Курар аве агърукьаттара, агъдарукьаттара, вереттара, давереттара. Агъдарукьа давере курар аве: чIукь загьмат алихьучи бегьем вереттар, ппара кумак кканеттар, кьацIра фи акьучира файда кидаваттар.
Зас ягIа пас кканди ая Бедухъарин хIуриъ ая кIилди хIуринра, мактабинра гIая площадккайихъас. Зас садпегелай агугуна ге мукь зун муьхIтал хьуна гъузуне.
Бедухъарин хIур уч хIафра дава, хъаттаркуфра э вархавелдихъас, рекъерихъас, амма мишттин гьава ахьасе пуна кIваъ адавуйи зас хуриъ ая адава суман майдан. Ге мукь ая дихьи мактабин удигь гьучадаркуна, гимин багулив. Манзилар э валейбол аркьа площадккайилас чIукь вартт — ярчIу митIри IирIевел, цIемуя митIри ирхевел. Ге манзил кидавай чIукь хъара къирагъихъра амилгванде, къирагъ идегъилди Iу-хьибу митIри суман. Учра ге мукь кедаркуна э аяф, шиникквари тупп дурхIай хьучи фаттархьухаб ккейшуна адавеяф э хIурин ади багвариди. Ле кара ферра дава, хъара тамашинф э джуре кар, зун петтилас вартт сара ферра адава: е волейбол акьас сетка адавайчира багварихъас ирхIу рукьан дарар, е тупп ихьа баскетболдин корзинабур, е Iари дурникI дехIера, са хIиллайинф ичира. Гишттин шейэр ахьуна ккане мукьуйиъ ругна гъванардала ферра адава. Къана садпе век агъа хьин раккагь, амма мебурин площадка ая дагь заманайинф суман. Багварихъас акуру гъванара атуна батIарвелдис сара ферра адава.
Сад пеф, ге кардихъас пас кканде Бедухъарин хIурин халкьдис, гебурин идемарис, кIесттегьен рукь аягуна хье хIуькуматиъ, хIилла-чара акьуна са дурникI акьас вейдавуйив шиниккварис? Вейи.
Iуд пеф, мактабиъ кар аркьай ая мегIелимарис, директордилас хъучучIуна физкультура ицIанттарихъас ккиркIуна. Чун зарплата гъуланф гъуланди э, чве кар ухшар хьас шиникквар бадалдехIера Iу агъзур манат хардж акьучи дурникIдехIера ирхIас хьаси. Са вазала давейчи са исан арайиъ аркьагъилди.
Хьибудпеф — ЧIааринра Бедухъарин хIурин хIаттис тIалаб акьуна уйихаба, ги килиъ файдина ихьас идефхьаси. Дапичира учира акьуна кканеф и ги.
Хьин хьевас агърукьа курар акьасдехIера алдучIай хье халкь бадалдехIера, хье шиниккварин хатириас дехIера вартт хъуланде, хIаттарилди тIубар даргъай. Ме кардинра кеудигьай къалат э чаб халкь хIуриъ фи айчина-адавайчина, хуппай хIекимар.
Мушра кея, йиркIвра шад хьаси е ме чIалар унихьуна, е чиппин кIилиъ архьуна, багу вахттари е дурникI, е волейболдин сетка дивас рукьан дарар ирхIагъилди. Хьин алдучIучи хьехъасдехIера, сасрабурис хьин генара лазимди адава.
