Гьер са хIурин, са шагьурдин девлет э мисариъ яшамиш вея инсанар. Эгена ватандис муфиIет кеяттар идехаб, Iудтти девлетлу э. МуфиIет кеяттар пугуна, гъавурдиъ архьуна кканде учин экьуб гъайшиб ягIай аруцаттар, багу кIилинттис, къуни- къуншис зарар дайирцIанттар, учин ватандис йиркIв ицIанттар э пуна. Иджвелна Iайвел кея инсанар ягIар акьас
верефра гьерттин хасиятилдина, хъара гебури аркьа курарилди, дива загьматилди э.
Мисала аяфе, ху мукьуйиъ ла зимра хьуне агъаф. Миштти пучира, Iари уч ху мукьуйиъ илгуне пуна дава инсан лазим вереф, нандиъ айчира учин бицIи милат кIвалас гьадатуна, кумак кканхьуттис гъил гьучихьуб хъара хIа кьимат э инсандис. Гьемиштти учин бицIи миллатихъасра хъара сасрабурихъасра йиркIв руцIа инсан э Магомедова Гюльсара Курбановна.
1972 иса хуф э Гюльсара Агъулрайондин Типпигъарин хIуриъ Кьулбананра Гюльперин хизандиъ. Ме кидавай, мебурин хизан диъ уйи якьу кIиркIна са руш. Те вахттарихъ хъуттурфуна, са кьайдайилди дуламиш вей хьуне мебур. Дад и почтайин хIа бухгалтер, баб садикдиъ нянька. Хизандиъ ке бицIи шиниккв идехIела, джаллабури кканхьунар аркьай ухIуне ме. Самуз кегъархьухабра хулан курар, акьучира, алтухъ азиятин кураригь гьучидихьай ухIу руш э Гюльсара. Махьтабиккес каникулар хьуна мугьлат хьу вахттуни, тихъди, михъди кьвадилкьванар рухас вей хьуне мебур са къатди ая шибер. ДурахIалар, зарафатар, тамашабур аркьай, элар ккертай хьуне мебури те вахттари. Хабди, 10-пе класс ккиркIухаб, Байранкъиз агъа хIа чиччи мутIегI акьуне ме хурас вес учи хуруна ккиркIу Ростовский медучилищейиди.
Мед училище хуруна ккиркIухаб, ушуная ме шувас. Учин хизан Кьулбанра хъай Дагъусттандиас айчIуна ушуне мебур Крымдиди. Тисаъ кардик хьуне санэпидстанциъ. Крымдиъ ами, 1993 иса хьуне мебурихъ ХIейдар агъа валадра. ЯгIайин ягъас ме валад учин хизандинра эеси э. Мин пешайихъас гъургъучин, ХIейдар э военнослужащий, ке цIайи СВО башламиш акьухаб 6
вазди ме хьуне Украинайиъ. Гьер джурейин укъубариас агалкьунара хъая михъ, хъара мастер спортара э.
10 истти байирдиъ хьухаб, хаб адине мебур чиппин ватандихъди, айчIуна адине Махачкалайиди. 2009 иса мебурин хизандиъ
хьуне са рушра, Амина агъаф. Руша хурая 9 классиъ.
2002-пе иса Гюльсара кардик хьуне Республиканский диагностический центрдиъ медрегистраторвелди. ЯгIайин ягъасттегьен
учи аркьа кардис йиркIв йи инсан э Гюльсара. Ме 21 истти мисаъ милас ппара ягъар, Iуьшар алайшуне. Мисаъ ми гьеге учин дард суман гьер инсандин дардра дива, иджвелин хабар хьугуна джаллайин йиркIвра гъадива. Фикир акьугуна, хиял адаве йиркIураас, яраб аягьан хье райондиъ Гюльсарайи чIал гIачидихьуна, кумак дакьу инсан пуна. Нагагьра ахьас пуна фикир адава зе. Мисаъ багьана Iари пешайинф дава, инсандин инсанвел кехьубанфра э. Герек арайи батIар чIал пуна,
кумак акьубанра ппара хIа саваб ая инсандис. Гьеме джурейин инсанарин сандигI гIая хье Гюльсарара.
«КьацIра йиркIуралас давередегьен ттур ая инсан э. БатIар чIална ачухъ сурат дала агуфттава микес фи арайи ушучира РДЦйиди, гьукк акьуна учивас вере кумакра аркьа. Джандин сагъвел хьурай учин, чугъсагъул хьурай учис учи аркьа кардихъас», — гьемиштти ппара разидалди джувабар йине хье халкьди Гюльсарайихъас.
Учин пешайин ацIуна таджриба ая мин. Мишттин медсестрабурис инсанарин багухъас ппара лайикъ э чугъсагъул пуб учи
аркьа кардис. Джалла ме пешайин джигьил медсестрабурис чишна хьуна кканде мишттин инсанар. ДжемеIетин багухъас суман,
уч кар аркьа усан хIаттарин багухъасра ая мис чугъсагъуларин кIеджар.
Батитай Габибулаева