Агъул район пуна, хье район Дагъусттандин картайик бадил хьеф 1934-пе исан 1-пе сентябрьди э. Ме ягъасттегьен агъуларин хIурар гьер районарин гъиликк ккей уйи:19 хIур Къуругь райондикк, Буршагъарин хIур-Къайтагъ райондикк, Церхьеарин хIур-Дахадаевский райондин гъиликк Агъул район пуна арайил хьехаб, мисаъ хIавел аркьай (Райкумдин садпе секретарвел аркьай) ке удигьай лезги шаир Мемей Тагирович хьуне, тин кьабакьай сасрбур. Амма хье райондиъас садпеф Шамсудинов Фейзулла Османович и. Фейзулла Османович хефе Iэмухъарин хIуриъ 1927-пе исан, 3- пе январди. Чиппин хIуриъ махьтабиъ хурай ами дарсар киянас хъучучIуф э-мегIелимар адай(те вахттуни хье райондиъ мегIелимар гьуркIай адавуйи: махьтабиъ хIа классариъ хурая шиникквари-7-пе классиъ аяттари-бицIиттарис дарсар киланди). Гьете вахттуни, 1943- пе иса, Фейзулла Османовича, кар аркьай, Сергокалайин педучилищайира хурай уйи. Ме, педучилище ккиркIухаб, 1953-пе исасттегьен чиппин хIуриъ мегIелимвелди кар аркьай, Высший парттийный школайин курсар ккиркIуне. Агъул райондиъ садпе секраттарвел акьастти ме гьер мукьариъ курар акьуни: 1954-пе исалас 1956-пе исасттегьен Дербентский райондин обком парттиъ , 1956-п исалас 1962-пе исасттегьен Агъуларин райоком парттиъ, 1962-пе исалас 1964-пе исасттегьен МахIачкьалайиъ. Кара аркьай, Сельхозинститутра ккиркIуни.
1964-пе иса Шамсудинов Ф.О. гьикуне Агъул райондин садпе секреттарвел акьас. Мисаъ ми 1964-пе исалас 1973-пе исан ахирасттегьен кар акьуни. Мидас ушухабра ппара гагьди сасра мукьариъ курар акьуни, амма Агъуларин садпе секретарвелди кар акьуб мин ке иджи,йиркв фай учин райондихъас кар акьу вахтт и. Ме килилалди райондиъ акьу курар инсанарис (ме ягIадегьенттарис) хумвей дава. Ми мисаъ ппара Iайи йиркв фай кар аркьуфи: гьеме гьава дагьарарил але райондиди Къуругь райондин удигьай, (тебурис экв дивастти, гьетидас ичира дивай уйиф), Iэкв дивуне, ягъ-Iуьш дагъай, Iэкв дива инсанарихъ хъуруцай, кумак аркьай, лазим иде задар хъучаркьай; мин хIа зурбавел и ме кар, са задттихъра гIеджиз хьас адатунатуна кар аркьаттар,арайил акьуб хъучучIуна уйи кар. Ппара вахттра фаттивуни, загьматара хьуни сасра кар аркьагуна: Магъудерейин рекъ IирIе аркьай, гьеме лап четин мукьуйиъ мугIар алийянди.Гьете вахттуни мисаъ хьибуд хIа мугIар алийини. Шамсудинов Фейзулагь кIилил хьуна, Дербенттиъасна МахIачкьалайиъас автобусар адес хъучучIуне: инсанарис рехIет хьуне чиппис лазим иде щейъ гъуянас вес, хуравусариди вес-гьер са кар бутмиш акьас. Иджвелин курар хъара акьуфе ми, дехIела э мис Агъул райондин садпе секретарь идегуна Ор ден Трудового Красного Знамени еф.
Райондин хавел аркьай кар аркьа вегдайи, мис, загьматдивай, иджи кар аркьа инсанар,джалла са-садтти ягайи. Шамсудинов Фейзуллагь Османовичас гьер са загьматчи агьли кар аркьа мукьуйин килихъ хъувейи.Ме нандиъ хьуира аргвайи: хIурин ха идемар але гимил: мебурив фи фикирар фаячин ягIар аркьай, инсанари кар аркьа хуппурарилфиштти кар аркьаячин, фи зад лазимди аячуга аркьай; хIуьппехъенарин берейил, галариъ. Мис гьер са загьматчи агьлуйин дарди-хIел ягIайи, гебурис гъил гьучихьайи. Амма мис ккулинвелар аркьай, улигьанвелар аркьаттара ягIайи-тебурифас сакинди экьвас вейдавуйи: гьарттис учи акьуна ккане кар туб алийина агвар аркьайи. Уч хIа инсанари агъаттил йиркIв алиянди, зарафатарна хIенагара кканеф и: учира аркьайи, учикес акьучира гиран верефттавуйи. 9 истти райондин хIавелди ай, микес хъел кеуйиттара аяф хьаси, амма хIа пай инсанарис ме ппара кьабулди и. Ми, учира, агъайи: «Агъулар ппара идже, ачухъ инсанар э, мебурихъай лиханас рехет и. Ме гафар ке удигьай Типпигъарин хIуринттарихъас э зун агъаф,- агъайи Фейзуллагь Османовича. -Зун ппара рази э гебурин йиркIв дахъуна, зун акьу гъалатIарилас гъил гъуршанди, гъавурди ай экьубал захъай. Сасрабурифас хьас идеф хьасттавуйи зе тунт хасият гъадивас,»- агъайи ми. Фейзулла Османовичас мусхьучира кьабул вереф и гIилмихъди диву инсанар: гебурин чиппин йиркIвураъ ая къастт бутмиш акьас алурчIавел. Мис джаллабурихъай гъургъуна, йиркIв гъуюна учифас вере кумак аркьафи. Буршагъарин инсанарин йиркIвурал алме фиштти кумак акьуф ичин Фейзулагь Османовича Ахмедов Шарафас, бабар-дадар хъудава ятум кIиркIас, ги хурурай пуна. Хъара инсанарис ягIа фишттитме шад вейичин Петрозаводскдиъас джемеIетис ягIа зурба гIелим Замир Тарланов. Ми учин цIуппе дусттурахъай суман авефи гихъай. Мебурис сад сайикес фера лазимди адавуйи, амма Фейзуллагьа уч райондин хIаф идехIела и ме миштти иджи кьабул аркьаф. Михъди суман ме джалла хье райондиъас Дагъусттандиъ хIаеларигIди гIагъучIуттарихъдина, гIелимарихъди. Мисаъ кар акьас хъчучIуна, хIавеларигIди ушуттар э Т. А. Махмудова, М-С.М.Гусаев, З.Д. Магомедов, Г.Р.Каидов, Д.Г.Гасаев, М.Ф.Магомедов хъара сасрабур Шамсудинова и мебурис рекъ дахъуф гишттин курарис. Шамсудинов Ф.О. зурба сагъджан хъая инсан и. Ме кьанди э кIеф2018-пе иса, 28-пе февральди. Агъул халкьдин хум весттава Фейзулла Османович.
Тамам Рамазанова
