Гьер са инсан гъавурдиъ ай кканде, ботулизм фидегьен сайрак иттал ичира, ппара хатIалу итталра идеф. Ме иттал гъайшаф ботулотоксин агъа лап гуджлу агъуйин отравленилас э. Читинвел э ме токсинарин — рангунилди, тIемулди, ниилди мебур ягIар акьас хьасттава.
Фи акьуна кканде ме иттал дахьас?

ДагIа инсанари акьу консервированный сурсатар гъушуна ккандава, фас пучин, хулариъ хIезур аркьа сурсатар мумкин кар э мебури мерттхьун адава усариъ арайил акьуб, лазим идедегьен руьхьес адатуб, са чIалалди антисанитария ахьуб. Гьемиштти, фишттинттар ичира дагIа копченый сурсатаригьасра вархал хьуна кканде. Чун чиппи консервироват аркьагъилди хьучира гIаттивуна кканде тазайин, сагъ натиджабур. ЧIирхьуттар утIуттар гIачархьучира ишламиш акьуна ккандава, хIеракат акьуна фадахъуна кканде. Ишламиш аркьа натиджабур батIарди мертте хьасттегьен Iуьччуна кканде.
Консервироват аркьагунан шартIар джалла кIили файшуна ккан де. Ме иттал учихъди багу хьуна дакканхаб сурсатарис кьел чIукь акьуна ккандава, руьхьуьб ккан кимий атуна ккандава.
Кьуларикк эл ккерхьу, хьед тIахIур хьу суман банккабуриъ ая сурсатар IуьтIуна ккандава.
Фиштти ухIуна кканде эхIттият?
Хулан консервыбур холодильникариъ ухI.
Сурсатарин кьадмивелдихъ нагагь бицIиди дехIера шак хъатахаб, гебур ишламиш маркьа. Ботулинический токсинари ке ппара зарар ирцIанде бицIиттарис. Мебурин таза джанди дахи фарцанде мин токсинар. Миштти идегуна шиниккварис хулан консервыбур йина ккандава.
Нагагь чун хулан консервыбур, копчёный сурсатар IуьтIуна чвас чIирхIе хьучин, тегIде-хIелди духттуралди ушуна кканде. Ушугунара, джин дакьуна, IуьтIуф фи сурсатар ичина пуна кканде. Нагагь чун, агубарис гьакIанттар ичира гьеме шартIар ухIучин, чун чвера чве хизанаринра сагъламвелра ухIасе.

Салихат Малагусейнова