Ме кардин иде – даваф кекендира фиштти ичин Сергей Меликовас ахъакьуне Главайин Администрацинра РДйин Правительствойин сиясатдин хабарарин управленин, РДйин хIаттин пресс-службайин вакил иде Рашид Акавова.
РДйин ЦУРдин социальный сетдиъ Iари алттушу хIефттайин арайиъ адиная 2,6 агъзуралас вартт четинвелдин суалар хIуькуматинра районарин хIаттарис.
Мебурикес ерчIу вершалас вартт РДйин Минэнергойин адресдиди адиттар э, чабра хIапай Iеквар хъадихьубарихъас. Джалла районаринра шагьурарин арайиъ садпе мукьаригI гIедат идегъилди гIая Махачккала шагьур. Мин адресдиди адиная 464 тIалаблама, ме кIилди тIалабламабурин 56% хIисаб э.
Махачкалайин джемеIетин суаларин 80%тилас вартт Iеквар хъадихьубахъас, хъара Iекварилас асуллу иде курарихъас, хьеттихъас. Хьеттин насосарира Iеквар адавахIела кар даркьай гъатай аве. Жилищно – коммунальный хозяйствойихъай алакъа иде идарабурин арайиъ суалар ппара адибан садпе мукь фая «Дагэнергойин» филиалдив. Мебурихъди адиная ерчIу вершна хьибу тIалаблама. Фидегьен тегIди хъучавес алучIа гьер са идара чиппис ади суаларихъ?
Ке дахи джуваб ирцIанде Минэкономикайин идарабури. Мебурин джуваб 15 минутин арайиъ джиркIенде инсандис. Iудпе мукь фая Минтрудин идарабурив – мебурин джувабин яIанин вахтт хьибцIур минут ве. ГIуьфуд ке иджеттарин санаригI гIачархьа хъара: Минздрав, Минтранс, Минстрой.
Ке ппара гагьунилас джуваб ирцIанде Минприродайи – 5 сеIетилас, хъара Минэнергойи- 3 сеIетилас артухъди.
«Дагэнергойин» джуваб джиркIенде Iу сеIетна ягъцIур минутилас.
Муниципалетарин арайиъ ке тегIди джувабар ирцIанфра Махачкала э – 9 минут. Хъара мебуригI гIачархьа Казбековский район, Цунтинский район, Сулейман-Стальский район, хъара Хасавюрт шагьура.
Ке кьанайи джувабар ирцIанттаригI (5-6 сеIетарилас вартт) гIачархьа: Гергебильский район, Ногайский район, Курахский район, хъара Кизилюрт шагьура.
Нагагь мебур кIилди са усал акьуна хъуттурфучин, Рашид Акавован чIаларилди, алттушу исарихъай гьучикIучин, гьелбетта, ттиан исан джувабар лап ппара э. Социальный сетариас джемеIетихъай алакъара алтухъ э. Ме кар бадалди гьеме джуваб ирцIанде хабар гъушугуна Дагъусттанагьлибурира.
Миштти ичира, гьелбетта, мехIелдис хъара дуз акьуна ккане джуре шартIара хубджи аме.
Салихат Малагусейнова
