Инсандис учин Iуьмурди йиная ке хIа савкьат э джандин сагъвел. Сагъвелдин кьимат агьалдин вахттари ппара хIаф аттархьа. Пулун кьимат кедавай, инсан Iуьмурдивасра фаттархьа. Агьал инсандин сагъвелдин иммунитетра авалан вахттари суман цIуьппи андава. Ме ке Iайи аслу э, хьин Iелди ая гунилас, ешамиш вея мукьуйин гьавайилас, аркьая кардилас. Авала хьин Iелди ая гуни мерттеф и. Мерттеф пегуна, учин гъиларилди узуна, уцуна, алайхIуна файшуна рагIуъ ругIуна аркьа гIурин гуни авейи хулан хизанарис. Учин мертте нис, ччам, некк, ифал, джар. Алтухъ фера итте шейэр адавуй. Ппара хьучин шиникквдис гунил алтIишина ифал алахъуна пусукIра ирцIанфи. Байирдиди кар акьас вейчин дабрагиъ авереф кIилди ве хулан шейэр и: кьутIур, суьлен гуни, нисин кьут, руту некк, тIишина мусуйин гвад. Мебур IуьтIугуна джандис кьуватра йина кIилин ягъди кар акьас аттрукьайи.
Иттар хьучира, алтухъ дарманар адавай кIилди ишламиш аркьафи джирехIвел кея IуькIер, цIабар,тукар хъара гьер джурайин дарман кея шейэр.Иттал гIаттифна сад ухайи уцу некк алихьуна ифал хъайчин са ттур уттра гIихьуна. Хъара гьер са итталис ишламиш аркьайи гьерджурайин цIабарикес акьу чай. Кьуркьар тIагIуттин ччамулди ибгIа акьу кIуранин ттурулди тIиршанди кьуркьар. Мухур хъархьетти мухур тIиршанди кьунан мавулди. Сайиштти джерехIвел кея инсанарилди вей хьуне гьер са итталис рехIмиакьас. Агьал суман булди дарманар адавуйи, духттурар адавуйи. ТабиIэти йиная нуьгIматарикес аркьай чиппис джерехIвелар.
Агьал фи иттархьичира инсан гьукк акьуна вес алучIа аптекайиди цIуд дараманарин гъушанас. Духттурарира алтухъ чиппилди джувабдарвел гъушанас алучIайдава, дехIела джерехIвелдинттардалара мебури хIуькуматин дарманар ликIенас алучIа. Са багухъас мебурин гъавурдиъ архьа. Фас пичин, ахиран хьибу исан арайи, гьалдис уйи итталарихъди, бадил хьуне COVID. Ме иттали инсанарин Iуьмурар духIуба акьуне. Вахттуни руб-дарман дакьучин инсандин Iуьмур архьайи читин дараджайиъ (положение). Ппара Iуьмурар пуч акьуне ме иттали. ЯгIайин ягъас коронавирус яваш хьуная. Айчира арабур аркьай мисаъ-тисаъ бадил ве иттаттар. Сайишти цулихъди Iайи алгъазиланф грипп агъа иттал. Агьал хутти аркьая хье больницайиъ гриппин вакцинация. Ме аркьаф гьер инсандин учин разивел фай э. Агьал ме руб йирхIа джалгайигI гIачархьая шиникквар ерхьи вазалалас ерхьи ис хьеттарилди рукьуна. Iайи иттархьас мункинвелар аяттар, мегIелимар, духттурар, соцработникар, машинарихъ кар аркьаттар, Iелеттар хIезур аркьаттар. Хъара михъай барамбарди аркьая коронавирусдин ревакцинацира.
Агьал алтухъ иттаттар адавайчира духттурари инсанарис мугъатвел фадмихьа агъа. Эхlттиятихъ хъучархьаф адава. Гьертти училас фикир акьуна ме кардихъас къикъи тIушуна кканде. Итта инсан ая усариди вей ккандава, иттаттира алтухъ гереквел адай инсанаригIди айчIвай ккандава. Исалас иса вере гриппара Iаттаре, сагъ акьасра читинттар ве. Гьер са цIае джурайис руб джикIина арайил верегунас вахттар ккеттве.
Миштти идегуна, духттурарира гриппар дахьас алтухъ гереквел адавай инсанар ппара завал хье усариди мева агъа. Ишламиш акье агъа дезинфицирующий ича дарманар. Хъара иджи э маскабур ишламиш акьуб инсан халкь завал вере мукьари. Миштин ихIтият велар инсанарин дахьу хаба иттали учи кея гудж агвар аркьа. Агьал джалла дуйин духттурарин вазифа э джемеIет иттархьас адатуб. Нагагь иттархьичин хулариъ дарманар Iелди амеркьва агъа мебури, вархалди дадивуна ях агъа больницабури. Дахьичин Iайи хьасттегьен экьуна хулариъ хаб дахттурарис читин ве сагъ акьас. Миштти идегуна гьер инсанди фикир акьуна канде учихъас суман сасрабурихъасра, фикир йина канде духттурари агъа аркьая тIалабарис. Са инсандин сагъвелди кIилди уммат ухIаагъа мисала ая. Мишти идегуна хье сагъвел хье гъили ая.
Наибет Гасукаева