадихьуна адава ме: Рамазан-мин хIа кIиркI, мин хьир Олимпиада хъуланди ая михъ, Динарара-хIуриъ ая рушра гьемишан хъуланде михъ. Амма Мафинат нае дакьикьайи унахъучира, ундахъучира багулив фаяф э: Iэлефра ирцIанде, дарманара ачикIа, кунара духIуба аркьа — фи лазимди аячин аркьа.(Шиникквар кардил алди, ягъди багуъ экьвас вей девеягуна). «Мафинат че мехIелайин гъилар дуга кьецI э», — агъа ФатIимата михъас. Са ФатIиматас дава ми кумак аркьаф мебурин мехIелайиъ: нае инсан хулаъ адавайчин, ми тебурин малара уза, адикай-ачикайра э. Фера аккевес артай дава. Мафинат хъуланди ая чаб чиппихъ ахъаджихIас даве инвалидарихъра. Сад мебурикес Магомедрасулов Рамазанахъ- дадна баб мегIелимар и мин. Мис хизанра акьуни, михъ хъуттурфурай пуна, амма те, атуна мера, ушуне хIуриас. Чияр мин шуварикк ккея, хIуриъ фушра адава михъ хъуттурфанф.
Сасрабур: Курбанова Умрият-3-пе группайин инвалид. Рамазанов ХIеджи-инвалид, садтти ая инсан (хьир иттай, хIуриъ адава). Омарова Сафари-пенсионерка, Курбанова Хадиджат-пенсионерка, Рамазанов Абдулгъафарна гин хьир Хадиджат- пенсионерар, Магомедова ПатIимат-пенсионерка. Мебурис джаллабурис гъил гьучихьа Мафината, гебурис лазимди ая вахттуни: калтуфар кеттивас, ибхь адихьас- сасра курара акьас.
«Зе кар кIилилас алдихьуна экьвас кканвей дава зас,»-агъа Мафината учихъас. Ппара инсанар аяхIела учихъас хъадихьуттари хъелра кехIей аркьа Мафинатакес: «ГьакIанди ачавей акье чахъди», — агъа гебури мис (БацIи Рамазанана гин хьирХIуьрибаба).
Гьемиштти иджефе агъай, идже ттур ая Мафинатан Гехъуьнарин хIуриъ. Учин шиникквар хIа хьуна ушуф, ми гьал сасрабурис кьимат айра, адавайра кумак аркьай, инсанарин идже сана гъуршанди ая ми учис. Мафинатан учинра, учин валадаринра, хуттуларин джандин сагъвел, йиркIвуран сакинвел, шадвел кам дакьурай Аллагьди. Гьемишттин инсанар нае хIуриъра кам дахьурай-дуьйил гIеджиз, муьхIтадж инсанар адилгванас.
Тамам Рамазанова
