Iуьмурдин рекъуьн пеша гIаттивагуна гьер са инсанди учин йиркIурас нае пеша багу ичин фикир акьуна, гьате пешайихъ хъучаве. Пешайин эесси хьу вегIдайи инсанди джувабдарвел фай, учи аркьая кардис йиркIв йичин мин хIелра ппара идже хьасе, джемеIетин арайиъ хIуьлмат, нуьхIуьбат кьиматра ппара хьасе.
Гьелбетта пешабур дуьяйил джалла лазим э, амма ке хIуьлмат, гереквел аяттарикес сад э духттурвел. Фас пучин духттурари э дуьньяйин варттал, тIабиIетин гьер са джан але яратмишарис ке багьа зад иде Iуьмур давам акьубан рекъуьъ кумак аркьаф. Ме пеша гIаттивагуна инсанди джурейи, лап йиркIуран даринариас фикир акьуна гIаттивуна кканде. Духттурвелдин пеша халкьдин арайиъ лап хIа бурджи э. Дагь заманайин философ Сократа пугъилди, кьадибурин, мегIелимарин, духттурарин баджаранвел заварилас ирцIанф э. Нагагьттан гьакIанди алчархьу инсанди гьинан хьуна Iуьмур къутар акьучин микес иг
ит ве, мис джавизар ирцIанде, газитарик лиркIенде. Духттурарис — Iуьмурар къутар акьуб гьер ягъан хIа загьмат э. Ме загьматин рекъуьъ гъалатIин кьиматра ппара хIа э.
ДехIела духттурвелдин пешакардихъ хъай кканде руьхIдин цIуппевел, йиркIуран майданвел, рехIимлувел, хъара инсандихъди йиркIв руцIубна гIегвалвелра. Ме курарин ери-бина хъудава инсандифас мишттин пеша кIили гъасра хьасттава.
Гьемишттин зурба, баджаран пешакурарикес сад э Хидирлясова Эсли Асланбековна.
Эсли Асланбековна са агъзурна ерчIу вершна ерхьцIурна муядпе исан цIигIуьфудпе июльди Къуругь райондин Хероджарин хIуриъ, Асланбеканра Бесханум Базаеварин хIа хизандиъ хуне. Уч кидавай мебурин хизандиъ ай уйи хъара ерхьи шиникв, Iу кIиркIна якьу руш. Исламудин, Шарафудин, Минеханум, Назила, Рахма.
Дада мебурин, Базаев Асланбек Магомедовича кIилин Iуьмурди кар акьуне учин ху Хероджарин хIурин ФАП-дин заведующийвелди, бабра Базаева Бесханум Магомедовна гьеме ФАПдиъ санитарка и.
Iудара хIуькуматин кураригI гIай хизан ухIубан рекъуьъ алтухъ читинвел адавуй. ХIа па те вахттунин хизанар суман Дадна баб лирханди, шиникквари чиппифас вере гъил гьучихьай хIа хьуне мебур. Мал — къара ухIайчира,IуькI — кьал аркьайчира, бустандин хуппурарин курарисра кумакар аркьайи.
Са агъзурна ерчIу вершна ерцIурна еридпе иса ушуне Эсли махьтабиди муйцIурна гIуьфудпе иса ккиркIуне. Махьтаб ккиркIуна хурас учIуне Губахинское медучилищейиъ.
Са агъзурна ерчIу вершна муйцIурна муядпе иса хуруб ккиркIуна ушуне шувас Хидирлясов Абукар Курбаналиевичас. Ме военныбурин рекъуьас кар аркьай уйи Сургут агъа шагьурдиъ. Са чIалалди Iуьмурдин кьадарилди аттархьуне варха байирариди. Къана муя истти кар акьуне гьеме Сургут шагьурдин педиатрический участокдин, участковая медсестравелди.
Гьава суварин мертте гьавайил, ухьтан тIабиIетил хIа вей, мебурин бицIи вегIдабур лап шадтти ушуне. Пашманвел ий агъ
а Эсли Асланбековнайи учин са агъзурна ерчIу вершна ерцIурна ерчIудпу иса чиппин ке ккане къуншибур, дуст руш хIуриас айчIуна ушуб.
Ме вахттунихъас бицIиди гIегвалвел хъай ахъаркьа ме: «Ппара иджеттар ий че къунши Салимат хIабабан хизанар. Мебурин Назесанна зун са класиъ хъай хураттара ий, лап Iайи хъукъу дусттара. Нандиъ кканчира хъай аверефи.
