Са шагьурдиъ яшамиш вей ахьуная гIурчахъан.Са ягъарикес са ягъа мив фачархьуна адава гIурч.Эгера зун фера фудай хулаъди адичин, шагьурдин агьлибирин арайиъ зун хIисабикк ккимилгванасттава. «Див зун хъара  самуз адаркасе, белики фи ичира фачархьас идефхьасе зас»,пуна, хаб алдаркуная ме.
Рекъди вея вегIдуни аргва мис  экIен кIетIул экьуна ширинди рахва булбул.Учил туфанг алийина  йирхIас хIезурди ая гIурчахъан агуф, джакьв лал хьуна гъата…Хуппай,Iегвал вере джилара акаьуна, агъа ми гIурчахъандис:
—Е гIурчахъан! Зе кIалибар лап бицiи э: зак кея якк е ве мезурал алчархьасттава, е силебаригI гIачархьсттава. Ате сара зун тукаригIна IуькIеригI  дакIина, ширинди рахвай , инсанарин йиркIвар шад аркьай .
Амма  гIурчахъан,  сагъилдира чIалаъ гъас девей, гъата.
-Зас вун IуьтIанасттава  кканди аяф, зун инсанарин удигь беябур дахьас пуна э. Зун гIурчаъас  са мусра кехIей фера фудай, гъил кизурзай адефттава. ЯгIа, Iари адичин, джаллабур цIакун хъуттурфанасе  захъ, зун джаллайин улиъас адархьасе.
Булбул хаб миннатар аркьай хъучучIа:
-Сабур акье сара, тегIде мева: сагелай,зун вас са хьибу насихIет есе, хуппай йирхIучира, ахттигьар веф э.
-Буюр! Тин зас ве ахиран дарсар. Зун йиркIв алийина ая.
Булбули агъа:
-Хъугъас деве ахттилатил мусра йиркIв алмиян. Акьуна ккиркIу кардил пушмал мева. Хьибудпеф-гъил дарукьа задттилди  гъил мадаргъа.
Булбули пе чIаларил рази хьуна, гIурчахъанди туфангин  люл ахтт акьуна,
— Ях вас ккане багвухъди.,-пуне мис.
ГIурчахъанди миштти пегъилди,булбул, экьуна  кIуранин ке гьава куларил, агъа гIурчахъандис:
-Е инсан, зун ваъас азмурар аттивуне.Зас зун кIебагьас давуйи гучIай  аяф. Зе фуниъ лап Iайи батIар гьер джуьре рангарин нурар ицIан къазалан гъурагъал дегьен легъли ая. Учра  хьибу паччагьдифас алчихьуна гъушанас девеф, лап хIа кьиматин ккиеф. Зас те вун суман эхIмакьан гъилиъ  архьуна кканди адавуйи.
Хъел адина, гIурчахъандис кканхьуне ме булбул йирхIуна  кейхьас, амма мифас сагъилдира, алийина, йирхIас вей ахьуна адаъ- джилар унихьайчира кIуранин куларигьасна цIабаригьас уч джакьв даргвай.
Фадихьуна туфангра, акуьчIа ме кIураник, гIагъучIуна булбул фацанас, алчархьуна  икке  кулул лек, керхьуна, алата  гIурчахъан джилил.
Гьал гIурчахъандис  учис кумак кканди ая  джакьвалакес:
— Агь джан бубул,зас  са чара акье сара , агъай , миннат аркьа  ми училди кедина гьучаде булбулис.
-Е гIурчахъан! Фи бахттсузвелдисра миндай учин  дарман  ая,амма ве балайиккес-адава.
-Фикьас адаваф?!- пуна,Iэламат хьуна ,улар агъикIуна хъуланде  гIурчахъан булбулихъ.
Булбули, вичIричIар апркьай, мишттин джуваб ицIанде:
-Зун вас хьибу насихIет йини, ппай вун садра кехIей тебирикес фацундава: садпеф: гуджбалайилди кьваран уд алгьарта зун ,амма вун зе фуниъ къазалан гъурагъалдегьен  легIли ая пуна хъугъуне.
-Iудпефра- зун вас пуни:акьуна ккиркIу кардил пушмал мева. Амма  зун дакIина фатубал вун пушмал хьуне,легIихъас унихьуфна сад.
Ве  йиркIвуралас ушуне  хьибудпе насихIетра:гъил дарукьа задттихъди гъил мадаргъа пеф. Зун лап муззе кIетIарил эркьва, вахъас пичин, зун фацанас пуна,икке кIуранин куларик экуьучIуне.
Валлагь зафас вас са  кумакра акьас хьасттава,эхIмакь гъурчахъан!
Дуьйил фиттис хьичира дарман ая,амма эхIмакьвелдис-адава! (Лезгибирин хIикат).
Тамам Рамазанова