Гьемисалас э къушумиди алакьа иде гьер са илле валадин варха рекъ хъучучIаф. Ме къушумиди гъареттарин иде-дававел ягIар акьуб бадалди, военкоматари шиниккварин яш хьастти башламиш аркьа мебур ахтармиш аркьай. Гъарефна дагъареф ахтармиш акьухаб, мебур ихьа военный учетиъ. Ме армиди гъареттарин садпе мегIрака э военный учетиъ ихьуна допризывник агъа ттур йиб.
Гьеме кар бадалди 31 январьди хье райондин больницайиди завал акьуна уйи 16 исар хьу шиникквар 2007 иса хуттар. Мисади хье духттурарихъай мебурин сагъламвел ахтармиш акьас адина уйи Хивскийна Агульский гIая военкоматиасра.
Садпе медосмотрдин кьаст э ягIар акьуб ягъниш кеяфна кидаваф, хабди къушумиди гъас верефна давереф ягIар хьуб бадала. Ме кардин кьимат ирцIанде мебурис комиссигI гIая ери духттура: терапевт, окулист, ЛОР, хирург, невропотолог, стоматолог хъара психиатрара, гереквел аяхаб сае духттурара хъуланде.
КIвал акьасе, приписная комиссия башламиш аркьафе гьер са цIае исан удигь ая хьибу вазала. Мегуна мебури завал акьуна 16-17 ис хьу вахттунин шиникквар ихьа учетиъ. Ме приписной комиссин вахтт э, хабди хъучучIа хьидин призывной кампания 1 апрельдихъас хаб.
Приписной кампанин ахирахъди допризывникар гъавурди ихьа воинский учетин кьайдабуриъ. Ме кардис ппара фикир ирцIанде военкоматин пешакурари, фас пучин, дузди джалла кьайдабурин гъавурди ихьучин, къушумиккес кIилар ккетиваттарин санра чIукь хьасе.
Приписной кIедж гъушанас, джигьил инсандив фай кканде документар:
учин паспорт ера хубан кIедж, яшамиш вея мукьуйиас кIедж, директордин къул але махьтабин характеристика, хьибу ишкилра, дадар бабарихъас анкетара, хъара медсправкара.
Ме кеджар фудавай садпе учетиъра ихьасра вейдава.
Батитай Габибулаева