Ай уй хIуриъ Вартти Рух агъа мукь, ме ус ппара хатIалу ий. Зас кIвалде гъван киркьуна мисаъ зе ччиччин гъил аргIуна. ДехIела мисади бицIиттарис ахттигьар ирцIанфттавуй вес. Сагелай зунна Назеса хъай ушугуна Салимат хIабаба тIулра фай адина чехъай алухIуна чин хулади файдини. Хулади адихаб зун Iешай — Iешай бабафас хабар гъушуне, я баб фас э Салимат хIеччийи хье хIабаб давайчира учин хуттуларисра йирхIуна часра атаф? Зе баба джуваб акьуне, — Джан зе руш гьаге джаллабурин хIабаб хIисаб э вунра гил йиркIв алихь, Салимат ччиччи фи пучин аге акье.
Ппара идже вахттар ий тебур, хIаттарис, мебурин чIаларис хIуьлмат ппара ий. Гьелбетта ягIа вахттара духIуба хьуная, инсанара. Алтухъ хIаттин чIалра гъадивас кканди андава. Сасрайин бицIиттис дагучIай маркьара пас вей андава».
ХIекьданра Хидирлясова Эслийин чIалар дуздинттар э. Авала фидегьен шиниккв дуз ичира мин удигь хIа инсан кедайхьас дадар бабара чиппин валадихъай алурхIанф ий. Гьеме рекъуьн тарбия фай хIа акьуная мебури чиппихъ хъая Iу валадра.
«Зунра зе хизанра гьемишттин авалдин Iекьулдилна тарбияйил хIа хьуттар идехIела, час ме гIедатарин кьиматра хIа э. Авала агъаф ий, ЯгIа вун хIаттарихъ фиштти хъуттурфучин, багагь вун хIа хьугуна вахъра гьегиштти хъуттурфасе пуна. Амма гьалдин дуьньяйиъ ме чIаларин кьимат джигьиларин арайиъ чIукь хьуна аргва», — пуне Эсли Асланбековнайи.
Чиппин кIиркIна руш хIа акьуна гьерф учин кардин хизандин эессибур акьуная мебури Валадари Iударира бабан хьилариас ушуна духттурвелдин пешабур гIаттивуная.
КIиркIа Сургут шагьурдиъ рентгенологвелди кар аркьая, учин хизан Iуд шиникквара хъая. Рушра Москвайиъ медсестра э. Мера учин хизандин эесси ий, бицIиттихъ хъуттурфанди хулаъ ая.
Учин хизан Абукар Курбаналиевич ягIа майор в отставке э. Ме пенсийди ушуф мебур айчIуна адиная чиппин ватандихъди. ЯгIайин ягъа Эслийи Избербаш шагьурдин МБОУ 12-СОШ-диъ медсестравелди кар аркьая.
Лап ухьтан хьил атуная ме учи къана муя истти кар акьу шагьурдин больницайиъра. Фиштти э пучин, лап хIа чугъсагъул хъай гъушу джавизарна кIеджар хъая михъ. Мидегьен вас хъуьдуьхьу пеша гIаттивас фиттин кумак хьуне пуна хабар гъушугуна Хидирлясова Эслийи джуваб ирцIанде: «Дадан — бабан хал гьер са валадис ке ибгIа мукь э.
ЙиркIурас ибгIа мукьуйиъ э келлайиъ дуздин фикирара ачархьаф. Лап бицIигунахъас мич зас аргвай вейи зе дада итта инсанарис кумак аркьай, дехIела идеф хьасе зера Iешкъ учIуф ме кардиъ. Зун бицIи ичира зас ягIайи дадан пешайин загьматра ме загьматин кьиматра.
ЯгIа зе бицIи Ватандихъди багу хьуна зе йиркIв сакин э.
Шадвел э зе йиркIурас, кардигьас азад вахттуни хулади адигуна зе хуттулара хъай гIаттиная валадар агуб, мебуригь гьуруцуб. Баджат ая са дадасна бабасра валадин валад дегьен багьа зад.
Зе насихIет э джигьил пешакурарис: итта инсандихъди сабур, хIуьлмат, гIегвалвел ухIуб! ЯгIа гьеме хьибу шартI чун ухIучин — багагь чве кьиматра вартт хьасе!».
БицIи шиниккварихъай кар аркьадегьен исари гьер джуре читинвелар алчархьуне мил, амма учин кар ягIавелдира, джувабдарвелди мебур рехIетти гьадихьай и ме.
Мин ахттилатарилди мукь духIуба хьучира кардин рекъуьас са духIубавелра хьасттава йиркIв фай лирхан инсандин.
Гьемишттин, сабурлу, учин кардис йиркIв ирцIан, эхIттиб хъихьас вере, кегъархьая несиларис чишна иде пешакурар хье бицIи Агъул халкьдихъ ппара хьурай.
Чиппихъ гьалдин хабра ацIуна исари инсанарин сагъламвел бадалди загьмат дивас джандин сагъвел, йиркIуран ачухъвел, ирхе Iуьмур хьурай!
Салихат Малагусейнова
