28-пе июнь- Джигьиларин хIаягъ э. Гьеме ягъа Дагъусттандин 4 шагьурдиъна джалла районарин яIанигъ хIурариъ хIаягъарин мегIракабур аркьай уйи. Ке ппара инсанар завал хьуна уйиф шагьурариъ и: Кьизлардиъ, Буйнакскдиъ,Хасавюртдиъ, МахIачкьалайиъ.
КIилди Дагъусттандин мегIракабур аркьа майданарил 40 агъзур джигьил инсан завал хьуна уйи: джигьилар, студентар, активистар, гIулар. МахIачкьалайиъ хIаягъар акьас 14 агъзуралас вартт инсанар завал хьуна уйи. Мебури чиппин гIуларди унахъуна уйи республиккайин хIа кьулугъарил алдея инсанарис. Мисаъ Дагъусттандин премьер-министр Абумуслимов Абумуслим, РД-йин Правительствойин преседательдин заместитель Муслим Телякавов, МахIачкьала шагьурдин хIаттин вазифабур аркьая Джамбулат Салавов, Дагъусттандин-джгьиларин курарин министр Камил Саидов, региондин управленин Центрайин хIаф Исрафил Исрафиловра уйи.
«Дагъусттанин джигьилар! Чун хье республикайин ке Iайи умуд кея инсанар э! Чве гьер са кардин агалкьунари: гIилмиъ, гIилми ягIар аркьа мукьариъ, спортдиъ, культурайиъхье ватандин ттур вартт аркьая! Хье республикайи инсанарин Iуьммур идже хьубан бадалди гьалдин джуьрейин кампусар аркьай, стартапарис майил аркьай, инфраструктура идже хьас акьас пул фартая. Чун гьер са кардин кIилин удигь гьай кканде, дагучIай агъай, гьучихьай акье чве кIилиъ ая иджвел вере фикирар-чве гьер са сес лазим э Дагъусттан удигь хьас. Хьин джаллабури хъай яшаиш хьас акьасе хье Дагъусттан!»- пуне Абумуслим Абумуслимова ме мегIракайил гъургъаягуна.
МегIракабур алди уйи 60 майдандил-гьер сайил чиппин темайин добровольческий отрядари мотивационный лекцибур, спортивный состязанибур, квестар, чиппис иджи ягIа курар(мастер-классар) агвар акьуне.
ХIаягъан ягъа Республика Дагъусттандинра, Росмолодёждинра, РДйин джигьиларин курарин Министерствойин ттурарихъас активистарис, волонтерарис, джигьилари аркьа курарин удигь гьуве инсанарис гебури аркьа загьматараихъас почётный грамотабурна баркалагьдин кIеджар йине.
«Джигьил вахтт- зурбавелар аркьай, Iуьмурдин рекъ джиркIей, гьер са кардигь гьучишай, эхIттималвелар арайил аркьа вахтт э. Гьеме вахттуни э инсанири чиппин хьас ккиме Iуьмурдин бина кки янас хъучучIаф.
Дагъусттандин джигьилари бегьем джан алиянде чиппин ватандин агалкьунар вартт хьубан бадалди. Хье республикайин джигьил шиниккварина шибери ветеранарисра, СВО-йиъ ая эскерарин хизанарис кумак аркьа; РоссийигIди гIачадиная цIее мукьариъ яшамиш вея инсанарис гуманитарный кумакис задар завал акьуна, гьика.
Мишттин курар ке ппара йиркIв фай аркьаф КIилди Российин общегосударственный движенин шиниккварна джигьилар гIая «Движение Первых» агъа 300 агъзуралас вартт ая волонтёрский движенин иштаракчибур э.
Чун аркьая кар- лап Iайи лазим кар э, чве кумак фудайчин ппара четин хьаси ветеранарисна, СВО йиъ ая эскерарин хизанарис. ХIуьлматлу дусттар! Чун че багайин ягъ э! Гьалдин хабра дагучIай акье чун аркьаядегьен курар — чин чвас мус хьичира кумак акьасе! Чве джандихъ сагъвел хьурай, чвахъ идже дусттар хьурай, чвас бахттарна иджвелар хьурай! Чвас ме Джигьиларин хIаягъ нубарак хьурай»- пуне Сергей Меликова.
Агъул райондиъ Типпигъарин хIуриъ хIягъ нубарак хьурай агъай Закир Каидов гъургъуне. «ХIуьлматлу Агъул дерейин джигьилар! Чвас гьеме Джигьиларин багайин ягъахъ умуд киве, эхIваллувел(самостоятельность) агвар аркьай, эхIтималвелар (возможность) арайил аркьа, фиттигьасра дагучIа вахттунин хIаягъ нубурак хьурай! Джигьилар, чун мус хьучира дири, са кардигьасра хаб дачукIай, удигь вере инсанар э. Чун удигь гьай э гьер са йиркIвураъ ирхIу иджвелин курар бутмиш вереф. Гьеме хIаягъан ягъа чун джаллабур ислехIвелна нуьхIуьбат ай яшаиш хьурай. Чун че багайин ягъ э. Чун фидегьен цIуьппи гъузуна, хье дадарин тарихна гIедатар ухIай, сур сурин арайиъ нуьхIубат ай, хIаттарин баркалагь хъай руцай хьучин, хье райондинра, республикайинра, кIилди хIуькуматдин ттур вартт хьасе. Чвахъ гьерттихъ, чвас ккане кар акьас, гьерттис учин Iуьмурдин рекъ джикIина, лиханас, эл йирхIас, хурас, халкьдис хайир кее курар акьас, гьер са кар бутмиш акьас сагъвел, нуьхIуьбат, ислехIвел хьурай! Зас йиркIвурастти чун джаллабур чвас ккане мурадарихъ рукьуна кканде!»- пуне райондин хIаф Закир Каидова агъуларин джигьиларис.
Тамам Рамазанова
