Дишагьли хIурин мукьуйиъ загьматкешра э, кайванира э, шиниккварин бабра э, вакил идеми ичира хизандин кIилра э. Хизандин кIил пугуна мумкин кар э цIакуна гъавурдиъ архьубра. ХIа инсанари агъафе, идеми хизандин кIил ичин, дишагьли мин лекар э пуна. ХIурин дишагьли е хIа курарихъ, е хIа джавизарихъ ахъихьайдава. Учин абур асулра ухIай, валадарис тарбия ирцIанди дуз рекъ агвар аркьай, учил алчархьу азиятра гъадивай хулан уджагъ афухIай яшамиш ве. Зав курастти ккеккелан IуьIуьйихъай гъайшина мал хъара адикуна шиниккварихъ хъучушуна хулан иш — пешара акьуна хIуькуматин кардилра гьуккуна кканве. Хаб кардилас адегуна гьемиштти хIуьлакди аве хумбеф, са багулихъ Iелеф аркьай, са багулихъас мал пеI сакин аркьай. ЯгIайин ягъа хIурарин Iуьмурдин шартIар авадан э. Хулариъ кканегъилди ибгIа, ругъу хьеттар ая, кан гъили гIуьрччанди андава, гьер са сурсат фи кканчира ушуна дукандиас гъуланде гунира кехIей алтухъ уджай андава рехIетти гъушуна эркьва. Мал — къарара джаллабури ухIай андава. Ппара читин ий ме курарихъас авалдин вахттари. Хьед хъахъуна гъареф и, кIур — IуькI хъахъуна гъареф и, салаъ ая фурд хьучин хъахъуна аттгъареф и, кан гъили Iуьрччанди. Са чIалалди гьемишттин азият кей ягъ ягъахъай Iуьмура ккиркIваф и. Миллионарилди авей и миштти Iуьмур гьика зурбабур. Гьемишттин зурба хумбарикес сад э хье агъул райондин ЧIаарин хIуриъ яшамиш вере Асутаева Зумрият Шерифовна. Зумрият Шерифовна са агъзурна ерчIу вершна хьибцIурна ерчIудпе иса ЧIаарин хIуриъ Шерифанра Аминатан хизандиъ хуне. БицIи Iуьмурдихъас гъургъучин учис гашар — мекIер алтухъ азиятар агундава агъа ме. Фас пучин, дад кIилин Iуьмурди гьер усариъ хIуькуматин къуллугъчи ий, бабра мегIелим. Хье райондин финотделдиъ кар акьуне, Хиваъ, КьасумхIурил, Лакский райондиъ, Хасавюрт шагьурдиъра курар акьуне Аминатан дада Асутаев Шерифа. ЕрхьцIур истти Тпигъарин хIурин махьтабиъ кар акьуне Аминат Шерифовнайи. Хизандиъ мебурин са чура ерхьид чияр хьуне. Гьамебурил джан алийина тарбия йина ухIуна хIа акьуне дадара баба. «Са кьайдайи чин кегъархьу вегIдайи дад че джигьилди амий кIине. ДегIви хъучучIугуна файшуф, джандиъ хIел адавай тич рукьасттава пуна хулади гьикуне. Адина са гагьра хьундава, ме кIине. Дад кIихаб ятумар ухIай гьелбетта бабас азиятар ппара агуне. Амма мебур чахъди рукьас атуфттава че баба. Миштти пучира джаллабурив хурас акьуна гIилмин эессибур акьуне. Бабал але гIезаб аргвай зун хурасра ушундава, зас ппара читинвелара агуне. Баб хIуькуматин кардил алвереф ий, зун хулан, хизандин, шиниккварин, малдин, байирдин курар бегьем аркьаф. Белики захъ ме фикир хьуф зун ке хIаф идехIела идеф хьасе. Гражданский дегIвиъ хьуфе зе хIадад — дадан дад. Гьамебури диву джафа ягIа хьин гIачатас атуна ккандава», — кIвал аркьа Зумрият хIабаба. Уч хIа хьуна, хабди Рамазанас шувас ушуна учин хизан арайил акьуне Зумрията къа исан Iуьмурдиъ ай. Iуд дишагьли валадара хьуне михъ, ФатIиматна Ферзият. Iударира университтетариъ хуруне. Шибер шувас йина гьерф учин хулан мукьуйин эессибур э. Мебурихъра сайихъ Iу руш сасрайихъ хьибу руш хъая. ЯгIайин ягъанис шукур хьурай путтулара хьуная михъ. «Шуван хулаъра хубджи лихуб алчархьу дишагьли э зун. ХIурин клубинра сельсоветин идарабуриъ уборшицавелра аркьай, хьибцIур хIейвандин къайгъура дивайи, зе учин хулан, малдин, байирдин, шиниккварин хъайгъура. Дирира идетар и зун тегуна, джанра хъай уй, кьуватра. Алтухъ аттрукьубар андайчира гьалра кардигьас хаб чукIас вейдава зафас», — ахъакьуне Зумрият хIабаба. Хъара кьуватра сагъвел хъай ирхе Iуьмурар йирай учис, учин багунттарин йиркIвара шад акьас, мебур аргвай учин йиркIвра ачухъ хьас.
📝Салихат Малагусейнова
